Erom̧ Āinwōt Nipai
Ke Nipai eaar ba n̄an jemen, “Inaaj ilo̧k im kōm̧m̧ani men ko Irooj eaar kean̄” (1 Nipai 3:7), eaar letok n̄an kōj juon waanjon̄ok eo eim̧we kōn tōmakim tiljek ilo pokake. Kallim̧ur eo an Nipai n̄an ilo̧k im kōm̧m̧ane ekar ruo okraņ ko raorōk n̄an kōj aolep me jemaron̄ ejaake: naan in kam̧ool eo an make kōn Irooj im rikanaan ro An, im kajoorļo̧k in mour in jetōb eo an.
Ejaake juon Naan in Kam̧ool
Nipai ekar pokake kōnke eaar pukote im kar bōk make naan in kam̧ool eo an kōn kien ko an Irooj n̄an jemen (lale 1 Nipai 2:16–20). Ekar jeļā bwe jerbal eo n̄an būki pilej brass ko enaaj pen. Ak ejjab āinwōt ļōm̧aro jein, eaar jeļā bwe Irooj enaaj pād ippān im kepooj juon iaļ n̄an aer kadedeļo̧k.
Tōmak in ilo Anij im rikanaan eo An ekar kōjeraam̧m̧an im kar kōjparok Nipai ilo aolepen mour ko an im kar jipan̄ e kadedeļo̧k men ko rekabwilōn̄lōn̄. Āinwōt Nipai, jemaron̄ kōm̧m̧ani men ko reļļap ilo ad mour ko ad ilo ad kajjieon̄ pokake kapilōk eo jej būki jān rikanaan ro remour, unoojdikdik ko an Jetōb Kwojarjar, im ilo jeje ko rekwojarjar. N̄an waanjon̄ok, rikanaan eo an Irooj rainin, Būreejtōn Russell M. Nelson, eaar kajjitōk ippād n̄an jipan̄ aiin Israel im keppojak n̄an jepļaaktok eo an Rilo̧mo̧o̧r.1
Ilo ad riiti naan ko an Anij im pokaki, ad tōmak enaaj ļapļo̧k im jenaaj en̄jake ilo būruwōd juon leke n̄an wōnm̧aanļo̧k im pokake, mekarta n̄e jejeļā ewōr men ko reppen.
Kōm̧anm̧anļo̧k Mour in Jetōb
Waanjon̄ok eo an Nipai ebarāinwōt katakin kōj kōn wāween ko an Kraist kōn kōm̧anmanļo̧k—dipļo̧ki apan̄ ko ijeļo̧kin kalimjōk juon iaļ eo epidodo. Elōn̄ iien ko ilo mour ko ad n̄e rej kajjitōk ippād n̄an kōm̧m̧ane men ko reppen. Ilo jekjek kein, eļan̄n̄e jej pedped ioon tōmak eo ad ilo Kraist im kālet “men eo epen ijeļo̧kin bōd eo epidodo,”2 jenaaj jeraam̧m̧an.
N̄e kwoj lo am̧ make ioon juon kālet epen ak jerbal, bōke m̧wiļ eo “etal im kōm̧m̧ane” enaaj jipan̄ eok kakkōt. Lukkuun mour kake tōl eo me kwoj bōke ej kwaļo̧k n̄an Irooj bwe emaron̄ pedped ioom̧ im kōļapļo̧k am̧ tōmak ilo Jisōs Kraist.
Ilo am̧ tiljek jerbal n̄an ejaake naan in kam̧ool eo am̧, mour in jetōb, im “etal im kōm̧m̧an” ilo m̧wiļ, Irooj enaaj kōjeraam̧m̧an eok, kōkajoorļo̧k eok, im kōjparok eok ilo iiō in im ilo aolepen mour eo am̧.