Juon Tāākji, juon Ļaddik rijikuuļ, im juon Uwaak in Jar
Rijeje eo ej jokwe ilo Rivers State, Nigeria.
Ekar wōr juon am im̧we bwe kōm naaj kar lo e, innam etke ekar jab kōm̧m̧an āinwōt?
Juon raan mijenede eo m̧ōtta im n̄a kar letok juon em̧m̧aan n̄an katakini eo ekar jokwe ilo juon bukōn ņa etan Tema, epaakeļo̧k jikin kweilo̧k eo an Accra, Ghana. Oran in m̧ōko ilo bukwōn jab eo eaar jab kar jetjet, kōn menin kar letok n̄an kōm juon kōmeļeļe ilo jeje n̄an jipan̄ kōm lo m̧weo.
Ke kōmro kar tōkeakļo̧k ilo bukōn eo, kōm kar ļoor iaļ ko bōtaab kōm kar jab maron̄ lo em̧m̧aan eo kōnke eaar booļ m̧ōko me rejetjet n̄an ejja kōmeļeļe eo. Kar en̄jake tarpok, kōm kar jokāālet n̄an kaļļaļļaļ ilo kōjām ko ilo jukjuk in pād eo n̄an kajjitōk, bōtaab ekar ejjeļo̧k juon ejeļā kajjien em̧m̧aan eo kōm kar kappukōte. Ekar wōr aō im̧we n̄an kajjitōk ippān Jemedwōj Ilan̄ kōn jipan̄.
Ālkin am̧ro kar jar, ekar wōr juon aō en̄jake bwe kōmro naaj kar lo em̧m̧aan eo kōmro kar kappukōte, kōn menin kōmro kar kakijin̄en̄eikļo̧k kijejeto ko am̧ro. Ekab wōt, kōm kar jab lo ļein. Kōm kar m̧ōk im jokāālet n̄an bar ro̧o̧l n̄an eria eo kōmro ej jerbal in kwaļo̧k ie kōnke ekar bar wōr am̧ro iien ekkatak ko. Ke kōmro kar tōparļo̧k paak in tāākji eo, rikattōr tāākji eo eo ekar bōktok kōmro n̄an bukōn eo ekar lo erreitok inepata eo ilo turin mejām im kar kajjitōk eļan̄n̄e kōmro kar lo wōn eo kōmro kar kappukōte. Uwaak eo am ekar, jaab.
Ekar ba komro en deļo̧n̄e juon mōn jikuuļ me ej jutak ilo kona eo im kajjitōk ijo. Kōm kar jiron̄ e bwe ekar jab kōmeļeļe eo kar letok n̄an kōm, bōtaab ekar akweļap. Kōmro kar diwōj jān tāākji eo im jibadōkļo̧k jikuuļ eo—ejjab kōnke kōm kar ļōmņak kōm naaj kar lo jabdewōt, ak n̄an baj wōt kautiej n̄ūrbōktak eo an eo m̧ōttam.
Ke kōmro kar jino etetal m̧aanļo̧k n̄an administration building eo ilo jikuuļ eo, juon ļaddik ekar ettōrtok ilo iaļ eo am̧ro. Ekar ettōn̄ dikdik im jiron̄ kōm bwe e im ļaddik eo jein jatin raar membōr ro de ro an Kabun̄ eo an Jisōs Kraist im Armej ro Rekwojarjar ilo Raan-ko Āliktata rej jokwe ilo eria in im bwe emaron̄ jipan̄ kōm.
Kōmpānien eo m̧ōtta im n̄a kar kalimjōk doon ilo jab tōmak. Ekar juon menin kabwilōn̄lōn̄. Ļaddik eo ekar jipan̄ kōm lo em̧m̧aan eo kōm kar kappukōte, im āliktata ekar bōk gospel eo im kar peptaij.
En̄jake in ekar katakin eō bwe Jemedwōj Ilan̄ ej uwaaki jar ko ilo iien eo An make im ilo wāween eo An make. N̄e jej jab bōk uwaak ko ilo iien eo em̧ōkaj tata n̄an jar ko ad, jemaron̄ kōjerbal tōmak ilo E im ekkatak n̄an kijenmej.
Pija jān Corey Egbert