Bōk Tōmak eo Aō kōn Juon Bun̄tōn ilo juon Iien
Bōk juon naan in kam̧ool ebōk iien. Ekkā an bōk kobain iminene ko reddik.
Juon iaan iien ko raorōk ilo mour eo aō me ekar waļo̧k n̄an eō ke ekar 10 aō iiō ke ikar joļo̧k ruo wiik in ekkatak katak ko an Catholic ilo Loreto Roman Catholic Mission, tarrin 20 m̧aeļ (32 km)ettoļo̧k jān m̧weo im̧ōn ilo jikin ko ejeja armej ie ilo Silobela, Zimbabwe. Ikar itok n̄an aō jeļā im iakwe Rilo̧mo̧o̧r Jisōs Kraist im n̄an pedped wōt ioon Irooj kōn katak im im̧we kein kar jinoin.
Ke ikar pād ilo m̧ōn jar eo an Catholic, ikar lo uno jin̄n̄a ko kōn pijaan mour eo an Rilo̧mo̧o̧r rekar pād ilo dipin m̧ōn jar eo: pijaan ļotak eo an Jisōs Kraist, an katakin ilo tampeļ, jar ilo Jikin Kallip Getsemane, ineek debwāāl eo n̄an Calvary, toto ilo debwāāle ilo Golgotha, im Jerkakpeje eo An. Ekar kōm̧m̧an aō en̄jake buromōj ke ij lo dila im lōklōk ko. Ke ij tōparļo̧k pijaan Debwāāl eo, meja ekar obrak kōn dān in kōm̧jaļaaļ. Im kajjojo iien ikkein jan̄ im ba, “A, Ekar lukkuun ioon men ko reļļap, kōn wōt n̄a.”
Ilo iien kapen eo, juon iaan pris ro rekar reitok n̄an meja im ba, “Kom̧ meram in laļ” (lale Matu 5:14). Innem, jitōn̄ļo̧k juon kāāntōļ ej uruur, ekar kouti naan ko an Rilo̧mo̧o̧r: “Āindein en romaak ami meram im̧aan mejān armej, bwe ren lo ami jerbal ko rem̧m̧an, im nōbar Jemami i lan̄” (Matu 5:16).
Ilo aō kar ekkatak eļapļo̧k kōn Jisōs, ikar jino kōņaan bwe in jerbal in jipan̄ n̄an ro jet. N̄an waanjon̄ak, kōm kar aikuj itōk dān ļalem m̧aeļ (8 km) ettoļo̧k jān weto eo jej pād ie. Ekkā, kōrā ro ilo weto eo, ekoba jinō, rekkein ineek 20-lita in kanteinņōr ilo bōraer me eobrak kōn dān. Ālkin en̄jake eo aō ilo iien jikuul in baibōļ ilo Catholic, ekkā aō būlli 200-lita kanteinņōr in dān n̄an jipan̄ jinō, im ikar barāinwōt jipan̄ ruo armej ro ejako pāleer me rekar jet ro rūtūrim. Ikar kemeemej en̄jake eo em̧m̧an ikar en̄jake kajjojo iien ko ikar jipan̄ ro jet.
En̄jake kein rekar jipan̄ kaddōkļo̧k tōmak eo aō ilo Jemedwōj Ilan̄ im Jisōs Kraist im ekar āliktata kōpooj eō n̄an bōk gospel eo an Jisōs Kraist ke ekar 22 aō iiō.
Bōk Bok in Mormon
Ikar rūttoļo̧k ilo juon tōre in oktak eļap ilo laļ eo aō. White-minority kar tōl jān Ian Smith eo ekar kwaļo̧k ke rejeņoļo̧k kiiō jān Britain ilo 1965. Menin ekar kōm̧m̧akūt United Nations n̄an kabōjrak jerbal in jānij m̧weik im ekar ijjino iiō in pata ko ikōtaan armej ro ilo laļ eo m̧ae 1980 ekar jem̧ļo̧k, eo me ekar kajjejjet jenoļo̧k eo an Zimbabwe bwe ren jutak ilo neer make. Ke ej dedeļo̧k aō jikuuļ, ikar em̧m̧akūt n̄an juon jikin n̄an jerbal im ikar jab pād ilo jabdewōt m̧ōnjar ium̧win jejjo iiō.
Juon raan ikar ikkure ippān ļaddik ro nejin bo̧o̧j eo aō. Er rekar ruatimjuon im jiljimjuon aer iiō. Rekar ba, “Kwojeļā bwe jōmam̧ro ej juon branch būreejtōn ilo M̧ōn Jar eo am.” Rej kōmeļeļeik wōn eo branch būreejtōn im, ilo aō jab ļōmņak kake, ikar ba, “Jemam̧ eban etal n̄an lan̄.” Ij kile bwe ikar kōm̧m̧an juon bōd kileplep, im ikar ļōmņak ilo akweļap kōn ta imaron̄ kar ba n̄an er n̄an kōm̧m̧an bwe ren meļo̧kļo̧k naan ko aō. Ilo jem̧ļo̧kin raan eo, ke rej lo jemāer, rekar ettōrļo̧k n̄an e im āliji ta eo ikar ba. Ikar ļōmņak bwe inaaj kar luuji jerbal eo aō.
Bo̧o̧j eo aō kar m̧okta ekar kwaļo̧k n̄an eō juon jāākit jān ke ekar pād ilo military eo me ekar kwaļo̧k ke ekar m̧anm̧an armej. Unin aō kar ba ta eo ikar ba. Ilo juon wāween eo elukkuun lur, ekar kajjitōk ippa etke ikar ba men eo. Ikar ba, “Bo̧o̧j, kemeemej, kwar ba n̄an n̄a bwe kwar m̧anm̧an ilo tariņae. Ilo Baibōļ eo ej ba, “Jab uroor.”
Ekar kajjitōk ippa ewi wōt kabun̄ eo ij jar ie. Ikar ba n̄an e bwe ikkein pād ilo kabun̄ eo an Catholic ak ijjan̄in bar etal ium̧win jiljilimjuon iiō. Ekar kwaļo̧k en̄jake ko ilo Kallim̧ur M̧okta kōn tariņae im poktak ko, innem ekar leļo̧k n̄an e juon kape in Bok in Mormon. Ikar lukkuun m̧ōņōņō bwe ikar jab luuji jerbal eo aō.
Ekar letok n̄an n̄a Bok in Mormon ilo 1981, ak ikar jab riiti ak maron̄ kōpeļļo̧ke ium̧win ruo iiō. Juon Jabōt ikar boriin̄ ke ro m̧ōtta rekar ekkāke, kōn menin ikar bōk bok eo im etal n̄an juon jikin kōttar tōrāāin epaake im riit. Ke ikar riit ilo raan eo, ikar en̄jake im̧we n̄an kōm̧m̧ani men ko rem̧m̧an, ak ta eo ekar lukkuun un̄ūr eō tokālik ilo aō riiti 3 Nipai 11. Ij riit kōn RiNipai ro rekar mour wōt ro me rekar itok ilo tariņae im iien ko reppen, innem Rilo̧mo̧o̧r ekar waļo̧k n̄an er.
Laļ eo aō ekar bar jelm̧ae pata ium̧win 15 iiō ko. Jet iaan armej ro ikar rūttoļo̧k ippāer ilo weto eo aō rekar etal n̄an pata eo im rekar jab maron̄ anjo̧. Ro jet rekar wūtamwe ilo ānbwin ilo aolepān mour eo aer.
Kōn menin, ke ikar riit kōn RiNipai ro, ikar en̄jake āinwōt n̄e Rilo̧mo̧o̧r Jisōs Kraist ekar jipan̄ eō ke Ekar ba, “Kom̧in jutak im wōnm̧aanļo̧k n̄an Ippa, bwe kom̧in maron̄ …en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a ij Anij in Israel im Anij an aolepān laļ im kar m̧ane Eō kōn jero̧wiwi ko an laļ” (3 Nipai 11:14).
Ikar en̄jake āinwōt n̄e E ekar lo̧mo̧o̧ren eō ilo m̧ool, karuwaineneik eō n̄an itok n̄an E Ikar kile bwe imaron̄ kōm̧m̧ane menin. Ekar ukot aolep men.
Bōk Tōmak eo Aō
Ekar bōk jejjo allōn̄ n̄an peran n̄an etal im jar. Ikar jeļā ijo kabun̄ eo ekar pād ie, ak ekar ejjeļo̧k mijinede ilo branch jidikdik eo am. Ilo Pāpode 1984, ikar etetal laļļo̧k n̄an m̧ōn jar eo ilo Kwekwe. Ikar kōņaan bar etetal laļ im jepļaak. Ikar jab lukkuun jeļā n̄e iruwainene im ikar jijet ilo lik, bojak n̄an ekairiir im ro̧o̧l. Ālkin jar in kōpeļļo̧k ko, branch būreejtōn eo, Mike Allen, ekar kwaļo̧k an naan in kam̧ool kōn Rilo̧mo̧o̧r Jisōs Kraist im Bok in Mormon. Ikar en̄jake an jejjet n̄an n̄a. Armej eo tok juon ekar kwaļo̧k an naan in kam̧ool kōn Rilo̧mo̧o̧r im Bok in Mormon, im barāinwōt armej eo kein kajilu. Ikar lukkuun em̧ōņōņō. Ikar jab lukkuun peran n̄an etal n̄an lokatok eo, kōn menin ikar jutak wōt ijo ikar pād ie im ba, “Ij iakwe Jisōs. N̄aij riiti Bok in Mormon.” Im ikar jijet laļļo̧k. Kar jino in an kar ejaake naan in kam̧ool eo aō.
Naan in kam̧ool ko rekar wāween eo Irooj ekar tōpar eō im jipan̄ eō kōnke ekar jipan̄ eō en̄jake bwe ikar ruwainene ijeņ. Ikar en̄jake bwe er ro rej jeiū im jatū. Ilo raan ko ikar jar kōn er im bwe ren kile eō. Ikar ioon membōr ro ijeņ ro rekar lukkuun jouj im rekar jipan̄ eō.
Elōn̄ men ko rekar waļo̧k ilo raan eo ke ikar etetal laļļo̧k n̄an m̧ōn jar eo. Ikar ļōmņak ta eo enaaj kar waļo̧k eļan̄n̄e membōr ro rekar jab kwaļo̧k naan in kam̧ool eo aer. Koban jeļā eļan̄n̄e elōn̄ juon armej eo ej apan̄ ilo mour eo an. N̄e kwoj jutak im ba ta eo kwoj en̄jake, emaron̄ lukkuun jejjet n̄an ta eo armej eo ej aikuj ron̄.
Kōmakijkij am̧ kwaļo̧k naan in kam̧ool eo am̧. N̄e kwoj kōm̧m̧ane, kwoj kōkajoorļo̧k kwe make im ro jet ipeļaakūm̧. Kwon juon waanjon̄ak kōn ta eo kwojeļā. Ilo am̧ ļoor kapilōk eo jān Bok in Mormon, kwonaaj epaakeļo̧k Rilo̧mo̧o̧r.
Epaakeļo̧k Rilo̧mo̧o̧r
Iien eo ikar joļo̧k ilo Loreto Roman Catholic Mission ekar jinoin iaļ eo aō n̄an erom̧ juon rikaļoor an Rilo̧mo̧o̧r Jisōs Kraist. Jān tōre eo ikar ekkatak bwe erom̧ juon rikaļoor ej juon jerbal im jej aikuj n̄an bun̄ m̧aanļo̧k jekdo̧o̧n mōjņo im maron̄ ko ad. N̄e jej kaorōk kūr eo: “Innām kom̧ naaj weepān āinwōt Jememwōj i lan̄ E weepān” (Matu 5:48), jenaaj wōnm̧aanļo̧k wōt n̄an mour indeeo “lain ioon lain, kain̄i ioon kain̄i” (lale Katak im Bujen Ko 98:12).
Jejeļā bwe en̄jake ko ad ilo mour in eban pidodo aolep iien, im jenaaj en̄jake jet men ko reppen im rub in bōro ilo aer wōnm̧aanļo̧k, ak kōjatdikdik ilo Irooj ej wāween eo n̄an lo aeņōm̧m̧an ilo mour ko ad.
Pinmuur eo an Rilo̧mo̧o̧r Jisōs Kraist ej juon men eo eaorōk tata ippa. Ijeļā bwe Rilo̧mo̧o̧r ej kōttōpar n̄an jipan̄ kōj. Jej aikuj reiļo̧k n̄an e, ļoor E, im kōttōpar n̄an kōketak ro jet ilo An pukot kōj n̄an kōketak kōj.
Ikar ekkatak bwe erom̧ juon rikaļoor ej juon jerbal im jej aikuji n̄an bun̄ m̧aanļo̧k wōt.
Kōmeļeļe ko jān Greg Newbold