Em̧m̧anļo̧k Jidik Kajjojo Raan
Jān Sister Joy D. Jones
Būreejtōn eo Eutiej an Būraimere
Ke iaar juon ajri, iaar kōjan̄jan̄ violin. Iaar lukkuun kōņaan bwe en aibojooj ainikien. Iaar kōņaan kōjan̄jan̄ n̄an jinō im jema bwe ren ba, “O, Joy, elukuun aibojooj!” Ak eaar jab em̧m̧an. Ebūlāāt!
Jet iien n̄e ijjab ekkatak, rikaki eo aō ej ba, “Joy, kwaar ke ekkatak wiik in?” Ekōm̧m̧an bwe in kōņaan kamminene bwe en em̧m̧anļo̧k aō ikkure wiik in tok.
Relikļo̧k, kōjan̄jan̄ violin eaar juon en̄jake em̧m̧an kōnke epen. Men̄e iaar jab ekkatak aolep iien, iaar kanooj jeļā kōn jeke juon kōttōbar n̄an kamminene em̧m̧anļo̧k jidik kajjojo raan.
En̄in ej ta eo ij kōjatdikdik kwonaaj kōm̧m̧ane. Kajjieon̄ kōm̧m̧an em̧m̧anļo̧k jidik kajjojo raan. Jemedwōj Ilan̄ ejjab kōtmene bwe kwon kōm̧m̧an aolep men ilo juon wōt iien. Mour in ej kōn ekkatak im eddōkļo̧k jidik kōn jidik. Ekōņaan bwe kwon wōnm̧anļo̧k wōt im kajjieon̄. Im Ekōņaan bwe kwon m̧ōņōņō ilo eddōkļo̧k eo.
Jet iien jej kappen e n̄an kōj make. Jej ļōmņak, “ilikjab. Ijjab maron̄ kōm̧m̧ane,” innām jej ebbweer. Ak Rilo̧mo̧o̧r ej ba, “Etal wōt. Ij pād ije n̄an jipan̄ eok!” Kōn Jisōs Kraist, jeban make iaad im kōm̧m̧ane. Jemaron̄ bar jutak im bar kajjieon̄ kōn jipan̄ eo An. En̄in ej ta unin mour in.
Eļan̄n̄e ewōr juon men ij kōtmene bwe kwon jeļā ilo būruwōm̧, en̄in bwe Jemedwōj Ilan̄ ej iakwe eok. Kwomaron̄ ioon men ko reppen, ak em̧ōj kepooj eok n̄an itok n̄an laļin ilo iien in. Baj kajjieon̄ wōt im kwaļo̧k am̧ romaak. Jemedwōj Ilan̄ enaaj kōjeraam̧m̧an eok im tōl eok ilo am̧ ļoor iaļan bujen eo.