Pedped in Katak ko an Jerbal in Karejar
Jerbal in Karejar kōn Kweilo̧k eo Eļap
Kōn aolep kout ko rōkōbōkakkak, iminene ko an baam̧le, im katak ko jān ro rikarejeran Irooj, kweilo̧k eo eļap ej letok n̄an kōj elōn̄ wāween ko n̄an jerbal in karejar—m̧okta, ilo iien eo, im ālkin wiikāān in kweilo̧k eo eļap!
Āinwōt an rūkaki ro an kūlaaj in kōppopo n̄an mijen, Susie im Tom Mullen iien otemjeļo̧k rej kōketak ro uwaan kūlaaj ko aer n̄an karuwaineneiktok juon eo n̄an alooje kweilo̧k eo eļap.
“Karuwaineneiktok juon n̄an kōm̧m̧ane juon men ej juon m̧ōttan aorōk an jerbal in mijenede, im ej jerbal n̄an jerbal in karejar barāinwōt,” liin ej ba. “Rijikuuļ ro am iien otemjeļo̧k rej bōktok ennaan kōn ewi jon̄an an em̧m̧an an waļo̧k n̄an er im barāinwōt n̄an armej eo rej karuwaineneiki.”
Erkein rej jejjo iaan wāween ko rijikuuļ ro aer raar kwaļo̧k ilo aer pukōtļo̧k:
-
“Kōmij jerbal in karejar n̄an juon m̧ōttam eo ekar wōr jet an inepata ko ej lokjak kaki. Kōm kar karuwaineneiki n̄an ron̄jake kweilo̧k eo eļap kōn uwaak ko. Ke kōm kar loļo̧k e ālkin kweilo̧k eo, ekar jiron̄ kōm bwe ekar ron̄ elōn̄ ļōmņak ko rellōn̄ me renaaj jipan̄.”
-
“Kōm kar kōm̧m̧an iien m̧ōn̄ā an kweilo̧k eo eļap im aolep raar ebbōktok kapijie ko n̄an kōjjebar. Ekar kanooj in kam̧ōņōņō jon̄an kōm kar bar jokāālet n̄an bar kōm̧m̧ane juon alen.”
-
“Ikar karuwaineniktok juon m̧ōtta n̄an alooje kweilo̧k eo eļap ippa. Ke kōmro kar kōnono kake, kōm kar jokāālet n̄an kattōrļo̧k n̄an im̧ōn jar eo n̄an lale eļan̄n̄e kōm maron̄ kar alooje ijo. Kōm kar, im ekar juon en̄jake eo em̧m̧an tata n̄an pād ijo!”
Ke Mullens ro im rijikuuļ ro aer raar ekkatak, ekanooj lōn̄ wāween ko n̄an jerbal in karejar kōn kweilo̧k eo eļap. Ej juon wāween aiboojoj n̄an kwaļok kout ko rōkōbōkakkak, imminene ko an baam̧le, im katak ko jān ro rikarejeran Irooj.
Karuwaineneik Ro Jet n̄an M̧weo Im̧ōm̧
“Rilo̧mo̧o̧r eo ekar kakien ro Rikaļooran n̄an ‘Yokwe doon, āinwōt Iar yokwe kom̧’ (Jon 13:34). Kōn menin jej lale ekōjkan An kar iakwe kōj. … Eļan̄n̄e jej kōm̧m̧an bwe E en ad waanjon̄ak, jej aikuj iien otemjej kajjieon̄ jipan̄ļo̧k kakobaiktok aolep.” —Būreejtōn Dallin H. Oaks1
Iiō ko ļo̧k rūkaki in m̧weo eo am em̧m̧an Mike ekar kile bwe ajri ro nejū jilu im n̄a ekar wōr juon am laptop edik n̄an alooje kweilo̧k eo eļap. Ilo iien eo em̧ōkaj tata eaar karuwaineneik kōm n̄an etal n̄an m̧weo im̧ōn n̄an alooj ippān im lieo pāleen, Jackie, akweļap bwe renaaj kar iakwe ilo am kobaļo̧k. Ajri ro nejū raar lo̧udin̄din̄ n̄an alooje kweilo̧k eo ilo juon m̧ool in Tipi, ekar ļap aō kam̧m̧oolol kōn bōk rejtak eo; im kōm aolep kar iakwe iien eo am ippān doon.
Ālkin wōt, alooj kweilo̧k eo eļap ippān doon ekar juon imminene. Jekdo̧o̧n ke ekar wōr juon nejim make Tipi, kōm kar m̧ōņōņō wōt in kar jibadōkļo̧k m̧ōn Mike im Jackie kōn pet ko am, bok in jeje ko, im kapijie ko n̄an kweilo̧k eo eļap. Ron̄jake naan ko an rikanaan ro ippān doon ekar kōm̧m̧an an ļapļo̧k an aorōk. Kōm kar erom āinwōt baamle. Mike im Jackie raar erom jet iaan ro m̧ōttam rem̧m̧an tata im būbū im jim̧m̧an ro kein karuo n̄an ajri ro nejū. Aer iakwe im jemjerā ekar juon kōjeraam̧m̧an ekabwilōn̄lōn̄ n̄an baam̧le eo aō. Ij kanooj lukkuun kam̧m̧oolol kōn kōņaan eo aer n̄an kōpeļļo̧k m̧weo im̧wer im būruwer n̄an kōm.
Suzanne Erd, California, USA
Pedped in Katak ko n̄an Ļōmņak kaki
“Kile”
Ilo iakwe Rilo̧mo̧o̧r eo ekar bōk iien n̄an lale aikuj ko an ro jet innām kar jerbal n̄an kake aikuj ko (lale Matu 9:35–36; Jon 6:5; 19:26–27). Jemaron̄ kōm̧m̧ane ejja āinwōt.
“Karuwaineneik ilo iien eo em̧ōkaj tata”
Ālkin ad kile aikuj ko an ro jej jerbal in karejar n̄an er, bun̄tōn eo tok juon ej n̄an jerbale.“Ron̄jaki naan ko an rikanaan ro”
Jej aikuj “kwelo̧k emmakijkij” (Moronai 6:5) n̄an ekkatak ippān doon, eddōkļo̧k ippān doon, im ekōnono kōn men ko ilo jetōb me raorōk tata n̄an jetōb ko ad.
“Itok, ron̄jake ainikien juon rikanaan, im ron̄ naan eo an Anij”2 emaron̄ in juon iaan karuwainene ko raorōk tata jemaron̄ leļo̧k n̄an ro jej jerbal in karejar n̄an er.
“Iakwe im M̧ōttā”
N̄an m̧ool in jipan̄ im kareel ro jet, jej aikuj kalōk m̧ōttā ko kōn jenkwadik im “iakwe jab ankilaan riab ”(lale Katak im Bujen Ko 121:41).
Kwaļo̧ke ilo Intōrnet
“Social media jāānōļ ko rej kein jerbal ko aolepān laļ in me maron̄ jelet oran ko reļļap an kajjojo armej im baam̧le ko. Im ij tōmak iien eo em̧ōj an itok n̄an kōj āinwōt rikaļoor ro an Kraist n̄an kōjerbal kein jerbal kein rim̧we ilo jetjet im ļap an wejepedik n̄an kam̧ool kōn Anij Jemen Indeeo, karōk in m̧ōņōņō eo An n̄an ajri ro Nejin, im Nejin, Jisōs Kraist, āinwōt Rilo̧mo̧o̧r eo an laļ.” —Elder David A. Bednar3
Intōrnet ej kōtļo̧k ad kwaļo̧k gospel eo ippān aolepān laļ in. Ij iakwe men jab in! Ij kwaļo̧k jet m̧akūtkūt ko n̄an kweilo̧k eo eļap, bōtaab eo eļap tata ij kajjieon̄ n̄an jipan̄ ro jet ejake juon iien ekōnono jān ekōnono ko an kweilo̧k eo eļap. Lo kajjitōk ko jān ro jet emaron̄ emakijkij an jipan̄ kōj lo men ko ilo juon wāween ekāāl im emaron̄ bōktok n̄an iien ekōnono eo ad make kajjitōk ko rem̧m̧an.
Ikar lo bwe ilo am̧ kōjerbal kajjitōk ko n̄an ekōnono kōn ennaan ko an kweilo̧k eo eļap ippān baam̧le ko kwoj jerbal in karejar n̄an er, ej jipan̄ eok lo kajoor ko aer barāinwōt aikuj ko aer. Juon iaan kajjitōk ko rem̧m̧an tata ippa n̄an kajjitōk ej, Ta eo kwoj en̄jake ekar unin kōnono eo jān juon m̧wen̄an an kweilo̧k eo eļap ekāāl tata?
Uwaak eo enan̄in aolep iien kōtļo̧k am̧ lo ta eo ej waļo̧k ilo mour eo aer im ta eo eaorōk n̄an er. Ej kōm̧m̧an am̧ erom juon būratōr ak sister in jerbal in karejar eo em̧m̧anļo̧k kōnke kwoj lo er eļapļo̧k an alikkar.
Camille Gillham, Colorado, USA
Pedped in Katak ko n̄an Ļōmņak kaki
“Kwaļo̧k gospel eo”
Em̧ōj ad kar kōm̧m̧an bujen n̄an “jutak āinwōt rikam̧ool ro an Anij ilo aolep iien ko im ilo aolep men otemjeļo̧k, im ilo aolep jikin ko” (Mosaia 18:9)
“Ejaake juon iien ekōnono”
Ennaan ko an kweilo̧k eo eļap remaron̄ im̧we iien bwebwenato ko rekabwilōn̄lōn̄, jetjet, im ilo jetōb. Im kain bwebwenato kein remaron̄ kōkajoorļo̧k jemjerā ko ami, jipan̄ kaddōkļo̧k naan in kam̧ool eo am̧, im bōktok n̄an eok lan̄lōn̄! (lale Katak im Bujen Ko 50:22).
“Kōjerbal kajjitōk ko”
“Kajjitōk ko rem̧m̧an renaaj jipan̄ eok meļeļe itok limo ko, inepata ko, ak kajjitōk ko me ro jet ewōr ippāer. Remaron̄ kōkōm̧anm̧anļo̧k am̧ katakin, karuwaineneiktok Jetōb eo, im jipan̄ armej ro ekkatak.”4