Kōkajoorļo̧k Ami Tōmak kōn Visōn eo M̧OKTATA
Ij jar bwe kwonaaj ļoor jon̄ok eo an Josep ilo jar, jeļā kōn m̧ool ko eaar jeļā, n̄an kōkajoorļo̧k tōmak eo am̧ ilo Jemedwōj Ilan̄ im ilo Nejin, Jisōs Kraist.
Ke iaar 16 iiō detta, iaar em̧akūt jen kapijuknen eo aō ilo Idaho n̄an juon kweilo̧k ilo East Coast ilo United States, kobain ļaddik ro im jiron̄ ro jān 50 laļ ko epaake 40 laļ ko. Mokta ļo̧k, Iaar pād ilo juon jekjek ijo tōmak im bōklekōt ko aō raar kōjeno̧ļo̧k eō.
Ilo juon jota ilo juon iien jab jeļā kake, juon ekōnono kar walōn̄tak kake kōn tōmak ko im imminene ko an Kabun̄ eo an Jisōs Kraist im Armej ro Rekwojarjar ilo Raan-Ko Āliktata. Juon jarlepju in rijikuuļ ro rekar m̧ōkaj im kalimjōk eō im jino aer kajjitōk kajjitōk ko, jet iaer raar pen ilo tōmak ko ad.
Raar kabwilōn̄ eō. Ak ālkin aō kōļmenļo̧kjeņ jidik, iaar jino in kwaļo̧k jejjo pedped in tōmak ko repidodo. Iaar kōmeļeļeik bwe ewōr juon Jemedwōj Ilan̄, bwe jej ļaddik im jiron̄ ro Nejin, im bwe jej pād ioon laļ in n̄an kōļapļo̧k tōmak ilo Jisōs Kraist im n̄an kōkm̧anm̧anļo̧k kōj jān ad kālet em̧m̧an jen nana.
Kwaļo̧k pedped kein eaar tōlļo̧k eō n̄an naan in kam̧ool eo an Josep Smith. Rijikuuļ ro jet raar jab kajjitōk kōn Josep Smith, ak iaar kile ippa make n̄an kwaļo̧k etke ij tōmak men ko ij tōmaki. Ke ij kwaļo̧k kōn waļo̧k ļo̧k eo an Jemed im Nejin ilo Wōjke eo Ekwojarjar, em̧ōkaj an aolep ikun̄. Juon en̄jake ekajoor ekwojarjar eaar deļo̧n̄etok ruum̧ eo, im juon jetōbin en̄jake ekajoor eaar pād ioō im naan ko aō.
Ālkin wōt, jet rijikuuļ raar kam̧m̧oolol eō kōn kam̧ool eo aō ekajoor. Jet raar kajjitōk eļapļo̧k meļeļe kōn Kabun̄ in. Ke iaar ro̧o̧l n̄an ruum̧ eo aō joteen eo, iaar kile bwe armej eo en̄jake in eaar lukkuun jelete ej n̄a. Iaar en̄jake ippa make kajoor eo n̄an kwaļo̧k naan in kam̧ool eo kōn Anij Jemed, Jisōs Kraist, im Visōn eo Moktata.
Jen en̄jake in emootļo̧k 50 iiō ko remootļo̧k, em̧ōj aō kam̧ool bukwi alen kōn Jemed, Nejin, im Rikanaan Josep Smith. Ilo en̄jake kein, em̧ōj aō en̄jake kapen in kam̧ool eo an Jetōb Kwojarjar.
Ikōņaan kwaļo̧k 5 pedped in katak ko iaar jeļā jān jetōbin meļeļe eo aō make kōn Visōn eo Moktata. Pedped in katak kein raar kōkajoor tōmak eo aō kaki im ikideelel eo aō n̄an ļoor Jemedwōj Ilan̄ im Nejin Jitenbōro. Ij kōjatdikdik renaaj bar kōkajoorļo̧k eok.
1. Jemed, Nejin, im Jetōb Kwojarjar Rej Lukkuun Armej ro Reoktak jen Doon
Bukwi iiō ko, rimāletlet in kabun̄ ko im rijeje ro raar aitwerōk kōn piktokin Anij Jemed, Jisōs Kraist, im Jetōb Kwojarjar. Elōn̄ raar tōmak Rej juon wōt armej. Kōn en̄jake eo an Josep ilo Bwilōn̄ Wōjke Ekwojarjar 200 iiō ko remootļo̧k, jej jeļā lukkuun m̧ool eo kōn piktokin Anij.
Moktata, Ej mour! Kein karuo, Jemed im Nejin rej ruo armej ro reoktak jen doon, raiboojoj, armej ro jerkakpeje, reoktak jen doon. Tokālik, Josep eaar jeļā bwe “Jetōb Kwōjarjar ejjeļo̧k ānbwinnin kanniōk im di, a ej juon ānbwinnin Jetōb. Eļan̄n̄e en kar jab āindein, Jetōb Kwojarjar eo en kar jab maron̄ deļo̧n̄ ilo kōj” (Katak im Bujen Ko 130:22).
2. Kōj jej ļaddik im leddik ro nejin Anij
Kōn Visōn eo Moktata im en̄jake ko jet, Rikanaan Josep Smith eaar jeļā bwe Anij ejjab kar baj kajoor eo eaar kōm̧anm̧an laļ im men ko ilowaan innām meļo̧kļo̧ki. Ilo m̧ool, kōj kajjojo jej “juon jiron̄ [ak ļaddik] nejin jined im jemed ilan̄.”1
Kean̄ eo an baam̧le ej ba: “Aolep armej otemjej—em̧m̧aan im kōrā—kar kōm̧anm̧an ilo nememein wōt Anij. Kajjojo ej juōn jetōb jitōnbōro ļaddik im jiron̄ nejin jined im jemed ilan̄, im, ilo āinwōt, kajjojo ewōr juōn mour kwojarjar im jipadpad ippān.”2 Jemed eaar kean̄ bwe jibadbad eo: “En̄iin ej jerbal eo Aō—n̄an kakūrm̧ool jab wabanban im mour indeeo an armej” (Moses 1:39).
Kadkad ej ilo Anij, im jej pād ioon laļin n̄an erom̧ eļapļo̧k āinwōt E. Meļeļe jān Visōn eo Moktata ekōm̧m̧an bwe in āinwōt juon ļaddik n̄an jeļā bwe ewōr make Jemedwōj Ilan̄ eo ej iakwe eō im kōņaan bwe in ro̧o̧lļo̧k n̄an E.
3. Jemaron̄ Jeo̧rļo̧k Ad Bōd
Juon iaan n̄ūrbōktak ko reļļap an Josep ekar n̄an jeo̧rļo̧k jerawiwi ko an. Ilo juon bwebwenato kōn Visōn eo Moktata, Irooj eaar kōnono kōn eo edik an pukot m̧ool eo kōn naan kein: “Joseph, neju, jerawiwi ko am̧ rejako. Ilo̧k, etetal im̧aaō, im kōjparok kien ko aō. Lo, N̄a Irooj in aiboojoj. Iaar dōbwāāl kōn laļ, bwe aolep ro rej tōmak ilo eta maron̄ bōk mour indeeo.”3
Josep eaar jeļā bwe kōņ Pinmuur eo an Jisōs Kraist, emaron̄ bōk jeo̧rļo̧k bōd jen jerawiwi ko an im erom̧ erreeo im kwojarjar im̧aan Anij. Ekar bōk juon jeļāļo̧kjeņ bwe Jisōs Kraist ekar bōk ioon Make jerawiwi ko im en̄taan kōn aolep ro raar im renaaj mour ioon laļin.
Jān Visōn eo Kein Kajuon, jej jeļā bwe kōn tiriam̧o eo an ad Rilo̧mo̧o̧r, Jisōs Kraist, jej maron̄ bar jeo̧rļo̧k jerawiwi ko ad im juon raan jutak erreeo im̧aan Jemed.
4. Jemedwōj Ilan̄ ej Ron̄jake im Uwaake Jar ko Ad
Ilo bukun wōjke ko raan eo ilo 1820, Josep eaar bōk jeļā bwe Jemedwōj Ilan̄ eaar ron̄ im uwaake jar ko. Tokālik, Josep eaar ba, “ekar wōr aō kōjatdikdik epen ilo bōke juon kaalikkar jān lan̄, āinwōt iaar bōke juon m̧oktaļo̧k” (Josep Smith—bwebwenato 1:29). Waanjon̄ok eo an ej katakin kōj bwe jemaron̄ pukot Jemedwōj Ilan̄ ilo jar n̄an bōk uwaak ko ad make.
Josep eaar āliji jon̄ok in kōn jar elōn̄ alen. Ekar wōr an kōjatdikdik bwe Irooj eaar ron̄ im uwaake jar ko an. Eaar jar kōn men ko rein ļakwōt men ko kwaar jar kaki.
Eaar jar kōn māletlet (lale Josep Smith—Bwebwenato 1:12–13).
Eaar jar kōn peptaij (lale Josep Smith—Bwebwenato 1:68).
Eaar jar kōn anjo̧ (lale Katak im Bujen 121:1–4).
Eaar jar kōn mijinede ro (lale Katak im Bujen 109:22).
Eaar jar kōn Kabun̄ in, membōr ro ie, im ritōl ro ie (lale Katak im Bujen ko 109:71–76).
Im eaar jar kōn baam̧le eo an (lale Katak im Bujen 109:68–69).
En̄in ej juon jon̄ok n̄an kōj. Josep eaar kwaļo̧k n̄an kōj bwe jemaron̄ aolep pukot Jemed ilo jar.
5. Jemed im Nejin Rejeļā Kōj Kajjojo
Jān Visōn eo Kein Kajuon, jej jeļā bwe Armej rein indeeo rejeļā kajjied kajjojo, āinwōt aer jeļā kajjien Josep. Jemed eaar kūr Josep kōn etan im, “jitōn̄ļo̧k eo juon,” ba, “En̄in Nejū Jitenbōro. Ron̄jake E!” (Josep Smith—Bwebwenato 1:17).
Jemed im Nejin raar jeļā aikuj ko an Josep, inepata ko, im ajimakeke ko, āinwōt Aer jeļā ko ad. Rejeļā bar tōprak im būrom̧ōj ko ad.
Ke iaar jodikdik, iaar jar kōn elōn̄ men ko. N̄e ij relikļo̧k, jet iaan men ilo aō kalimjōkļo̧k remaron̄ jab aorōk. Ak raar aorōk n̄an n̄a, im ij meļeļe jān m̧okta bwe ewōr juon Jema ilo Lan̄ eo ej ron̄jake eō. Ejjab aolep iien em̧ōkaj aō bōk juon uwaak, ak iaar en̄jake bwe ilo iien eo An make im ilo wāween eo An make enaaj kautiej kajjitōk eo aō ilo juon wāween me ejim̧we n̄an n̄a.
Bōk leke im tōmak bwe Anij enaaj kōnono n̄an eok. Tōmak ilo en̄jake ko me rem̧wilaļ aer itok n̄an būrūōmi. Iaar tōmak ilo jar im meļeļe kajoor eo an kōnke ijeļā kōn en̄jake ko an Rikanaan Josep Smith. Ijeļā bwe Anij ejeļā eta im bwe E emaron̄ uwaake eō, āinwōt An jeļā etam̧ im naaj uwaake eok.
Naan in kam̧ool
68 iiō ko rellōn̄ in aō mour ioon laļ in, iaar bōk jon̄ok eo an Josep ilo jar n̄an idajon̄jon̄. Āinwōt rikam̧ool ro rem̧ool an Rilo̧mo̧o̧r, iaar bar bōk uwaak ko jān lan̄. Ijeļā bwe Jisōs ej RiKraist eo. E ej Nejin Anij. E ekar jerkakpeje im rainin emour. Ewōr kajjoor Ippān n̄an jeo̧rļo̧k jerawiwi ko ad. Kōn ad tōmak, pokake, im ukweļo̧k, E emaron̄ bōkļo̧k kōj ilo kōjparok n̄an kapijuknen eo ad ilan̄.
Āinwōt Rijilōk an Irooj Jisōs Kraist im āinwōt juon An rikam̧ool em̧ōj kapiti, Ij kam̧ool kōn juon m̧ool im kam̧ool eo epen jen Jetōb Kwojarjar bwe Jemed im Nejin raar waļo̧k n̄an Josep Smith ilo Wōjke eo Ekwojarjar. Ij jar bwe kwonaaj ļoor jon̄ok eo an Josep ilo jar, jeļā kōn m̧ool ko eaar jeļā, n̄an kōkajoorļo̧k tōmak eo am̧ ilo Jemedwōj Ilan̄ im ilo Nejin, Jisōs Kraist.
Kōmeļeļe jān David Malan
Kōmeļeļe jān Kendall Ray. Johnson