Ilo̧k im Kōm̧m̧ane kōn Lōke ilo Anij

Jān Būreejtōn Henry B. Eyring

Rikapilōklōk eo Kein Karuo ilo Būreejtōnji eo Kein Kajuon

Jān juon ekōnono an Oktoba 2010 kweilo̧k eo eļap.

Nipai eo edik ilo Bok in Mormon eim̧we kōj kōn juon ikideelel n̄an ejaake leke ilo Irooj n̄an pokake kien ko An. Nipai eaar ioon kauwōtata im baj mej ke eaar ba naan in leke kein me jemaron̄e im en̄jake ilo būruwōd: “Inaaj ilo̧k im kōm̧m̧ani men ko Irooj eaar kean̄, bwe ijeļā Irooj ejjāmin letok kien ko n̄an ro nejin armej, eļan̄n̄e Ejjab kōpooj juon iaļ n̄an aer kōtōprak men e o Ej kean̄ er” (1 Nipai 3:7).

Leke in ej itok jān jeļā Anij. Ilōn̄in jabdewōt armej ioon laļin, jekar, kōn jepļaaktok eo an gospel in, en̄jake kam̧m̧oolol kōn ta eo Anij eaar kwaļo̧k kōn Emake bwe jen maron̄ leke E.

N̄an n̄a eaar ijjino ilo 1820 ippān juon ļaddik edik ilo ibuljin wōjke ko ilo juon jikin kallib ilo bukwōn in New York. Ļaddik eo, Josep Smith Jr., eaar etetal ļo̧k n̄an jikin eo ekitileek im bukwelōlō im jar ilo leke bwe Anij enaaj uwaake. Aolep iien ij riiti bwebwenato eo an, aō leke Anij im ro Karejeraņ ej ļapļo̧k.

“Iaar lo juon joor in meram ilōn̄ in wōt bōra, eo meram eo an emeram ļo̧k jān al ilo raelep, eo eaar jidik wōt an wanlaļtak m̧ae iien eo ej pād ejjak eō.

“… Ke meram eo ar pād ioō iaar lo ruo Armej, ro meram im aiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iair ear konono n̄ōn iō, ear kir io kin et eo eta, jitonlok eo juon im ba—En̄in Nejū Jiten bōro. Ron̄jake E!” (Josep Smith—Bwebwenato 1:16–17).

Jemed eaar kwaļo̧k n̄an kōj bwe Ej mour, bwe Jisōs Kraist ej Nejin Jitenbōro Emake Wōt, im bwe Ej iakwe kōj bwe eaar jilkintok Nejin bwe en lo̧mo̧o̧ren kōj. Im kōnke ewōr juon aō naan in kam̧ool bwe Eaar kūr ļaddik in āinwōt juon rikanaan, Ij leke rijilōk ro An rainin im ro rej kūr n̄an jerbal n̄an Anij.

Kwoj kwaļo̧k leke ilo Anij n̄e kwoj ron̄jake kōn kōņaan in ekkatak im ukweļo̧k innām ilo̧k im kōm̧m̧ane jabdewōt Ej kajjitōk. Eļan̄n̄e kwoj leke Anij n̄an ron̄jake ennaan ko An kōn kapilōk, kajim̧we, im tōl jān karejeraņ ro An, kwonaaj lo er. Im eļan̄n̄e kwoj etal im kōm̧m̧ane ta eo Ej kōņaan bwe kwon kōm̧m̧ane, am̧ kajoor n̄an leke E enaaj eddōkļo̧k, im ilo iien eo kwonaaj jokne kōn kam̧m̧oolol n̄an lo bwe Ej leke eok.