Ilju im Jekļaj eo an Kabun̄ in: Kōpooj Laļ in n̄an Itok eo Kein Karuo an Rilo̧mo̧o̧r
Kabun̄ eo an Jisōs Kraist im Armej ro Rekwojarjar ilo Raan ko Āliktata ej n̄an kōpooj laļ in n̄an raan eo n̄e “laļ enaaj obrak kōn jeļā Jisōs” (Aiseia 11:9).
Epād Ilubdān Peid, jān Jay Bryant Ward, emaron̄ jab kape
Kwe im N̄a ewōr ad iien n̄an bōk koņaad ilo Jepļaaktok Eo an gospel eo an Jisōs Kraist. Ekabwūlōn̄lōn̄! Ejjab kōm̧m̧an in armej! Ej itok jān Irooj, eo eaar ba, “Inaaj kōm̧ōkaj jerbal eo Aō ilo iien eo an” (Katak im Bujen Ko 88:73). Jerbal in em̧ōj kōmālim kōn juon ennaan ekwojarjar ekar kōm̧m̧an 200 iiō ko rem̧ootļo̧k. Epād ie jiljilimjuon wōt naan: En̄in ej Nejū Jitōn Bōro. Ron̄jake E!” (lale Josep Smith—Bwebwenato 1:17).
Ainikien jān Anij Kajoor Pōtata, enaan in ekar boktok Josep Smith n̄an Irooj Jisōs Kraist. Jiljilimjuon naan ko rekar ijjino Jepļaaktok Eo an gospel eo An. Etke? Kōnke Anij eo ad emour ej juon Anij in iakwe! Ekōņaan bwe Ajri ro Nejin ren bōk mour in jab wabanban im mour indeeo! Jerbal in eļap ilo raan ko āliktata eo me jej m̧ōttan ekar ejaake, ilo iien eo ejejjet, n̄an kōjeram̧m̧an juon laļ eo ej itok im eobrak kōn nana im kaburomōjmōj.
Ijjab maron̄ kajjitōk kōn Jepļaaktok eo ilo an jab itok limou. Jepļaaktok in em̧ool eaibojooj! Ekabwūlōn̄lōn̄! Ekabwōkakkak! Ewi jon̄an an kabwūlōn̄lōn̄ ke ribōktok ennaan jān lan̄ rekar itok n̄an leļo̧k mālim im kajoor n̄an jerbal in?
Rainin, jerbal eo an Irooj ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ej wōnm̧aanļo̧k wōt? Kabun̄ in enaaj wōr an ilju im jekļaj eo em̧m̧anļo̧k jān jon̄an eo kwoj antooneļo̧k. “Mej ear jab loi, im lo̧jiln̄in ear jab ron̄jake, … men ko jabdewōt Anij e ar kōppojak n̄an ro rej yokwe E” (1 Korint 2:9; bar lale Katak im Bujen Ko 76:10).
Kemeemej bwe tarlep in kwaļo̧k naan eo an Kraist ej pād im̧aan ilju im jekļaj. Kanaan ko An Itok eo Kein Karuo ej epaaktok an kūrm̧ool. Jej ekkaļ lōn̄ļo̧k n̄an epepen in āliktata eaorōk—n̄e Itok eo Kein Karuo an Rilo̧mo̧o̧r enaaj kūrm̧ool.
Aiintok Israel jān Jim̧or Turājet ko ruo an Rōn̄ōļ eo
Aiintok eo an Israel ej aikuj bōk jikin m̧okta jān Itok eo Kein Karuo an Rilo̧mo̧o̧r ej juon kōttar eo eto kōttare kōn aiintok eo an Israel eo ejepelōklōk (lale 1 Nipai 15:18; bar lale tailtōl in peij eo an Bok in Mormon). Jerbal n̄an ro jet ej juon iaan em̧m̧akūt ko reļļap ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata. Irooj ekar kwaļo̧k: “Ij lewōj n̄an kom̧ juon kōkaļļe … bwe Inaaj ain tok, jān ajeeded eo aer etto, armej ro Aō, O m̧weo im̧ōn Israel, im naaj bar kajutak ilubwiljier Aō Zaion” (3 Nipai 21:1).
Jejjab aikuj wōt katakin katak in, ak jej bōk koņaad ie. Jej kōm̧m̧ane menin ilo ad jipan̄ aiintok ro em̧ōj kāālet ilo Irooj jim̧or ilo jait ko ruo an ran̄ōļ eo. Ilo m̧ōttan mejān kajjik eo em̧ōj karōke an laļ in im armej ro ie, armej ro ad remej rej aikuj lo̧mo̧o̧r (lale Katak im Bujen Ko 128:15). Ilo tūriam̧o̧, kūr in n̄an “itok n̄an Kraist” (Jekab 1:7; Moronai 10:32; Katak im Bujen Ko 20:59) emaron̄ barāinwōt n̄an ro em̧ōj aer mej ilo an ejjeļo̧k aer jeļā kōn gospel eo (lale Katak im Bujen Ko 137:6–8). M̧ōttan ļo̧k kōppopo eo aer, ijoke, emenin aikuj kijejeto an ro jet. Jej aiintok menmenbwij ko, ejaake peba n̄an kurup in baam̧le ko, im kōm̧m̧ane jerbal an tampeļ n̄an aiintok kajjojo n̄an Irooj im n̄an baam̧le ko aer (lale 1 Korint 15:29; 1 Piter 4:6).
Kwojarjar n̄an Irooj, jān Jay Bryant Ward, emaron̄ jab kape
Baam̧le ko rej n̄an liāp ippān doon n̄an mour indeeo (lale Katak im Bujen Ko 2:2–3; 49:17; 138:48; Josep Smith—Bwebwenato 1:39). Koneekjen eo ikōtaan ro jibūd etto im ro ineer. Ilo tōre kein ad, likio in, ededeļo̧k, im ippān doon eo ewāppen an aolep epepen ko, kii, im kajoor rej n̄an kobaik ippān doon (lale Katak im Bujen Ko 128:18). N̄an un kein rekwojarjar, tampeļ ko rekwojarjar kiiō rej pedjaake laļ in. Ro jeiū im jatū, ekkal an tampeļ kein remaron̄ jab ukōt mour eo ami, bōtaab iien eo ami ilo tampeļ ko em̧ool renaaj.
Tōre eo ej itok wōt n̄e ro rejjab pokake Irooj renaaj jeņoļo̧k jān ro rej pokake (lale Katak im Bujen Ko 86:1–7). Injurōņ eo ad em̧m̧antata ej n̄an wōnm̧aanļo̧k wōt ilo erreo n̄an deļon̄e m̧weo Im̧ōn ekwojarjar. Menin letok eo em̧m̧antata komaron̄ leļo̧k n̄an Irooj ej n̄an kōjparok kōj make jān lipijinjin an laļ in, n̄an deļo̧n̄ im pād ilo m̧weo Im̧ōn ekwojarjar. Menin letok eo an enaaj aeņōm̧m̧an im kōjparok ilo jeļā bwe je erreo n̄an ioon E, jabdewōt iien ej itok.
N̄an kakkobaba n̄an jerbal in tampeļ, itok eo an Bok in Mormon ej juon kōkaļļe n̄an aolepān laļ in bwe Irooj em̧ōj an ijjino n̄an aiintok Israel im kakūrm̧ool bujen ko E ekar kōm̧m̧an n̄an Ebream, Isaac, im Jekab (lale Jenesis 12:2–3; 3 Nipai 21; 29). Bok in Mormon ej kwaļo̧k katak eo an aiintok eo (lale, n̄an waanjon̄ak, 1 Nipai 10:14). Ej kōm̧m̧an bwe armej ren ekkatak kōn Jisōs Kraist, n̄an tōmak gospel eo An, im n̄an kobaļo̧k ilo Kabun̄ eo An. Ilo m̧ool, eļan̄n̄e ekar ejjeļo̧k Bok in Mormon, kallim̧ur eo kar n̄an aiin im̧ōn Israel eban kar waļo̧k.
Jerbal in Mijenede ej barāinwōt aorōk n̄an aiintok in. Rikarejaran Irooj ej wōnm̧aanļo̧k wōt n̄an kwaļo̧k kōn Jepļaaktok eo. Ilo elōn̄ laļ ko membōr ro ad im mijenede ro ekar kappukot ro me rejeplōklōk an Israel; renaaj kakidudu kōn er “ro̧n̄ in dekā ko” (Jeremaia 16:16); im renaaj eo̧n̄ōde er, āinwōt ilo raan ko etto.
Jerbal in mijenede ej kooneeke armej n̄an bujen eo me Irooj ekar kōm̧man ippān Ebream etto:
“Im kwo naaj juon kōjeraam̧m̧an n̄an ineem ālikūm, bwe ilo peier renaaj kotak jerbal in im Priesthood in n̄an aolep laļ;
“Im I naaj kōjeraam̧m̧an er kōn etam̧; bwe jon̄an wōt lōn̄in eo enaaj bōk Gospel in naaj ņa etan ilo̧kan Eta, im enaaj bōnbōn ineem, im enaaj jutaktok im kōjeraam̧m̧an eok, āinwōt jemāer” (Ebream 2:9–10).
Jerbal in mijenede ej make wōt ijjino ko an kōjeraam̧m̧an ko. Kakūrm̧ool in, dedeļo̧k in, kōjeraam̧m̧an ko me rej itok n̄e ro me em̧ōj aer deļo̧n̄e dān in peptaij kōwāppen mour ko aer n̄an jon̄an eo me remaron̄ deļo̧n̄e tampeļ eo ekwojarjar. Bōk menin letok kwojarjar ej liāpe membōr ro an Kabun̄ in n̄an bujen eo an Ebream.
Kāālōt eo n̄an itok n̄an Kraist ejjab kōn jikin eo jej pād ie; ej kōn wūjlepļo̧k eo an kajjojo. Aolep membōr ro an Kabun̄ in em̧ōj aer jeļā kōn katak, kain̄i, im kii ko an priesthood, im kōjeraam̧m̧an ko an gospel eo, jekdoon ia eo rej pād ie. Armej remaron̄ “bōktok er n̄an jeļā eo kōn Irooj” (3 Nipai 20:13) ilo aer jab em̧m̧akūt jān aelōn̄ ko aer.
M̧ool, ilo raan ko jinoin ilo Kabun̄ etto, oktak ekkā an meļeļein bwe em̧m̧akūt barāinwōt. Ak kiiō aintok ej bōk jikin ilo kajjojo laļ. Irooj ekar ba kōn ejaake eo an Zaion (lale Katak im Bujen Ko 6:6; 11:6) ilo kajjojo laļ ijo E ekar leļo̧k n̄an Rikwojarjar ro An ļotak ko im aelōn̄ ko aer. Aiintok eo an Rikwojarjar ro RiBrazil ej ilo Brazil; jikin aiintok eo an Rikwojarjar ro RiNigeria ej ilo Nigeria; jikin aiintok eo n̄an Rikwojarjar ro RiKorea ej ilo Korea. Zaion ej “ro erreo burueer” (Katak im Bujen Ko 97:21). Eaiboojoj im eļap aenōm̧m̧an.
Kōjparok ilo jetōb enaaj aolep iien pedped wōt ioon wāween an juon armej mour, ejjab ia eo armej eo ej mour ie. Ij kallim̧ur bwe eļan̄n̄e jenaaj kōm̧m̧an jon̄an ad maron̄ n̄an kōmourruri tōmak eo ad ilo Jisōs Kraist im tōpar kajoor eo an Pinmuur eo kōn ukweļo̧k, jenaaj bōk jeļāļo̧kjeņ im kajoor an Anij n̄an jipan̄ kōj bōk kōjeram̧m̧an ko an gospel eo an Jisōs Kraist me em̧ōj an jepļaaktok n̄an aolep laļ, bwij ko, lo ko, im armej im n̄an kōpooj laļ in n̄an Itok eo Kein Karuo an Irooj.
Itok eo Kein Kauro
Irooj enaaj jepļaaktok n̄an āne eo me Ekar kakwojarjare kōn mijen eo An ijin ilo mour in. An anjo̧, Enaaj bar jepļaatok n̄an Jerusalem. Nuknuk eo ebōrōrō ej bōk jikin Bōktōktōkin, eo ekar toorļo̧k jān aolep ro̧n̄ ko, E naaj bar jepļaaktok n̄an Jikin eo Ekwojarjar (lale Katak im Bujen Ko 133:46–48). Ijeņ im ijo ko jet, “naaj kwaļo̧k aibojooj an Irooj, im kanniōk otemjej enaaj jim̧or loe”(Aiseia 40:5; bar lale Katak im Bujen Ko 101:23). “Naaj ņa [Etan] Ri Pepe e Kabwilōn̄lōn̄, Anij e Kajoor Bōtata, Jemān Iien Indeeo, Irooj in Aenōm̧m̧an” (Aiseia 9:6).
E enaaj tōl jān jikin kweilo̧k ko an laļ ko ruo: juon ilo Jerusalem eo m̧okta (lale Zekaraia 14) im eo juon ilo Jerusalem eo Ekāāl “kalōke ion continent in Amedka” (Laajrak in Tōmak ko 1:10). Jān jikin kweilo̧k kein E enaaj tōl Kabun̄ eo An im laļ eo An. Juon tampeļ enaaj aeet ekkaļ ilo Jerusalem. Jān Tampeļ eo E enaaj tōl n̄an indeeo āiinwōt Irooj in Irooj raņ. Dān enaaj toortok jān ium̧win tampeļ eo. Dān jān Dead Sea enaaj bar rool n̄an jinoin. (Lale Ezekiel 47:1–8.)
Ilo raan eo E enaaj bōk taitōļ kein rekāāl im naaj jepooļe kōn Rikwojarjar ro rej make wōt. Naaj jeļā kake āinwōt “Irooj ioon Irooj ro, im Kiin̄ ioon kiin̄ ro, im ro [renaaj pād] Ippān [renaaj barāinwōt bōk anjo̧, ro ri kūr, ro ar kāālōt er, im re tiljek” (Revelesōn 17:14) n̄an ro rej lōke ilo ijin ilo mour in. Innem E “enaaj Kiin̄ indeeo im indeeo” (Revelesōn 11:15).
Laļ in enaaj bar rool n̄an paradise eo jinoin im erom̧ kāāl. Enaaj wōr juon lan̄ ekāāl im juon laļ eo ekāāl (lale Revelesōn 21:1; Ether 13:9; Katak im Bujen Ko 29:23–24).
Ej ad eddo—ej ad utiej—n̄an jipan̄ kōpooj laļ in n̄an raan eo.
Naajdik Sip ko Ao, jān Jay Bryant Ward, emaron jab kape
Jelm̧ae Ilju im Jekļaj eo kōn Tōmak
Ijoke, ijin im kiiō, jej mour ilo juon tōre eo enana. Em̧m̧akūt in laļ im ņo̧ ko reļļap rej kakkure kein ikkaņ ko, jako maron̄ an kien eo eļap, jorrāān ilo jāān relukkuun nana, baam̧le eo ej pād ium̧win kakkure, im bōnbōn in jepel ej ļapļo̧k wōt. Eļap unin bwe jen uwōta. Ak jejjab aikuj kōtļo̧k bwe mijak en bōk jikin tōmak eo ad. Jemaron̄ jum̧ae mijak ko ilo ad kōkajoorļo̧k tōmak ko ad.
Etke jej aikuj tōmak eo ekajoor? Kōnke raan ko reppen rej itok wōt. Ejeja ilo ilju im jekļaj enaaj pidodo ak bun̄bun̄ n̄an erom̧ juon Rikwojarjar eo etiljek ilo Raan Ko Āliktata. Kajojo iaad naaj idajon̄jon̄e kōj. Rijilōk Paul ekar kakkōļ bwe ilo raan ko āliktata, ro retiljek ilo ļoor Irooj “naaj matōrtōre er” (2 Timote 3:12). En̄taan eo emaron̄ bōk laļļo̧k eok n̄an lukkuun mōjņo̧ ak kōketak eok n̄an erom̧ waanjon̄ak im peran ilo am̧ mour aolep raan.
Wāween am̧ jelm̧ae melejon̄ ko an mour in ej m̧ōttanļo̧k eddōkļo̧k eo an tōmak eo am̧. Kajoor ej itok n̄e kwoj kemeemej bwe ewōr ippam̧ juon paaktok ekwojarjar, juon menin letok in aorōkūm̧ ejjeļo̧k jem̧ļo̧kin. Irooj ekar kakemeemej eok, ajri ro nejūm̧, im ajri ro jibūm̧ bwe kwe eo kwoj rijolet, bwe kar baj kōpooj eok ilo lan̄ n̄an juon iien eo ejeņoļo̧k im jikin eo kwonaaj ļōtak, rūttoļo̧k im erom̧ juon rikwaļo̧k jon̄ak ko an im armej in bujen. Ilo am̧ etetal ilo iaļ eo ejim̧we an Irooj, kwonaaj jeraam̧m̧an n̄an wōnm̧aanļo̧k ilo em̧m̧an eo An im erom̧ juon meram im juon rilo̧mo̧o̧r n̄an armej ro An (lale Katak im Bujen Ko 86:8–11).
Ilo ami kōm̧m̧ani jabdewōt men ko renaaj kōkajoor tōmak eo am ilo Jisōs Kraist, ilo an kōļapļo̧k eo am im am meļeļe kōn katak ko kar katakin ilo gospel eo An me em̧ōj an jepļaaktok, im ilo am jab bōjrak am̧ pukot eo. Emjak kōn katak ko rem̧ool—enaaj maron̄ bōk eddo kōn tōmak im dim kōn m̧ōņōņō n̄an aolep men kōn ami kajoor n̄an kakūrm̧ool kōttōbar ko an Irooj.
Enaaj wōr jet iien ko kwonaaj en̄jake am inepata. Kōn menin ij jar kōn peran bwe in jab ebweer! Kabōrom̧ōjm̧ōj, jet ro me kwoj ļōmņak rej ro m̧ōttam̧ ak renaaj liakeļo̧k eok. Jet men ilo kalimjōkļo̧k rekalijōkļo̧k.
Ijoke, ij kallim̧ur n̄an kom̧ bwe ilo ami ļoor Jisōs Kraist, kom̧ naaj lo aenōm̧m̧an im lan̄lōn̄ eo em̧ool. Ilo ami kōjparok bujen ko ami ilo jejjetin, im ilo ami jojomar e Kabun̄ in im Aelōn̄ in Kiin̄ eo an Anij ilo laļ in rainin, Irooj enaaj kōjeraam̧m̧an kom̧ kōn kajoor im māletlet n̄an tōpar ta eo membōr ro wōt an Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Kōj jej rikkaļ ro an kajjojo tōmak ilo Anij, tōmak ilo Irooj Jisōs Kraist im tōmak ilo Kabun̄ eo An. Jej aikuj kaļōk baam̧le ko im liāp ippāer ilo tampeļ ko rekwojarjar. Jej kalōk Kabun̄ eo im aelōn̄ in kiin̄ eo an Anij ioon laļ in (lale Matu 6:33). Jej kōppopo n̄an mejen kajjik eo an make ekwojarjar, mour jab wabanban, im mour indeeo (lale Rom 2:7; Katak im Bujen Ko 75:5).
Ij ettā ilo aō kam̧ool n̄an eok bwe—āinwōt an Rikanaan Josep Smith kar kwaļo̧k—jepļaaktok eo an gospel eo an Jisōs Kraist “enaaj wōnm̧aanļo̧k wōt ilo peran, ettā, im make wōt, m̧ae iien enaaj pedjake aolep continent, tōpar aolep jikin, aolep laļ, im aolep renaaj ron̄, m̧ae kōttōpar ko an Anij renaaj kūrm̧ool, im Irooj eo Eļap enaaj ba jerbal eo ededeļo̧k” (History of the Church, 4:540).
Jej bōk koņaad ilo jerbal in an Anij Ekajoor Pōtata. Ij jar kōn Kōjeram̧m̧an ko An bwe ren pād ippān kajjojo im kōj aolep.