Ilo Digital Wōt: Rūm̧m̧an Ded ro
Kalōk Aelōn̄ in Kiin̄ eo ilo New Caledonia
Rūm̧m̧an ded ro ilo New Caledonia im aolepān peļaakin laļ in rej bōk kūr eo n̄an jerbal n̄an erom ritōl ro ilo Kabun̄ in.
“Iien eo em̧m̧an n̄an jerbal ej juon iaan kōjeraam̧m̧an ko reļļap an uwaan Kabun̄ in.”1 Āinwōt juon rūm̧m̧an ded, jerbal ilo Kabun̄ in emaron̄ in juon iien ekalimomo em̧m̧an n̄an eddōkļo̧k, tōl, im kōkajoorļo̧k mour in jetōb eo am̧. Bōtaab kōn aolep eddo ko jet rej itok ippān rūm̧m̧an ded, jerbal emaron̄ in jet iien kapan̄pan̄—eļap tata ilo eria ko ijo Kabun̄ in ebwe an dik ie. N̄an waanjon̄ok, ta eo kwoj kōm̧m̧ane n̄e kar kūr eok n̄an juon būreejtōn n̄an Doulul eo an Jiron̄ ro ilo stake, kwoj kajjieon̄ in kōppopo n̄an jerbale juon mijen im kwoj barāinwōt pād ilo college im jipan̄ lolorjake institute, im oo aaet, 21 wōt am iiō?
N̄an elōn̄ eria ko an Kabun̄ in, menin ejjab juon imminene ekāāl. Ilo New Caledonia, juon teretore ilo lo̧jet ko an France kōn emaron̄ 2,400 ro uwaan Kabun̄ in, rūm̧m̧an ded membōr ro emakijkij aer kar leļo̧k jet eddo ko ebwe aer eļļap ilo kalōk aelōn̄ in kiin̄ eo an Irooj. Būreejtōn Russell M. Nelson juon iien eaar ba n̄an rūm̧m̧an ded ro,: “Komij ritōl ro an Kabun̄ in an Irooj ilju im jeklaaj! Kopojak ke n̄an bōk eddo eo an ritōl?”2 Kōnke ej menin aikuj im kōnke kōn iakwe eo aer n̄an Rilo̧mo̧o̧r eo, rūm̧m̧an ded ro ipeļaakin laļ in rej pojak n̄an jerbal im tōl ilo Kabun̄ in.
Ilo Jerbal in Jipan̄ eo An n̄an Mour
N̄an elōn̄ rūm̧m̧an ded in New Caledonia ro, mijen ko aer rejipan̄ er n̄an juon jerbal in jipan̄ an Kabun̄ in to̧o̧n wōt aer mour. Syoelanne (Syo) Ulivaka ekar bōk juon kūr n̄an jerbal āinwōt rikakpilōklōk eo kein karuo ilo bisoprik eo juon wōt wiik ālkin kōtlo̧ke jān mijen eo jerbal aolep raan. Syo ej ba, “ij kab kadedeļo̧k mijen eo aō.” “Ikar m̧ōk, im ikar ba n̄an n̄a make, kiiō ij tin kakkūje.” Ak ekar ebbōk wōt kūr. “Ikar kile ke inaaj ilo̧k ijo Irooj ekōņaan bwe in ilo̧k ie ļo̧k. Ij pād ilo jerbal in An—ejjab kōn ruo iiō, ak n̄an mej.”
Kōnke kōn an kar jerbal ilo bisoprik eo, Syo kiiō em̧ōj an kar m̧are, ewōr juon nejin, im em̧ōj an etal n̄an bar juon ward. Ak ej jerbal wōt n̄an kakūrm̧ool kūr ko an ilo Kabun̄ in.
Elder Earl C. Tingey, juon emeritus Jiljilimjuon̄oul Riutiej an Kabun̄ in, ekar ba n̄an rūm̧m̧an ded ro: “Juon kūr ilo Kabun̄ in ej juon iaan kōjeraam̧m̧an ko rem̧m̧an komaron̄ m̧ōņōņō kake ilo mour in. Ekanooj lōn̄ ijo kwoj aikuj jipan̄ ie n̄an ward ak branch eo ijo kwoj jokwe ie. Tōļan ko im kapeel ko ami rej menin aikuj n̄an eddōkļo̧k eo an Kabun̄ in.”3 Syo ekar jab wōt juon rūm̧m̧an ded ioon āne eo me kapeel ko kar likūt ilo jerbal n̄an jipan̄ eddōkļo̧k eo an Kabun̄ in— Syo eaar ba, “Kōmij kajjieon̄ kōro̧o̧ltok men ko kōm kar ekkatak ilo mijen ko am n̄an kōkajoorļo̧k stake im ward ko am.” Rūm̧m̧an ded rein rej kōm̧m̧an eļap kaarmejete n̄an maron̄ kōkajoorļo̧k aelōn̄ in kiin̄ eo ilo laļ eo aer make, ak āinwōt ennaan ko an Syo, “ta eo kōmij kaarmejete eļap tata ej iien eo am.”
Jet rūm̧m̧an ded ro ewōr ruo ak em̧ool jilu aer kūr. “Emaron̄ in juon kōjeraam̧m̧an n̄an er, ak emaron̄ in barāinwōt eddo,” Syo eaar ba, elōn̄ rūm̧m̧an ded ro rej apan̄ n̄an kōjeppan wōt juon aikuj ko an rūm̧m̧an ded ippān eddo ko aer ilo Kabun̄ in. “Epen n̄an kōm̧m̧ane aolep men ilo juon wōt iien.” Ak Syo eaar lo bwe ilo an likūt Irooj m̧oktata, epidodo an kar men ko jet dededļo̧k. Eaar ba, “Irooj eaar jipan̄ ilo elōn̄ men ko—jikuuļ, lo juon karejera—aolep men rekar pād ilo pein Irooj.”
Ilju eo an Kabun̄ in
Rikanaan ro im rijilōk ro ewōr ļōmņak ko kōn maron̄ ko im jerbal in jipan̄ ko me ro rūm̧m̧an ded ro remaron̄ jipan̄ Kabun̄ in kake: “Jej aikuji aolepān būruōm im am̧. Jej aikuji ro remourur, ro rebolel, rūm̧m̧an ded ro rejeļā ron̄jake im uwaak n̄an unojdikdik ko an Jetōb Kwojarjar.”4
Rūm̧m̧an ded ro ilo New Caledonia im aolepān peļaakin laļ in rej bōk kūr in kanaan in. Rej kile bwe rej ilju im jeklaj eo an Kabun̄ in, im rej kālet n̄an jerbal ilo jabdewōt remaron̄e. Rej rōjan̄ doon ilo kūr ko aer. Rej jerbal ippān Mijinede ro Rej kwaļo̧k gospel in im karuwaineneik tok ro m̧ōttaer n̄an jar. Rej leļo̧k kapilōk n̄an jodikdik ro ilo ward ko aer n̄an lōn̄aj er n̄an jerbale juon mijen. Rej etal ettoļo̧k n̄an pād ilo tampeļ. Rej katakin ro rejjab membōr ilo baam̧le ko aer. Ilo aolep kijejeto kein rej kalōk aelōn̄ in kiin̄ eo.
Syo eaar kile bwe, n̄e ej iien n̄an jerbal n̄an Irooj, “Jej kein jerbal ko ilo Pein.” Ilo iien kein an eddōkļo̧k eo an Kabun̄ in, Irooj enaaj kūr ioon Armej ro Rekwojarjar an aolep tōre ko, ijoko jabdewōt, n̄an bōk eddo ko n̄an kalōk im kōkajoorļo̧k aelōn̄ in kiin̄ eo An. Jepojak ke n̄an uwaak kūr eo?