Raar Bōk juon Kōjatdikdik kōn Itok eo an Kraist—im Jemaron̄ Barāinwōt
Rikanaan ro ilo Bok in Mormon raar bōk kōjatdikdik bwe Kraist enaaj itok. Ilo ad riiti naan ko aer, jemaron̄ bōk ejja kōjatdikdik kōn n̄āāt eo Enaaj bar itok.
EJ LOĻO̧K Pija jān Jorge Cocco Santángelo
Naan ta ko reitok n̄an kōļmenļo̧kjeņ ilo am̧ ļōmņak kōn Bok in Mormon?
Rinipai ro, Rileman ro, ro jet?
Tariņae, āne jem̧ade, o?
Ukweļo̧k, pinmuur, wānōk?
Jisōs Kraist?
Kōjatdikdik?
Ijtō ej juon iien em̧m̧an n̄an kōļmenļo̧kjeņ bar juon alen kōn enaan eo ilo Bok in Mormon. Men eo eaorōktata, ennaan eo bwe Jisōs ej RiKraist eo, ad Rilo̧mo̧o̧r im Ripinmuur. Kōn E, jemaron̄ rōļōk jen metak ko ilo ānbwin im jetōb. Jān mej im jerawiwi. Jemaron̄ anjo̧ jen aolep nana ko an laļin rej iooktok kōj.
Baj likūti, jemaron̄ bōk kōjatdikdik.
Kōjatdikdik—kōjatdikdik em̧ool, ej unjen Jisōs Kraist— kar im̧we rikanaan ro etto n̄an kōjparok ļo̧o̧k ko ioon pileij gold ko bwe ren erom̧ Bok in Mormon. Jekab eaar jiron̄ kōj, “Bwe, bwe kōn ļōmņak in kōm ar jeje men kein, bwe ren maron̄ jeļā bwe kōm kar jeļā kōn Kraist, im eaar wōr am kōjatdikdik kōn aiboojoj eo An elōn̄ bukwi iiō ko m̧okta jān itok eo An” (Jekab 4:4; eoon eo kar kobaiktok).
Jekab ekar kōņaan bwe jen jeļā bwe e—im rikanaan ro jet ro rej kōjparok ļo̧o̧k—raar jeļā kōn itok eo an Kraist. Elōn̄ bukwi iiō m̧okta jen An itok! Im raar im̧we n̄an bōk kōjatdikdik jān naan ko an rikanaan ro raar riit. Jekab eaar kōmeļeļeik, “im ejjab kōm wōt eaar wōr am kōjatdikdik kōn aiboojoj eo An, a barāinwōt aolep rikanaan ro rekwōjarjar ro kar m̧okta jān kōm.
“Lo, raar tōmak ilo Kraist im kar kabun̄-jar n̄an Jemān ilo Etan, im barāinwōt kōmij kabun̄-jar n̄an Jemān ilo Etan. …
“Kōmij lin̄ōri rikanaan ro, im ewōr ippān elōn̄ revelesōn ko im jitōbōn kanaan; im kōn aolep kam̧ool kein repād ippām kōmij bōk juon kōjatdikdik, im am tōmak jab maron̄ idiki” (Jekab 4:4–6; bar lale 1 Nipai 19:21; Jekab 7:11; Mosaia 3:13; Hilamōn 8:16).
Kōjatdikdik eo raar bōke jān en̄jake ko aer jim̧or im kanaan ko raar riiti ilo jeje ko rekwojarjar kar kōpooj er n̄an raan eo Kraist enaaj itok. Ejjeļo̧k oktak, rikanaan ro raan kein rej rōjan̄ kōj m̧aanjabpopo n̄an iien eo Kraist enaaj bar itok. Eļan̄n̄e jej bōk ejja kōjatdikdik in, jej aikuj bar “pukot rikanaan ro, im [n̄an bōk] elōn̄ revelesōn im jetōb in kanaan.” Naan in kam̧ool ko aer kōn Jisōs Kraist eban wōt kōkajoor kōj ak ebarāinwōt jipan̄ kōj m̧aanjabpopo n̄an itok eo An.
Liai
“Kōn menin, ewi jon̄an aorōkin n̄an kōm̧m̧an bwe ro ilaļ in ren jeļā men kein, bwe ren jeļā ke ejjeļo̧k kanniōk emaron̄ pād im̧aan mejān Anij, eļan̄n̄e jaab kōn tōllo̧ke, im tūriam̧okake, im jouj an Messaia Ekwōjarjar, eo eaar likūt mour eo An ekkar n̄an kanniōk, im bar bōk e ekkar kōn kajoor an jetōb, bwe En maron̄ bōktok jerkakpeje an ro remej, āinwōt eo m̧oktata Eaar jerkak.”
Nipai
“Im jej kōnono kōn Kraist, jej m̧ōņōņō ilo Kraist, jej kwaļo̧k kōn Kraist, jej kanaan kōn Kraist, im jej jeje ekkar n̄an kanaan ko ad, bwe ro nejid ren maron̄ jeļā n̄an ia rej maron̄ reilo̧k n̄an jeorļo̧k jero̧wiwi ko aer.”
Kiin̄ Benjamin
“Im naaj ān̄innn̄in E Jisōs Kraist, eo Nejin Anij. …
“Im lo, E ej itok n̄an ro An, bwe lo̧mo̧o̧r en maron̄ itok n̄an ro nejin armej em̧ool kōn tōmak ilo Etan; …
“Im Enaaj jerkak ilo raan eo kein kajilu jān ro remej. …
“Bwe lo, im barāinwōt bōtōktōkin ej pinmuur kōn jero̧wiwi ko an ro raar wōtlo̧k jān bun̄ eo an Adam, ro raar mej im jab jeļā ankilaan Anij kōn er, ak ro raar jero̧wiwi ilo jajeļo̧kjeņ.”
Alma
“Im Jisōs enaaj wōnmaanļo̧k, en̄taan kōn metak ko im kaen̄tanaan ko im kapo ko otemjeļo̧k; im bwe naan eo en maron̄ kūrm̧ool eo kar ba e enaaj bōk ioon metak ko im nan̄inmij ko an armej ro an.
“Im e enaaj bōk ioon e metak ko armej ro an, bwe en maron̄ kōtļo̧k to ko an mej eo eaar lukwōj armej ro an; im e enaaj bōk ioon mōjno ko aer, bwe būruōn ren maron̄ obrak kōn tiriam̧o, ekkar n̄an kanniōk, bwe e en maron̄ jeļā ekkar n̄an kanniōk ekōjkan an jipan̄ armej ro an ekkar n̄an mōjno ko aer.”
Amulek
“Im bwe katok eo eļap im āliktata naaj eo Nejin Anij, aaet, indeeo im ejjeļo̧k jem̧ļo̧kin.
“Im āindein Enaaj bōktok lo̧mo̧o̧r n̄an aolep ro renaaj tōmak ilo Etan; eo ej unin katok in āliktata, n̄an bōktok būruōn tūriam̧o, eo ej anjo̧ ioon kien, im ej bōktok wāween ko n̄an armej bwe ren maron̄ tōmak n̄an ukeļo̧k.
“Im āindein tūriam̧o emaron̄ kōttōprak akweļap ko an kien eo, im atbo̧kwōji ilo pein kōjparok, ak eo ej kwaļo̧k ejjeļo̧k tōmak n̄an ukeļo̧k ej jedmatmat n̄an aolepān kien eo ej akweļap ko an ekajet; kōn meninn̄an wōt eo ewōr an tōmak n̄an ukeļo̧k ekar itok karōk in lo̧mo̧o̧r in eļap im ejjeļo̧k jem̧ļo̧kin.”
Gethsemane, by Jorge Cocco Santangelo
Samuel Rileman eo
“Bwe lo, em̧ool E eaikuj mej bwe lo̧mo̧o̧r en maron̄ itok; aaet, emennin aikuj n̄an E im emennin aorōk bwe E en mej, n̄an kakūrm̧ool jerkakpeje an ro remej, bwe jān E armej ren maron̄ itok im̧aan mejān Irooj.
“Aaet, lo, mej in ej bōktok jerkakpeje, im lo̧mo̧o̧ren aolep armej jān mej eo m̧oktata—mej ilo jetōb eo; bwe aolep armej, jān wōtlo̧k eo an Adam kar m̧wijitļo̧k er jān im̧aan mejān Irooj, im watōke er rimej, jim̧or āinwōt ilo men ko an kanniōk im men ko an jetōb.
“A lo, jerkakpeje eo an Kraist ej lo̧mo̧o̧ren aolep, aaet, em̧ool aolep armej, im bar bōktok er n̄an im̧aan mejān Irooj.”
Blessing the Children, by Jorge Cocco Santangelo
Mormon
“Kom̧in jeļā bwe kom̧ij aikuj itok n̄an jeļāļo̧kjeņ eo kōn ro jemāmi, im ukeļo̧k jān aolep jero̧wiwi ko im nana ko ami, im lōke Jisōs Kraist, bwe E ej eo Nejin Anij, im bwe Eaar mej jān riJu ro, im jān kajoor eo an Jemān Eaar bar jerkak, eo kōn menin Eaar bōk anjo̧ ioon lōb eo; im barāinwōt ilo E kein ire an mej kar oran̄ļo̧k.”
“Im Eaar bōktok jerkakpeje an ro rimej, jān men in armej emaron̄ jerkak n̄an jutak im̧aan An jea in ekajet.”
“Im Eaar bōktok lo̧mo̧o̧ren eo an laļ, kōn mennin eo loe ejjeļo̧k ruōn im̧aan Mejān ilo raan in ekajet eo kar leļo̧k n̄an e n̄an jokwe ilo im̧aan mejān Anij ilo aelōn̄ eo An, n̄an al indeeo nebar ko ippān jarin al ko ilōn̄, n̄an Jemān, im n̄an Nejin, im n̄an Jetōb Kwōjarjar, ro rej juon Anij, ilo jekjek in m̧ōņōņō eo ejjeļo̧k jem̧ļo̧kin.”