Digital Wōt
Bōd ko Am̧ Rej Ke Dāpij Eok?
Rilo̧mo̧o̧r eo ededeļo̧k an kar kōļļāik wōņāān eo. Jibwe Pein im wōnm̧aanļo̧k wōt.
Juon iien emootļo̧k, bisop eo aō eaar kūr ward eo n̄an ļōmņake kōn jejjo m̧ōjņo̧ ak jerawiwi me kōm maron̄ likūti ioon tebōļ in kwojkwoj eo bwe Jisōs Kraist en būkiļo̧k,. Ewōr jerawiwi ko iaar eddodo kake ilo iien ko ikar rūm̧m̧an ded me iaar kajjieon̄ in anjo̧ jāni ak iaar jab maron̄ in anjo̧ kōn jar ak kajoor eo aō make. Kōjekdo̧o̧n eddōkļo̧k eo aō ilo iiō ko, iaar jeļā ke ikar aikuj in anjo̧ jāni n̄an eddōkļo̧k wōt.
Jabōt eo ālkin idajon̄jon̄ eo an bisop eo, iaar pepe bwe in likūt juon iaan jerawiwi ko aō ioon tebōļ in kwojkwoj eo, juon me ej bōk Rilo̧mo̧o̧r eo im en̄taan in pinmuur eo An. Iaar pojak in bōk kwojkwoj eo, iaar keememej bwe an nuknuk eo ej kalibubuik kwojkwoj eo ej bōk jikin nuknuk in kallib eo An, im pilawā eo im dān eo rekar jutak kōn Ānbwinin im Bōtōktōkin.
Kōn m̧ool im obrak kōn jibadbad an bōro, iaar kōkāāl bujen peptaij eo aō im kar jar ilo būruō, kajjitōk ippān Jemedwōj Ilan̄ kōn jipan̄ im kōm̧m̧an juon kallim̧ur n̄an meļo̧kļo̧k jerawiwi in. Innām juon men ekar waļo̧k me ikar jab kōtmene: ikdeelel eo aō n̄an jerawiwi ekar lukkuun in jako. Ikar kajjieon̄ in menin jejjo alen ko, im ejja men eo wōt ekar waļo̧k ippān jerawiwi ko jet. Menin ekar kanooj em̧m̧an n̄an an m̧ool ke?
Kōjekkun wōt juon Ankilaō ippān Ankilan
Wiik eo tok juon, iaar jeļā jerawiwi rōt eo ij aikuj in likūti ilo tebōļ in kwojkwoj eo, bōtaab ikar jab en̄jake pojak n̄an kwaļo̧ke. Reilikļo̧k, ij kile bwe būruō ekar jab pād ilo jikin eo me ekar aikuj in pād ie. Ekar jab bwe aō m̧ool n̄an wujlepļo̧k n̄an oktak eo. Bōtaab iaar kile ewi jon̄an an jerawiwi eo kar kōmetak Jemedwōj Ilan̄. Ikar jeļā ikar aikuj in kōjepaan wōt juon ankilaō ippān Ankilan im kaioļapļap mour eo aō Ipeļakin n̄an erom anjo̧. Kōn menin iaar kōm̧m̧ane ijo em̧m̧an tata ippa n̄an kōm̧m̧ane bwe juon en m̧ool in.
Iaar kowaan jabdewōt kapo me remaron̄ kar tōlļo̧k n̄an jerawiwi. Iaar ukōt wāween aō riiti jeje ko aō rekwojarjar kajjojo raan im lukkuun kōļmenļo̧kjeņ kaki im mour kaki ilo mour eo aō. Iaar kalimjōk wōt n̄an m̧ool ilo kallim̧ur eo aō n̄an oktak, im ikar kappukōt ankilaan Irooj kajjojo raan ijello̧kin ankilaaō. Ikar likūt E m̧oktata, kōnke ikar jeļā ijjab maron̄ etal jān jerawiwi in ilo an jako kajoor in Pinmuur eo an Rilo̧mo̧o̧r. N̄an likūt wōt E m̧oktata, ikar maron̄ in anjo̧ jān jerawiwi in ilo tebōļ in kwojkwoj eo. Āliktata iaar maron̄ in rōļo̧k jān men ko me raar dāpij eō elōn̄ iiō ko.
Kōn em̧m̧akūt in, iaar epaakeļo̧k Jemedwōj Ilan̄ im aō Rilo̧mo̧o̧r. Iaar pijaikļo̧k Aer reilaļtak n̄an n̄a ium̧win aolepān iiō kein kōn kijenmej im iakwe—jeļā, ilo jem̧lo̧kin, imaron̄ kar julo̧k jerawiwi ko me ilo jetōb raar bōbrae eddōkļo̧k eo aō. Im ke iaar pojak n̄an julo̧ki, Jisōs Kraist ekar pād ijo n̄an kotak eō—n̄an bōk eō ilo pein im letok n̄an eō jeo̧rļo̧k bōd im kajoor. Eaar letok juon iaļ n̄an eō n̄an anjo̧ jān jerawiwi ko aō kōn Pinmuur eo An. E ekar kōļļāik wōņāān m̧ōjņo̧ ko aō, bōd ko aō, im jerawiwi ko aō. Ikar aikuj wōt n̄an ļōke E.
Komaron̄ Bun̄ M̧aanļo̧k Wōt
Ilo tōre in, Iaar riiti jet iaan naan ko jān Elder Richard G. Scott (1928–2015) jān Doulul eo an Jon̄oulruo Rijilōk ro me ekar letok n̄an eō jidik ellowetak eo iaar aikuji: “Eļan̄n̄e mour eo am̧ etarpok im kwoj en̄jake jab aenōm̧m̧an im jab erreeo … , jab inepata. Em̧ōj An jeļā kadede aolep men. E ej kōttar kwe n̄an bukwelōlō ilo ettā im jino bōk jejjo bun̄tōn ko. Jar kōn kajoor. . . . Jar bwe iakwe eo an Rilo̧mo̧o̧r eo enaaj lutōk leplep n̄an lowaan būruōm̧.”1
Ke kōm kar al “Ij Lokjen Aō” (al eo em̧m̧an ippa) wiik eo tok juon, naan ko raar m̧ool, iaar lokjenaō—ilo bwūlōn̄ bwe men ko iaar apan̄ kaki ium̧win n̄oul iiō ko kar būkiļo̧k jān eō. Ilo būlōn̄ bwe kōn kajoor in Pinmuur eo an Rilo̧mo̧o̧r, imaron̄ in bun̄ m̧aanļo̧k. Bwe E emaron̄ kōmour aolep jerawiwi ko im kinej ko im jab illik jenokaer. Bwe ikar jab aikuj in dāpij bōd ko aō.
Ekanooj in ļap wōt ijo n̄an ekkatak im anjo̧ ioon, bōtaab mour eo aō ej pād ilo juon iaļ eo ewallōn̄ļo̧k. Ij en̄jake eļapļo̧k lan̄lōn̄ im aenōm̧m̧an. Eļapļo̧k aō kwaļo̧k kam̧m̧oolol. Ij epaakļo̧k n̄an im kōkajoorļo̧k naan in kam̧ool eo aō kōn Jemedwōj Ilan̄ im Rilo̧mo̧o̧r eo. Aolep raan me ij kāālet n̄an bar kajjieon̄, ij juon bun̄tōn epaakeļo̧k Er im armej eo Er rejeļā imaron̄ in erom.