Kabun̄ eo an Jisōs Kraist Em̧ōj an Jepļaaktok!

Mokta jen ad itok n̄an laļin, jaar mour ippān Jined im Jemed Ilan̄. Rej iakwe kōj! Jemedwōj Ilan̄ ewōr juon an karōk eaiboojoj n̄an kōj. Jenaaj itok n̄an laļin bwe jen maron̄ in bōk juon ānbwin im ekkatak im eddōkļo̧k. Innām jemaron̄ bar ro̧o̧l im mour ilo kapijuknen eo ad ilan̄. Ak jeban maron̄ kōm̧m̧ane ippād make. Jenaaj kar aikuj jipan̄.

Jemedwōj Ilan̄ eaar kālet ļaddik eo erūttotata jeid, Jisōs Kraist, bween itok n̄an laļ in n̄an jipan̄ kōj. Jisōs eaar kwaļo̧k n̄an kōj kilen iakwe ro jet n̄an ļoor kien ko an Jemedwōj Ilan̄. Jisōs eaar kālet jōn̄oulruo Rijilōk ro n̄an tōl Kabun̄ eo An.

Innām Jisōs eaar en̄taan kōn kōj ilo jikin Kallib Gethsemane. Eaar en̄jake aolep metak im būrom̧ōj. Eaar mej kōn kōj ioon dābweel. Kōn wōt menin, jemaron̄ jitļo̧k n̄an E n̄e jej metak ak būrom̧ōj ak aikuj jipan̄. Jemaron̄ ukweļo̧k n̄e jej kōm̧m̧an jabdewōt bōd.

Ilo raan eo kein kajilu ālkin an Jisōs mej, Eaar jerkakpeje. Jisōs eaar bar mour! Kōn wōt menin, jenaaj bar jerkakpeje. Jemaron̄ bar mour ilo lan̄ bar juon alen ālkin ad mej.

Ālkin An jerkakpeje, Jisōs eaar loļo̧k rijilōk ro An ilo Jerusalem im ilo Amedka. Eaar kajjitōk ippān Rijilōk ro An n̄an katakin armej ro kōn gospel eo An. Elōn̄ armej ro raar tōmak naan ko an Rijilōk ro im koba ļo̧k ilo Kabun̄ eo.

Ālkin an Rijilōk ro mej, armej ro raar jino meļo̧kļo̧k jet iaan m̧ōttan ko raorōk ilo gospel eo an Jisōs Kraist. Raar bōjrak aer tōmak bwe Jemedwōj Ilan̄ enaaj iien otemjej im̧we ro Nejin ioon laļin. Raar meļo̧kļo̧k bwe aolep ro ioon laļin enaaj wōr juon iien n̄an aer peptaij. Eaar bōjrak aer tōmak bwe rikanaan ro im rijilōk ro renaaj iien otemjej tōl Kabun̄ in.

Elōn̄ iiō raar eļļā. Āliktata, ekkar iien n̄an kōro̧o̧ltok m̧ōttan ko raorōk ilo gospel eo an Jisōs. Ekar iien n̄an kōjepļaaktok Kabun̄ in An! Jemedwōj Ilan̄ eaikuji juon bwe en juon rikanaan n̄an jipan̄ kōro̧o̧ltok n̄an laļin. Eaar kālet juon ļaddik jidikdik etan Josep Smith.

Juon raan, Joseph eaar riiti Baibōļ eo. Ilo Jemes 1:5, ej ba bwe Jemedwōj Ilan̄ enaaj uwaake kajjitōk ko ad n̄e jej kajjitōk ilo tōmak. Josep eaar wōr juon an kajjitōk! Eaar jeļā ekanooj lōn̄ kabun̄ ko me rej kwaļo̧k kōn Jisōs. Ak eaar kōņaan n̄an pukote eļan̄n̄e ekar wōr juon āinwōt Kabun̄ eo an Jisōs ilo Kallim̧ur Ekāāl.

Ilo juon jibbon̄ōn juon raan eaiboojoj epaake iien Ijtō, Josep eaar iļo̧k n̄an wōjke iturin m̧weeo im̧ōņ. Eaar bukwelōlō im jino jar. Innām Josep ear en̄jake marok jilōn̄lōn̄. Setan ekar kajjieon̄ kabweer e. Ak Josep eaar jar kōn aolepen an kajoor.

Innām juon meram eaiboojoj eaar wanlaļtak. Josep eaar lo Jemedwōj Ilan̄ im Jisōs Kraist. Menin ņaetan Visōn eo M̧oktata. Raar ba bwe Kabun̄ eo an Jisōs ejako ioon laļin. Ak enaaj bar pād ejjab to jān kiiō. Jepļaaktok eo ekar jinoe!

Jemedwōj Ilan̄ eaar jilkintok enjeļ ro n̄an kōjepļaaktok m̧ōttan ko raorōk an gospel in. Enjeļ Moronai eaar leļo̧k n̄an Josep pilej gold ko bwe jen maron̄ bōk Bok in Mormon n̄an jipan̄ kōj jeļā kōn Jisōs Kraist.

Jon Ripeptaij eaar bar kōro̧o̧ltok Priesthood eo an Aron bwe jen maron̄ in peptaij. Piter, Jemes, im Jon raar kōro̧o̧ltok Priesthood eo an Melkisedek bwe jen maron̄ bōk Jetōb Kwojarjar im bōk kōjeraam̧m̧an ko n̄e jej nan̄inmej.

Elija eaar itok bwe jen maron̄ liāpe baam̧le ko ad ilo tampeļ eo.

Kabun̄ eo an Jisōs Kraist im Armej Ro Rekwojarjar Ilo Raan Ko Āliktata eaar ejaak. Meļeļein bwe Kabun̄ eo an Jisōs Kraist em̧ōj an bar ro̧o̧ltok n̄an laļin. Aolep men kein rej m̧ōttan Jepļaaktok eo.

Jepļaaktok eo an gospel eo ej wōnm̧aanļo̧k wōt rainin. Rikanaan ro, rijilōk ro, mijenede ro im membōr ro ro rej kwaļo̧k naan eo em̧m̧an kōn Jisōs Kraist ilo aolepen laļin. Tampeļ ko kar kalōki ilo elōn̄ laļ ko bwe armej ro ren maron̄ liāp n̄an baam̧le ko aer indeeo. Im bwe Kabun̄ in ej jipan̄ armej ro ilo jikin ko ijo ewōr kwole ak jorrāān ie.

Aolep remaron̄ kōm̧m̧an jabdewōt n̄an jipan̄ ilo Jepļaaktok in. Komaron̄ jipan̄ n̄an jeļā kōn menmenbwij an baam̧le eo am̧ im kōm̧m̧ani peptaij ko ilo tampeļ. Komaron̄ leļo̧k juon m̧ōttan jon̄oul n̄an kalōk kabun̄ ko im tampeļ ko. Komaron̄ leļo̧k jitlo̧k im jortak ko n̄an jipan̄ armej ro ilo aikuj. Komaron̄ ba n̄an armej ro kōn Jisōs Kraist.

Jisōs eaar letok n̄an kōj Kabun̄ in An n̄an jipan̄ kōj ro̧o̧lļo̧k n̄an m̧weo im̧ōd ilan̄. Jemaron̄ bōk kwojkwoj eo im iien otemjej keememej ta eo Ekar kōm̧m̧ane n̄an kōj. Jemaron̄ kwaļo̧k iakwe n̄an ro jet, āinwōt An kar kōm̧m̧ane. Jemaron̄ jipan̄ aolep jeļā kōn gospel in An! ●

Kōmeļeļe ko jān Apryl Stott