Juon Joko inNaan in Kam̧ool
Kōmeļeļe jān Phil, i2iArt.com
Ilo kūlaaj ruatimjuon eo aō ilo high school, ro jinō im jema rekar jepel. Iumin iiō ko, ikar kajoor lale an jema jab bōk kwojkwoj. Ikar jeļā bwe epen an kōjparok kien ko, ak ikar jab meļeļe jon̄an ak aeitokan apan̄ ko an. Ekar ilo iien eo wōt me ro jinō im jema rekar jiron̄ eō kōn aer kar bukweļo̧k etan jān kabun̄ in ke kom̧ro sister eo ao kom̧ro ejkab lukkuun meļeļe unin.
“Idike eok!” Ikar lamōj im bar lamōj, im jan̄. Iaar kanooj illu. Ewi wāween an maron̄ kōm̧m̧ane menin n̄an baam̧le in ad? Ikar ļōmņak. Ewi wāween an maron̄ to an baj riab e kōj?
Jinion aō kar bwilōn̄ im illu ekar jab to an jem̧ļo̧k. Ilowaan wōt jejjo wiik ko, aō illu ekar kōm̧m̧an menin an mej ānbwinnū. Jinoin, mej ānbwinnū ekar kōmeraiki eō jān illu im metak ko me ikar en̄jaki, ak āliktata ekar oktak jān mera n̄an juon inepata eļap. Ikar en̄jake an ejjeļo̧k kōjatdikdik ilo mour eo aō. Eļapļo̧k jān kar jinoin, ikar aikuji n̄an en̄jake aō epaake ļo̧k lan̄. Ikar aikuj en̄jake iakwe eo an Anij, tōl, aeņōm̧m̧an, im kōmour.
Ejjab to, ekar jejjet iien kweilo̧k eo eļap. Ilo m̧wen̄an eo kein kajuon, ikar ron̄jake im ikar kōttar n̄an en̄jake kaeņōm̧m̧an an Anij. Ak ekar jab bōk jikin. Ijeņ ilo mōn jar en ke ej marok, ikar ļōmņak, ijjab maron̄ en̄jake Jetōb Kwojarjar, ak ilukkuun jeļā E epād ijin. E ej aikuj pād ijin. Ke ij ļōmņake menin, ikar jino keememej elōn̄ kam̧ool ko reddik me ikar loi bwe jeje ko rekwojarjar rem̧ool, bwe Josep Smith ekar juon rikanaan, bwe Jemedwōj Ilan̄ ekar kōjeram̧m̧an baam̧le eo aō, im bwe ilo ad kōjparok kien ko enaaj bōktok aeņōm̧m̧an. Ekar āinwōt n̄e ekar wōr juon aō joko in naan in kam̧ool.
Ilo aō antooneļo̧k kam̧ool ko aō ilo mour in jetōb moktaļo̧k, eļapļo̧k aō kile bwe men̄e ikar lukkuun kōņaan en̄jake Jetōb, ekar jab lukkun aorōk bwe in maron̄ en̄jake im̧we eo An ilo ejja iien eo wōt. Ikar obrak kadede kōn naan in kam̧ool ko me relur im remakijkij kōn gospel eo bwe em̧ool.
Jeļāļo̧kjeņ in ekar kōkajoor eō im letok n̄an eō ikdeleel n̄an wōnm̧aanļo̧k wōt im kōjparok kien ko an men̄e ejjab iien eo wōt kwoj bōk wōņeen. Āliktata, ikar en̄jake iakwe eo an Jemedwōj Ilan̄ im Rilo̧mo̧o̧r eļapļo̧k ilo mour eo aō. Pād wōt epaake Er, men̄e ijjab maron̄ en̄jake Aer Epaake eō aolep iien, ej bōktok n̄an eō juon aeņōm̧m̧an eo me ijjab maron̄ kariab e im juon naan in kam̧ool ekajoor kōn gospel eo an Rilo̧mo̧o̧r. Menin ej kōwōnm̧aanļo̧k n̄an im̧we eō kiiō n̄e ij jelmae pere ak buromōj. Ijeļā imaron̄ lōke Jemedwōj Ilan̄ im Rilo̧mo̧o̧r, im bwe Renaaj kōmour, kotak, im kōkajoor eō im kōj kajjojo.