Ajri ro im Jodikdik ro:Juon Mije ilo Kajjojo raan in Mour
Pija jān Randy Collier
Emaron̄ kar kam̧weer eok bwe Ajri ro im Jodikdik ro rejjab pād ilo laajrak in kajjojo kōttōbar kwoj aikuj kōm̧m̧ane. Em̧ōj am̧ kōm̧m̧an elōn̄ men ko rekabwilōn̄lōn̄! Ijoke, ijjino in kar ejaake n̄an jipan̄ eok epaakeļo̧k Rilo̧mo̧o̧r ilo wāween ko reim̧we itok jen aikuj im itok limo ko am̧.
Jibadbad eo an Ajri im Jodikdik ro ej n̄an jipan̄ eok kōkajoorļo̧k tōmak eo am̧ ilo Jisōs Kraist. Luk 2:52 ej katakin kōj bwe ilo iien jodikdik eo an Jisōs Kraist, Eaar “ļap ilo mālōtlōt im rūtto, im ilo jouj ippān armej im Anij.” Eaar mour ilo jokon mour, im kwomaron̄ bar āinwōt. Ilo mije wōt jetōb, iiaio̧, ānbwin, jeļāļo̧kjeņ ilo aolepen mour eo am̧, kwomaron̄ erom̧ āinwōt Rilo̧mo̧o̧r eo.
Meļeļe ko jān Be Still Waters, jān Simon Dewey
Wāween An Jerbal
Ajri im Jodikdik ro rej rōjan̄ eok n̄an eddōkļo̧k ilo jetōb, iiaio̧, ānbwin, im jeļāļo̧kjeņ ilo bōk kuņa ilo ekkatak gospel, jerbal in jipan̄ im m̧akūtkūt ko, im eddōkļo̧k eo an juon make.
Ekkatak Gospel eo
Ilo an Rilo̧mo̧o̧r eo “ļap ilo mālōtlōt” (Luk 2:52), kwomaron̄ bar eddōkļo̧k ilo jeļāļo̧kjeņ eo am̧ n̄an meļeļe kōn gospel in. Kajjojo pedped in katak an gospel kwoj ekkatak enaaj jipan̄ eok jeļā elmen an Rilo̧mo̧o̧r maron̄ kōkajoorļo̧k im kōjeraam̧m̧an eok ilo aolepen m̧ōttan ko ilo mour eo am̧.
Ekanooj lōn̄ menin jipan̄ ko jemaron̄ kōjerabali n̄an ekkatak eļapļo̧k kōn pedped in katak ko an gospel in n̄an erom̧ āinwōt Rilo̧mo̧o̧r eo. N̄an waanjon̄ok, jar, riiti jeje ko rekwojarjar, im Jetōb eo ej letok juon pedped. Baam̧le im ritōl ro am̧ remaron̄ jipan̄ eok ekkatak eļapļo̧k kōn Rilo̧mo̧o̧r. Kein ekkatak eo Itok, Ļoor Eō im jemenere remaron̄ jipan̄ tōl am̧ ekkatak. Ilo am̧ kōjerbal kein jipan̄ ko am̧ n̄an ekkatak kōn Jisōs Kraist im gospel eo An, jemdo̧o̧n eo am̧ Ippān enaaj em̧m̧anļo̧k.
Jerbal in Jipan̄ im M̧akūtkūt ko
Jipan̄ ro jet ej juon iaan men ko me Rilo̧mo̧o̧r ekar kōm̧m̧ani ke Ekar pād ioon laļin. N̄an pukot wāween ko relam waan im rekkar n̄an jipan̄ ro ilo baam̧le im jukjukinpād, kwoj ļoor waanjon̄ok eo An im kallim̧ur n̄an erom̧ āinwōt E.
Makūtkūt in kurup ko ewōr tokjeer remaron̄ jipan̄ eok im jodikdik ro jet pukot wāween ko n̄an jerbal in jipan̄ ro jet barāinwōt eddōkļo̧k jim̧or ilo jetōb. Ikkure ko rekalimomo im rej kōkajoor rejimourur. Im n̄e kwomij ippān doon āinwōt juon kurup in rūm̧m̧ad ded, Armej ro Rekwojarjar retiljek, kwomaron̄ bar ekkatak n̄an kadedeļo̧k eļapļo̧k jen am̧ maron̄ make.
Eddōkļo̧k eo an Juon Make
Jemedwōj Ilan̄ im Jisōs Kraist rej lukkuun kea kake eok im kōn armej eo kwoj erom̧. Ilo am̧ kōm̧m̧ani kōttōbar ko n̄an eddōkļo̧k ilo juon armej eo Jemedwōj Ilan̄ ekōņaan bwe kwon erom̧, kwomaron̄ epaakļo̧k E im Nejin.
Kajjojo armij reoktak, kōn menin kōttōbar ko am̧ n̄an em̧m̧anļo̧k eo an juon make eaikuj in ekkar n̄an aikuj ko am̧. N̄an waanjon̄ok, eļan̄n̄e kwoj kōņaan ekkatak kōjan̄jan̄ al ilo piano eo, kwoj aikuj kōm̧m̧ane juon kōttōbar n̄an kamminene kajjojo raan. Eļan̄n̄e kwoj kōņaan em̧m̧anļo̧k ilo ekkatak jeje ko rekwojarjar, kwoj aikuj in karōk juon iien kajjojo raan n̄an riit. Pukot tōl eo an Jetōb n̄an pukot juon karōk me enaaj jejjet n̄an kwe.
Ajri im Jodikdik ro Ej n̄an KWE
Armej eo enaaj ļapļo̧k an jeraam̧m̧an ej kwe! Ilo am̧ karōk karōk ko am̧ make n̄an ekkatak im mour kake gospel in, bōk kūņam̧ ilo jerbal in jipan̄ im m̧akūtkūt ko, im eddōkļo̧k an juon make, kwonaaj jeļā eļapļo̧k kōn kwe make im wōn lukkuun kwe. Jerbal eo n̄an erom̧ juon rijilōk an Jisōs Kraist emaron̄ in pen, ak ej juon kōttōbar eo jemaron̄ in karōke n̄an kōj make.
Ruo sister bo Raar Likūt Ajri im Jodikdik ro n̄an Jerbal
Jodikdik ro āinwōt kwe raar jino lo kōjeraam̧m̧an ko n̄an kajjieon̄ jino āinwōt Jisōs Kraist ilo mour ko aer aolep raan. Danika im Natasha R., 15, jān Ohio, USA, rej bo sister ro raar pepe n̄an kōm̧m̧ane menini. Jemāer ej jān Thailand, im kōnke jet iien rej loļo̧k baam̧le eo ijeņ, Danika im Natasha raar pepe bwe rekōņaan ekkatak eļapļo̧k kōn m̧ōn̄ā in Thai im kajin eo.
Danika eaar kōm̧m̧an juon kōttōbar n̄an ekkatak kōmat iiōk juub in Thai. Eaar kakujkujji kein kāre ko im kar kamminene kilen kōmat ippān jemāer. Natasha eaar kōņaan jeļā kōm̧m̧ao ippān baam̧le eo an ilo Thailand, kōn menin eaar karōk juon kōttōbar n̄an ekkatak juon naan in Thai kajjojo raan. Eaar kōjerbal juon website n̄an jipan̄ e kajin eo ej ekkatake im kamminene ba naan ko ļo̧k n̄an jemen.
Ke Danika im Natasha raar jerbale kōttōbar eo aer, raar kōņaan kwaļo̧k ta eo raar ekkatak n̄an jiron̄ ro jet ilo ward eo aer. Ritōl ro aer raar jipan̄ er ejaaake juon m̧akūtkūt in ekkatak eļapļo̧k kōn Thailand. Ālkin m̧akūtkūt eo, Danika eaar kōmāt juub n̄an aolep ilo an Natasha katakin er jet naan in Thai.
Sister rein raar bar kobaiktok Grace eo m̧ōttaer n̄an m̧akūtkūt eo. Grace ewōr juon an make kōttōbar em̧m̧anļo̧k n̄an kōnono ilo lo̧bwilej; kōn menin eaar kwaļo̧k juon pojak eo kōn wāween kōjerbal nok ko bwe ren m̧ōn̄ā juub eo kijeer.
Jen kammineneik kōttōbar eo aer im jerbal ļo̧k ippān ritōl ro aer im jiron̄ ro jet, Danika im Natasha raar maron̄ peek juon jotaan eo elimo ippān ro m̧ōttaer.
Kōjeraam̧m̧an ko n̄an Bōk Koņaar ilo Ajri im Jodikdik ro
Danika im Natasha rej kwaļo̧k bwe raar bōk elōn̄ kōjeraam̧m̧an ko jen kajjieon̄ ekkatak eļapļo̧k kōn jolet eo aer im m̧ōņōņō ippān baam̧le eo aer im jiron̄ ro jet. En̄jake eo aer eaar itok kōn elōn̄ apan̄ ko. Natasha eaar ba, “Iaar pād ilo jikuuļ ke ij ekkatak Thai, kōn menin eaar jet iien pen n̄an elolo iien n̄an kōm̧m̧ane.” Danika eaar bar ba, “Ilo m̧akūtkūt eo, eaar wōr jidik aō make inepata n̄an kōm̧m̧ane juub eo n̄e baba ejjab pād ijo.” Ak sister rein raar jim̧or errā bwe ilo jem̧ļo̧kin, eaar wōr tokjeņ.
Danika eaar ba, ”Em̧m̧an ippa bwe iaar joļo̧k iiien ippān jema, im ekar jipan̄ eō epaake baam̧le eo aō.” Eaar bar ba, “kōm̧m̧an im pokake kōttōbar ko aō make ekar jipan̄ eō epaakeļo̧k Jisōs Kraist n̄an letok n̄an eō juon iaļ eo ealikkar n̄an jipan̄ eō make im ro jet. Ijeļo̧kin aepādpād bajjōk āinwōt bon̄on ko jet, iaar karōk juon kōttōbar n̄an ļoore im n̄an kōjparoke, im eaar letok n̄an eō eļapļo̧k iien n̄an ļōmņak kōn Kraist.”
Natasha eaar ba kōm̧m̧an im kōjaprok kōttōbar eo an, “ekōm̧m̧an bwe in lukkuun ļōmņak kōn ta eo ij aikuji im kōņaan n̄an erom̧ epaakļo̧k Kraist.” Eaar bar keememej bwe men̄e eaar ukōt jibadbad eo an n̄an juon kōttōbar ekāāl, kar im̧we e bwe en ekkatak wōt Thai: “Lukkuun kōttōbar eo ej n̄an ekkatak Thai bwe in maron̄ kōnono ippān baam̧le eo aō ilo Thailand, kōn menin ikōņaan ekkatak Thai bwe in kōnono ippāer.”
Danika im Natasha raar jo̧n̄o̧ke eddōkļo̧k eo aer make n̄an jipan̄ er ekkatak eļapļo̧k kōn manit eo an jemeer, limo ippān ro m̧ōttāer, im epaakeļo̧k baam̧le eo aer im Rilo̧mo̧o̧r—im en̄in ej ta eo Ajri im Jodikdik ro rej kōm̧m̧ane.
Am̧ bōk koņaam̧ ippān Ajri im Jodikdik ro emaron̄ bar jipan̄ eok kalōk jem̧jerā ko ippān baam̧le eo am̧, jodikdik ro jet im membōr in ward eo, im eļaptata Rilo̧mo̧o̧r ilo am̧ mije wōt n̄an erom̧ ijo em̧m̧antata ippam̧.