Enaaj Ke Meļeļe?
Kōmeļeļe jān Allen Garns
Ilo 2005, ikar keotak jilu po ro me rejibikbik: Milena, Mateo, im Nelson. Milena em̧m̧an an mour ke ekar ļotak tok, ak po ro ruo rekar lukkuun en̄taan kōn nan̄inmej. Mateo ekar mej kōn nan̄inmej kein iumin jilu allōn̄ ālkin an kar ļotak.
Juon allōn̄ tokālik ke ej mej Mateo, Nelson ekar bōk juon kain nan̄inmej ilo kōmelij im jaron̄ron̄. Ekar lukkuun nana amim mour. Taktō ro rekar ba n̄an kōm ke eban maron̄ etetal. Ilo tōre eo, kōm kar kam̧m̧oolol kōn jeļāļo̧kjeņ eo am̧ kōn gospel eo an Jisōs Kraist. Ekar jipan̄ kōm meļeļe etke kōm kar jelmae apan̄ ilo mour in.
Kōn tōmak im kijejeto, Nelson ekar etetal im ekar maron̄ kōnono kōn sign language. Ekar ļap an em̧m̧anļo̧k jān an kar taktō ro kar kōtmene. Ekar rūttoļo̧k ilo an lem̧ōņōņō ippān baam̧le eo am im ilo gospel eo.
Jekdoon apan̄ ko an, ekar wōr jejjo amim kōttōpar n̄an Nelson: bwe en meļeļe ta in peptaij mokta jān an peptaij, bwe en bōk Priesthood eo an Aron n̄e 12 an iiō, im bwe en etal n̄an tampeļ n̄an kōm̧m̧ani peptaij ko n̄an ro remej.
Ilo 2017, Nelson ekar jejjet 12 an iiō. Kōm kar jipan̄ kōpooj e n̄an kōm̧m̧ani peptaij ko n̄an ro remej. Ekar juon idajon̄jon̄ n̄an e n̄an meļeļe bwe ro rekar mej ilo aer kar jab peptaij rej aikuj ad jipan̄. Ejjab to ālkin kemeem eo an Nelson, e, Milena im ro jet jein rerūtto Franco im Brenda, im jodikdik ro jet jān ward eo am rekar etal n̄an Córdoba Argentina Tampeļ. Tampeļ būreejtōn eo ekar karuwaineneik er im kōnono ippāer kōn aorōk in peptaij n̄an ro jet. Ikar jijjōt ippān Nelson im ikar jain n̄an e. Ejjab to, ekar itok n̄an iien eo an. Ke ekar juur lowaan jikin peptaij eo, kōm kar ļōm̧ņak, enaaj ke lukkuun meļeļe?
Ke ej delo̧n̄eļo̧k e dān eo, Nelson ekar jino jan̄. Ilo tōre eo, Jetōb Kwojarjar ekar kwaļo̧k n̄an kōm bwe ekar lukkuun meļeļe ilo m̧ool jon̄an ekar kōm̧m̧ane menin n̄an ro jibun eto me remej me rejjab maron̄ kōm̧m̧ane menin n̄an er make. Jekar jeļā im meļeļe bwe ro uwaan baam̧le eo ilo turājet in ran̄ōl eo rekar m̧ōņōņō bwe ekar jipan̄ er. Jetōb ekar bar kwaļo̧k n̄an kōm bwe Mateo ekar pād ijeņ n̄an kaarmej e ro jein im jatin. Ke Nelson ekar waļo̧ktok jān dān eo, ekar lukkuun m̧ōņōņō.
Jān tōre eo, Nelson ekar peptaij im kapen n̄an elōn̄ uwaan baam̧le eo, ekoba jema, eo ekar jako ilo 2016. Kōmij iakwe tampeļ eo. Jerbal ijeņ ekar erom̧ juon imenene eo eaorōk an baam̧le eo am. Kajjojo iien kōm ej etal, jej keememej raan eo me eaorōk.