Ij ļōmņak jet iien epidodo n̄an rūm̧m̧an ded ro n̄an tōmak bwe ukweļo̧k ej juon men ekamijak. Em̧ool bwe ekamijak n̄an kwaļo̧k ta eo jekar kōm̧m̧ae eļan̄n̄e jej mijak n̄e enaaj jako iakwe eo an ro jej kakeer ak iakwe eo jān Jemedwōj Ilan̄. Kōn kōļmenļo̧kjeņ in kōn ukweļo̧k, jemaron̄ po n̄an kwaļo̧k ruōd jo̧n̄ak eo wōt me “ebwe” n̄an eļļā ioon ta eo jej en̄jake āinwōt juon idajon̄jon̄ n̄an em̧m̧akūt n̄an lābōļ eo juon. Ijoke, ikar ekkatak kōn iminene ko aō bwe ejjab m̧ool in ukweļo̧k wāween in. Ukweļo̧k ejjab aolep iien epidodo, ak eļan̄n̄e jemeļeļe ewi jon̄an an Irooj iakwe kōj im kōņaan jipan̄ kōj, mijak ej jako ļo̧k ilo ad kōjerbal tōmak ko ad ilo maron̄ ko An n̄an kōm̧m̧an bwe jen erreo. Ikar ekkatak bwe ilo aō kōjerbal tōmak eo aō ilo Kraist ilo aō ukweļo̧k bōd ko aō rejjab aikuj ļōme kiiō im ilju im jekļaj eo aō (riit eļo̧apļo̧k ilo bwebwenato ilo aō ilo peij 44).
Ilo bwebwenato ko ilo digital-wōt, Evita ej kwaļo̧k bwe m̧ool in ukweļo̧k ej bōktok n̄an kōj kam̧m̧oolol kōn Rilo̧mo̧o̧r im Pinmuur eo An im ej letok n̄an kōj kajoor n̄an anjo̧ jān kapo ko im̧aan. Leah ej kakobaba bwe jejjab aikuj kōttar n̄an kwojkwoj ilo Jabōt—oktakļo̧k n̄an Irooj kōn ukweļo̧k kajjojo raan ej letok kajoor n̄an kōkm̧anm̧an ļo̧k iminene dikdik ko ad me rej katoļo̧k kōj jān E Im eļan̄n̄e jej kōm̧m̧an bōd ko reļļap, Jori ekar kwaļo̧k bwe jerbal in ukweļo̧k emaron̄ katakin kōj kōn iakwe eo an Rilo̧mo̧o̧r n̄an kōj kajjojo
Ukweļo̧k ej juon mennin letok me eļap aō kam̧m̧oolol kake ilo mour e aō Anij ejeļā bwe kōj armej jej kōm̧m̧ani kāāļōt ko rejjab em̧m̧an jet iien Jon̄an ad jab wānōk, elōn̄ kōjatdikdik n̄an kōj . Eļan̄n̄e jej likūt ad lōke ilo Rilo̧mo̧o̧r, E enaaj etetal ippād iaļ eo ej karool ļo̧k n̄an ippān Jemedwōj Ilan̄—mekarta emaron̄ bōk iien