Juon Jepta Ekāāl im Kabwilōn̄lōn̄
Kōmeļeļe jān Carolyn Vibbert
Ikar kōjem̧ļo̧k juon jepta in mour eo aō ke ekar jako ļeo pāleeō ilo Oktoba 2010. Ilo tōre eo, ikar jerbal āinwōt juon rikaki ilo southern France. Ilo juon idin̄ ilo jikin jerbal ikar jab maron̄ makūtkūt, im ikar lukkun inepata bwe ekar jab mōkaj aō ājmour im kajoorļo̧k. Ikar lukkun m̧ōņōņō kōn juon nōbar ilo tijem̧ļo̧k in jerbal iumin 11 iiō. Iaar iakwe jerbal eo aō. Ekar lukkuun lōn̄ m̧ōtta. Ak ikar jab maron̄ tōpar aolep men ko remenin aikuj n̄an jerbal eo aō.
Ij aikuj kwaļo̧k m̧ool bwe, ālkin elōn̄ļo̧k jān 33 iiō aō mour kōn naan in malōtlōt, ikar bwilōn̄ etke ikar jab maron̄ “ettōr im jab mōk” ak “etetal im jab parōk” (lale Katak im Bujen ko 89:20). Āliktata, ekar mōkaj aō rittaer ilo aō kar jab kōtmene, ekar kōjem̧ļo̧k bar juon jepta in mour eo aō.
Ikar jokwe ippān leddik eo nejū ke ekar bōk juon enaan ke jerbal eo an ej kiiō nej kamakūti n̄an jikin eo ilo Paris. Ikar kāālōt bwe in etal ippān im jino juon jepta in mour ekāāl ilo juon jikin ekāāl.
Ejjab to jān tōre eo ij kab ittakļo̧k, kōm kar jimor bōk kūr n̄an jerbal ilo Paris France Tampeļ eo. Kūr eo aō n̄an jerbal ilo tampeļ ej lukkuun kallikkar tok bwe ikar pād ilo juon jikin eo ejejjet ilo juon iien eo ejejjet kōnke Irooj ekar bōktok eō n̄an ijin. Ikar lo eļap lan̄lōn̄ ilo aō kar jerbal ilo kajjojo iien ilo m̧weo imōn Irooj, im elukkun em̧m̧an n̄an bwebwenato kōn iien ko rem̧m̧an ilo tampeļ ippān leddik eo nejū. Ej kobrak buruō kōn lan̄lōn̄!
Rainin, ij lo eļap kōjeram̧m̧an me kar jinoin rekar jab alikkar kōn wōt en̄taan. Kōn an dikļo̧k aō makūtkūt, ikar jab maron̄ kōm̧m̧ane jerbal eo aō me itijem̧ļo̧k kake, im an mōkaj aō rittaer ekar lukkuun pen. Ak ijeļā bwe Irooj eo ad Jisōs Kraist ekar kotak eō. Ekar jipan̄ eō kōmeraik eō im letok kakkije, kōjatdikdik, im aeņōm̧m̧an me rej kiiō m̧ōttan ko reļļap ilo mour eo aō.
Aolep iien ij etetal ļo̧k n̄an kōjem̧ ko ilo tampeļ eo, ij en̄jake Jetōb Kwojarjar. Ilo iien ko reppen kōn eļap inepata kōn men ko an laļ in me jej eddodo kaki, eaibojooj n̄an jeļā bwe Irooj ekar letok jikin ko rekwojarjar ijo aolep men em̧ōj kōllaajraki im reaibojooj. Ij en̄jake eļap kam̧m̧olool kōn jepta in mour ekāāl n̄an jerbal ilo tampeļ ilo mour e aō. Ekabwilōn̄lōn̄!