Ngaahi Peesi Fakalotofonuá
Fanongonongo ʻe he Kau Palesitenisī ʻUluakí ha Liliu ki ha Fakataha ʻo e Konifelenisi Lahi ʻo ʻEpeleli 2020
ʻOku fakaafeʻi e kau Māʻoniʻoni taʻu 11 ki ʻolungá ki he fakataha ʻo e efiafi Tokonakí.
Naʻe fakatokanga ʻa Palesiteni Lāsolo M. Nalesoni ki he Kau Mā’oni’oni ʻo e Ngaahi ʻAho Kimui Ní ʻo māmaní ʻi he konifelenisi lahi ʻo ʻOkatopá “ʻe kehe [ʻa e konifelenisi lahi ʻo ʻEpeleli 2020] mei ha toe konifelenisi kimuʻa” koeʻuhí “ʻe fakamanatua ai e fakavaʻe moʻoni ʻo e ongoongolelei kuo fakafoki maí.” ʻOku fakamanatu ʻi he faʻahitaʻu failau ʻo e 2020 ʻa e taʻu 200 talu e ʻuluaki mamata ʻa Siosefa Sāmita ki he Tamaí mo e ʻAló, ʻa ia ʻoku ʻiloa ‘i he kāingalotu ʻo e Siasi ʻo Sīsū Kalaisi ʻo e Kau Mā’oni’oni ʻi he Ngaahi ʻAho Kimui Ní ko e ʻUluaki Mata Meʻa-Hā-Maí.
Naʻe fanongonongo ʻe Palesiteni Nalesoni mo hono ongo tokoni ʻi he Kau Palesitenisī ʻUluakí ʻe makehe e konifelenisi lahi ʻo ʻEpeleli 2020 ʻi ha founga ʻe taha: Ko e fakataha ʻo e efiafi Tokonakí ʻe kau mai ki ai e Kāingalotu kotoa ʻi he taʻu 11 ki ‘olungá.
ʻOku pehē ʻe he tohi mei he Kau Palesitenisī ʻUluakí, “ʻE ʻikai fakahoko e fakataha lahi ʻa e Lakanga Fakataulaʻeikí pe fakataha Lahi ʻa e Kakai Fefiné, ka ʻe fakahoko e fakataha ʻo e efiafi Tokonakí maʻá e mēmipa kotoa ʻo e Kau Finemuí mo e Fineʻofá, kau maʻu Lakanga Taulaʻeiki Faka-‘Eloné mo e Lakanga Taulaʻeiki Faka-Melekisēteki kotoa. ʻOku mau ʻamanaki atu ke fakamanatua fakataha mo e kāingalotu ʻo e Siasí e taʻu 200 ʻo hono Fakafoki mai ʻo e ongoongolelei ʻo Sīsū Kalaisí ʻi he konifelenisi fakahisitōlia ko ‘ení pea lolotonga e taʻu 2020 foki.”
ʻOku fakahoko maʻu pē e ngaahi konifelenisi lahi ʻo e Siasi ʻo Sīsū Kalaisí fakamāhina ono ʻi he ʻuluaki fakaʻosinga uike ʻo ʻEpeleli mo ʻOkatopá. ʻOku fakahoko ʻi he konifelenisi takitaha ha ngaahi malanga mo e hiva lolotonga e ngaahi fakataha ʻe nimá—tolu ʻi he ʻaho Tokonakí pea ua ʻi he Sāpaté.
Talu mei ʻEpeleli 2018, mo e fetongitongi e fakataha ʻo e efiafi Tokonakí ʻi he Fakataha ʻo e Lakanga Fakataulaʻeikí (ʻEpeleli) maʻá e maʻu lakanga fakataulaʻeikí ta’u 12 ki he taʻu motu’a ange kotoa mo e Fakataha ʻa e Kakai Fefiné (ʻOkatopa) maʻá é houʻeiki fafine kotoa ʻoku taʻu 8 ki taʻu motuʻa angé. Ko e ngaahi fakataha kehe ʻe faá (pongipongi Tokonakí, hoʻatā Tokonakí, pongipongi Sāpaté, hoʻatā Sāpaté) ʻoku maʻá e kāingalotu kotoa ʻo e Siasí pea mo kinautolu ʻoku mahuʻingaʻia ʻi he tuí ni.