Baam̧le N̄an Indeeo an Alonso
“Bwe tampeļ eo ej juon jikin ekwojarjar ijo jej liāp ippān doon” (Children’s Songbook, 95).
“Imaron̄ ke pād ippān M̧am̧a im Baba bar juon alen?”
“Ijtō ej juon iien em̧m̧an n̄an ļōmņak kōn Jisōs im n̄an keememej Jerkakpeje eo An,,” Sister Rojas ekar ba. Liin ekar kotak lōn̄ļo̧k juon pija in Jisōs. “Kōnke kōn E, armej ro raar mej remaron̄ bar mour.”
Alonso ekar reilōn̄ļo̧k ke rūkaki in Būraimere eo an ekar ba menin. Ej meļeļe in bwe imaron̄ lo ro jinō im jema bar juon alen? Alonso ekar ļōmņak.
M̧am̧a ekar mej iiō ko ļo̧k. Alonso ekar jab kanooj jeļā kajjien, bōtaab ekar kōņaan lali pija pijaan. Innām Baba ekar mej barāinwōt.
Kiiō Alonso ekar jokwe ippān Abuela, lelļap eo jibūn. Liin ekar katakin e kōn kabun̄ eo an, Kabun̄ eo an Jisōs Kraist im Armej ro Rekwojarjar ilo Raan-ko Āliktata. Ļein enaaj kar tōn peptaij im kapen iiō eo tok juon, n̄e en kar jejjōt an rūtto.
Innām Sister Rojas ekar kotak lōn̄lo̧k juon pija in juon em̧ emouj. “Bar juon menin letok ekabwilōn̄lōn̄ jān Jisōs ej tampeļ ko. En̄in ej juon iaan tampeļ ko ijin ilo Chile.”
Alonso ekar lale ekjab kooļ eo ioon tata m̧weo. Ekar aiboojoj! Ekar ļōmņak ta rej kōm̧m̧an ilowaan.
“Tampeļ ko rej ijo baam̧le ko rej liāp ippān doon n̄an indeeo,” Sister Rojas ekar ba. “Tampeļ in ilo Santiago ej ijo ikar liāp n̄an ro jinō im jema ālkin am kar kobatok ilo Kabun̄ in. Kōnke kōm kar liāp, imaron̄ in pād ippāer em̧ool ālkin mour in.”
Alonso ekar en̄jake lo̧udin̄din̄ ke ekar ron̄ men jab eo. “Imaron̄ ke liāp n̄an ro jinō im jema?” ekar kajjitōk. “Jekdo̧o̧n ta n̄e em̧ōj aer kar mej kadede?”
Sister Rojas ekar em̧ajidjid. “Aaet! En̄in ej juon iaan un ko tampeļ ko rej kanooj in aorōk. Rej kōjeraam̧m̧an aolep ro uwaan baam̧le eo am, ekoba ro me rekar mej.”
Ium̧win aolepān raan eo, Alonso ekar jab bōjrak an ļōmņak kōn tampeļ ko. Ekar kajjitōk ippān Abuela n̄an katakin e eļapļo̧k. Liin ekar kōnono kōn nuknuk mouj ko armej ro rej kōņaki itulowa im pija jin̄a ko raiboojooj itōrerein kiin m̧weo.
“Men eo em̧m̧an tata iaan aolep, ej ijo komaron̄ in liāp n̄an ro jinōm̧ im jemam̧,” Abuela ekar ba “Jenaaj kajjitōk ippān ruo armej ro jān ward eo n̄an pinrj jenkwaer ilo iien liāp eo.”
“Jemaron̄ ke etal ilju?” Alonso ekar kajjitōk. “Ikōņaan pād ippān M̧am̧a im Baba n̄an indeeo!”
Abuela eaar ettōn̄ dikdik. “Ij m̧ōņōņō kwoj kōņaan etal,” liin ekar ba. “Bōtaab tampeļ eo epaak tata ej ilo Concepción. Ejjab bwe ad jāān n̄an tikōt in baj ko.”
“Inaaj jipan̄ kakkoņ n̄an tūreep eo!” Alonso ekar ba.
Jān iien eo m̧aanļo̧k, jabdewōt iien Alonso ekar lo juon jāān dekā ioon iaļ eo ak ekar wōr an iien n̄an bōk jet jāān, ekar kōļļā juon m̧ōttan jon̄oul innām kar kobaiko̧k aolepān bwe eo n̄an jāān in tampeļ eo aer.
Ālkin allōn̄ ko in kakkoņ, āliktata ekar bwe an Alonso im Abuela jāān n̄an ilo̧k n̄an tampeļ eo. Raar kajjitōk ippān Brother im Sister Silva n̄an itok ippāer tok. Ilo raan eo in tūreep eo, raar iuwe ioon juon iaļ in baj eo aitok n̄an jikin kweilo̧k Concepción. Ekar enan̄in tulo̧k in aļ ke Alonso ekar lo juon men ekooļ ilo ettoļo̧k.
“Imaron̄ lo enjeļ Moronai!” Alonso ekar ba, jitōn̄ļo̧k ekjab eo ioon jabōn bōro̧o̧j eo ebūļu edoulul an tampeļ eo.
Raar joļo̧k juon bon̄ ilo juon abatmen iturinļo̧k tampeļ eo. Ilo jibbon̄ōn eo, Alonso ekar etal n̄an lowaan tampeļ eo ejkab kein kajuon. Eaar lo juon pija kileplep in Jisōs ilowaan. E im Abuela raar ekkōņak nuknuk mouj. Ekar en̄jake m̧ōņōņō im aenōm̧m̧an.
Ke ekar iien n̄an liāp, Alonso ekar etetalļo̧k n̄an lowaan juon ruum̧ aiboojoj kōn kūlaaj ko ilo kiin mweo ko. Juon rijerbal in tampeļ ekar kwaļo̧k n̄an Alonso, Abuela, im Silva ro ewi wāween bukwelōlō ipeļaakin juon tebōl āinjuon kar ņa etan lokatok. Ekar libobo ilo m̧ōttan nuknuk eo emeoeo.
Brother im Sister Silva raar pād ijo n̄an jinen im jemen Alonso. Abuela ekar pād ijo n̄an leddik eo jein eo ekar ļotak m̧okta jān Alonso.
Kiil māj ko mejān, Alonso ekar pijaikļo̧k an aolepān baam̧le eo an koba ippān doon.
Ikijooror in lo er bar juon alen, Alonso ekar ļōmņak. Ekanooj ļap aō kam̧m̧oolol kōn an baam̧le ko maron̄ koba ippān doon n̄an indeeo! ●
Pija ko jān Mark Jarman