Jouj Ewōr Tokjen
Jeo̧rļo̧k Bōd Eo
Juon raan ilo jikuuļ, jet iaan ro ilo kūlaaj eo aō raar kōm̧m̧an kōjak kōn bar juon rijikuuļ kōn jet āt ko. Āinwōt ekar em̧m̧an, innām iaar kobaļo̧k ippāer. Ilo wiik eo, iaar kōm̧m̧an kōjak kake ippān ro m̧ōtta.
Jet wiik tokālik, ļaddik eo eaar ba n̄an eō kōn en̄jake eo an. Eaar metak kōn naan ko ammim men̄e eaar kajjieon̄ in jab kea kōn ammim kōm̧m̧an kōjak kake e. Eaar ba eaar jan̄ aolep bon̄. Iaar baj wōt jan̄ ke ej ba n̄an n̄a. Iaar kōņan jipan̄ e im kar kallikar bwe in jeo̧rļo̧k bōd kōn ta ko iaar ba n̄an e.
Raan eo juon, iaar kajju n̄an ippān im likūt peiū ioon aeran. Iaar ba, “Ij lukkuun jeo̧rļo̧k aō bōd bwe iaar kōm̧m̧an kōjak kake eok.” Eaar em̧ajidjid kōn naan ko aō, im mejen eaar obrak kōn dānnin kōmjaļļaļ. Ak ajri ro jet raar kōm̧m̧an kōjak wōt kake e. Innām iaar keememej ta eo iaar ekkatak ilo kūlaaj in Būraimere eo aō: kālet jim̧we eo.
Iaar jiron̄ ro uwaan kūlaaj eo an ilo peran, “Bōjrak inkōm̧m̧an kōjak kake e! Komi jeļā ke ewi jon̄an an pen menin n̄an e? Jouj komin ba jeo̧rļo̧k bōd kōn ta eo kwaar kōm̧m̧ane im komin m̧ōttāiki.”
Ak ekar jab pidodo aeer ukōt menin. Ijoke, raar illu ippa im ba, “Kiiō kweita? Kwaar bar kōm̧m̧an kōjak kake e!”
Iaar en̄jake ta eo iaar kōm̧m̧ane m̧okta. Kōn menin iaar ba, “Emōj aō jeo̧rļo̧k aō bōd ippān. Ikōņaan bwe komin meļeļe ewi an en̄jake im bōjrak kōm̧m̧an kōjak kake e.”
Juon iaer eaar ba jeo̧rļo̧k bōd, im kōmjel jilu kar m̧ōttā. Jejjo̧ wōt armej rej kōm̧m̧an kōjak kake e, ak eaar em̧m̧anļo̧k an en̄jake kōnke kōmij m̧ōttan. Inaaj kālet jim̧we eo n̄an jipan̄ juon m̧ōtta ilo aikuj.