Ilo Digital Wōt: Rūm̧m̧an Ded ro
Lo Lan̄lōn̄ ilo Kōm̧m̧ane Jerbal eo an Irooj
Āinwōt rūm̧m̧an ded ro, mour eboub. Ekanooj lōn̄ men ko jemaron̄ kōm̧m̧ani, kōļapļo̧k jeļāļo̧kjeņ eo ad, kappukōt eo karejerad indeeo, jokāālet juon jerbal, jino juon baam̧le. Im ippānļo̧k aolep men ko rem̧m̧an, kar bar rōjan̄ kōj n̄an “kōm̧m̧ane jerbal in an Irooj.”1
“Ej iien kiiō n̄an adwōj meļeļe eļapļo̧k kōn jerbal eo ad ilo kōm̧ōkajļo̧k jerbal in lo̧mo̧o̧r eo. Ilo ad kōm̧m̧an jerbal in mijenede, … jerbal in tampeļ im menmenbwij an baam̧le, im katakin gospel eo m̧ōttan eo eaorōk ilo mour ko ad, jenaaj en̄jake eļap lan̄lōn̄ n̄an im n̄an bōk menin letok kwojarjar eo ippān menin letok ko an jetōb ko jej aikuji n̄an kōkajoorļo̧k Kabun̄ in.”2
Erkein rej jet iaan rūm̧m̧an ded ro reboub ro rej lo lan̄lōn̄ ilo kōm̧m̧an iien n̄an jerbal eo an Irooj.
Menmenbwij an Baam̧le: Ej Kab Ijjino Kiiō
“Jepļaaktok eo eaar kōm̧m̧an elōn̄ men ko n̄an n̄a make kōnke em̧ōj aō jeļā bwe baam̧le ko remaron̄ ippān doon n̄an indeeo” Itumeleng Tlebere eaar ba jān Maseru, Lesotho. “Imaron̄ lo ro jibu im jim̧m̧aō im rūtto ro aō me em̧ōj aer mej. En̄in unin aō lukkuun in iakwe menmenbwij an baam̧le. Kōnke ij epepen eo jinointata ilo Kabun̄ in, ekanooj ļap jerbal n̄an kōm̧m̧ane n̄an er.”
Itumeleng ejeļā jān en̄jake in bwe etali ļo̧o̧k ko im meļeļe ko remaron̄ kar pen, bōtaab eaar rōjan̄ rūm̧m̧an ded ro jet n̄an bōk kuņaer ilo menmenbwij an baam̧le eo aer “Baj jino kōm̧m̧ane. … Menmenbwij an baam̧le ekar kōm̧m̧an bwe in en̄jake kam̧m̧oolol kōn aolep men ko ewōr ippa.” Emaron̄ kōm̧m̧ane ejja āinwōt n̄an kom̧.
Jerbal in Karejar: Erom Pā ko Pein Anij
Lucy Fergeson jān Utah, USA, kwaļo̧k ekōjkan an jerbal in karejar kar jipan̄ e jān wiik eo enana ilo mour eo an—ak ekar ilo wāween eo jab kōtmene. Ekar wiik in teej eo āliktata ilo jikuuļ, juon wiik in ekkatak eboub, im ļaddik eo jeran eaar kam̧ōjm̧ōj jān e. Innām, liin eaar ba, “ikar meļo̧kļo̧k, ak rikarejar jeiū kōrā im n̄a kar pepe n̄an kōmat muffin n̄an sister ro kar jitōn̄ kōm n̄an jerbal in karejar n̄an er.”
Ke rej iiōk ippān doon, rikarejar jeiū eaar ron̄jake, kar kallikar, im letok kōkapilōklōk. “Kōmat im leto-letak muffin ko ekar jab juon men eo me ekar lukkun aorōk ak ekōm̧m̧an juon oktak eļap,” Lucy eaar keememeje. “Ak ālkin an rikarejar jeiū joļo̧k eō ilo m̧weo im̧ō, iaar kile bwe ekar jejjet ta eo ikar aikuji n̄an en̄jake em̧m̧anļo̧k im bwe jet iien Anij ej jilkintok armej ro jet bwe ren erom pā ko Pein. Ta eo ekar jetjet n̄an eō ej bwe jipan̄ ekar itok jān rikarejar jeiū ijjeļo̧kin an sister ko kar ijjitōn̄ er n̄an lotok eō. Ij lukkuun kam̧m̧oolol bwe eaar jipan̄ eō en̄jake bwe ijjab makeļo̧k iaaō im bwe kar iakwe eō.”
Jerbal in mijenede: Mour n̄an Erom juon Waanjon̄ok
Kwojjab aikuj in erom̧ juon mijinede eo ej jerbal aolep raan n̄an kwaļo̧k gospel eo. Vennela Vakapalli, jān Andhra Pradesh, India, ekar kōmeļeļeiki, “N̄e ij iuweļo̧k ilo baj ko, n̄e ij etal ilo tāūrein ko, ij kōpeļļo̧k Bok in Mormon eo aō im riiti. Im elōn̄ armej rej kajjitōk ippa kake.”
Ashlee Dillon jān Utah, USA, ej kwaļo̧k: “Kōnke ijjab jerbale juon mijen ejjab meļeļein ke ijjab juon mijinede. Ijello̧kin ilo̧k jān baam̧le eo aō jerbal n̄an Irooj, ij jerbal n̄an Irooj ippān baam̧le eo aō. Ij jerbal n̄an ro jet, im ij mour n̄an erom juon waanjon̄ok an juon rikaļooran Jisōs Kraist.”
Erom Jinen im Jemān: Katakin Ajri ro Gospel eo
Ingrid de Bastian Ortiz, jān Veracruz, Mexico, ej 26 iiō dettan jinen jilu ajri ro. Eaar kōmeļeļeiki, “Āinwōt ro jinen ajri ro reddik, elōn̄ raan ko me retōn jān jon̄aer, kōn jerbal ko ejjeļo̧k jem̧lokier barāinwōt iien eo ajri ro rej aikuj. Ijoke, jej en̄jake juon jerbal eļap n̄an katakin gospel eo n̄an ajri ro nejid bwe ren jeļā bwe rej nejin Anij.
“Eddo eo aō āinwōt m̧am̧a ej n̄an jipan̄ er kile kōn er make bwe Jemedwōj Ilan̄ ewōr juon an karōk in m̧ōņōņō n̄an er.”
Men̄e kwojjan̄in juon m̧am̧a ak baba kiiō, kwoj maron̄ in wōt kōm̧m̧ane juon jerbal aorōk ilo jipan̄ katakin ajri ro. “Eaorōk bwe ajri ro ren jeļā kōn pedped im katak kein,” Ingrid ej ba, “bwe jen maron̄ jeļā leļo̧k jipan̄ āinwōt rūm̧m̧an ded ro ejjeļo̧k rejetaer ak rūtto ro em̧ōj aer kar m̧are ilo jet iaan kūr ko ilo Būraimere eo im nursery eo.”
Jej aolep rūm̧m̧an ded ro reboub. Ak jekdo̧o̧n ta jekjek ko ami remaron̄ in, kom̧ maron̄ lo wāween ko reļem waan kōn kōm̧m̧ane jerbal eo an Irooj ilo aolep m̧ōttan ko an mour eo ami—jim̧or ko reļļap im ko reddik.