Ua Na’o Tusiga Faatekinolosi: Talavou Matutua
O le Nofotoatasi e Faamanatu Mai ai ia te A’u ina ia Ou Faalagolago i le Fuafuaga Atoa a le Atua mo A’u
Sa ou maua le olioli ina ua i’u ina ou alu ma talitonuina le fuafuaga atoa a le Tama Faalelagi.
Ina ua 30 ou tausaga, sa fesili mai lau uo ia te au i nisi o fesili na suia ai lou olaga. Sa ia fesili mai, “Afai e ia te oe tupe uma i le lalolagi, o le a se mea e te faia?” Sa ou tuuina atu ni nai tali faigofie, e pei o le faatauina o se fale, tausi lo’u aiga, ia ola faalagolago ia te au lava ia, ma isi mea faapena.
Ona ia fesili loloto mai lea, “Ae faapefea pe afai ua e maua na mea uma ma tupe uma i le lalolagi, o le a le mea e te faia?” O iina na ou iloa ai e tusa lava po o le a lou tulaga faalefaaipoipoga, ua tele mea ua ia te au e foai atu i le lalolagi. Sa ou mafaufau i mea e mafai ona ou aoao ma faasoa atu ma le eseesega ma le aafiaga e mafai ona ou faia.
Fesuiaiga o La’u Taulaiga
O lau miti o se talavou matua o le sailia lea o se toalua ma faaipoipo i le malumalu ma amata se aiga. Sa ou faapea e na o le pau lea o lo’u faamoemoega. O lea la ina ua le tupu lena mea, sa ou mafaufau, “Afai o le faaipoipo o le mea aupito sili lea ona taua i le olaga, aisea la e lei maua ai lena avanoa?”
Ina ua uma ona fesiligia au e lau uo i na fesili, sa iu ina ou malamalama i le faamoemoega moni o le olaga. Ou te talitonu lava o le faaipoipo ma le mauaina o fanau e totonugalemu lea i le fuafuaga e faavavau a le Tama Faalelagi mo i tatou taitoatasi, ae ua ou iloaina e le o le fuafuaga atoa lea.
Ua tatou i ai iinei i lenei lalolagi e tuputupu ae, faasoa atu le upumoni, mulimuli ia Iesu Keriso, ma iu ai ina toe foi atu i le Tama Faalelagi (tagai Alema 34:32).
O lea la, i le mafaufau ai i lena mea, sa amata ai ona ou tatalo ma ole atu i le Atua e fesoasoani mai ia ou maua lou faamoemoega ma ou malosiaga. O le tatalo ma au lava taumafaiga e faataitai ni mea fou e fiafia i ai ma faateleina lou faatuatua na faaalia ai lou faamoemoega i le aluga o taimi. Sa ou iloaina sa ia te au le faatuatua tele ia Iesu Keriso. O se vaega o lou faamoemoega ma le fuafuaga i le lalolagi o le fesoasoani atu lea i isi e atiina ae ma faamalosia ai foi lo latou faatuatua ia te Ia. O lenei upumoni na aumaia ia te au le taitaiga maoae i lou olaga ma na fesoasoani ia te au e taulai atu ai i le avea ma tagata e finagalo o Ia ia ou avea ai.
O le Iloaina o Lo’u Faamoemoega
Ina ua silia ma le 20 o’u tausaga, o le tele o au talanoaga e faataamilo i le nofo toatasi. Sa na ona ou taulai atu i ou tulaga “faanoanoa.” Ua ou iloa nei e lelei le taulai atu i le faaipoipoga, ae e mafai ona ou sailia isi faamoemoega ma avanoa.
Afai e te le o mautinoa le mea e tatau ona e faia i le taimi nei, ua ofoina mai e Peresitene Russell M. Nelson ni fautuaga i le mea e amata ai:
Ole atu i lou Tama Faalelagi i le suafa o Iesu Keriso po o a Ona lagona e uiga ia te oe ma lau misiona iinei i le lalolagi. Afai e te ole atu ma le manatu moni i ai, e oo mai le taimi o le a musumusu mai e le Agaga ia te oe le upumoni e suia ai le olaga. …
“Ou te folafola atu ia te oe afai o le a amata ona e mauaina tau lava o se vaaiga i le ala e silasila ai le Tama Faalelagi ia te oe ma mea o loo Ia faamoemoe mai ia te oe e faia mo Ia, o le a le toe tutusa lou olaga!” (“Tutu Atu o ni Tagata Moni o le Meleniuma,” Liahona, Oke. 2016, 49).
E matua loloto lava na upu.
E ui ou te manatu i mea ou te manao ai i le olaga (mea e manaia, i lou manatu!) E tele mea e silafia e le Atua nai lo au. Ma o lana fuafuaga o le a ave ai au i lalo o ala sili atu nai lo le mea sa ou mafaufauina mo au lava.
O le Tatalaina o lo’u Mafaufau i Faamoemoega Fou
O le faaogatusa o au lava ia ma le fuafuaga a le Tama Faalelagi mo au e faigata i le taimi muamua. Sa tatau ona tatalaina lo’u mafaufau i manatu fou, faaaliga fou, ma faamoemoega fou. Sa tiga i nisi taimi ina ua le foliga mai le olaga i le ala na ou fuafua ai. O lou faamanuiaga faapeteriaka na faia ai ni folafolaga patino e lei oo i le faataunuuina o le taunuuga. Ae sa taofia lou popole ma iu ina ou faamamulu atu ou lava manatu ma filifili e talitonu o le a faataunuuina uma ou faamanuiaga folafolaina — aua ou te iloa o le a taunuu i Lana taimi.
Afai tatou te faatuatuaina ma taulai atu i le fuafuaga atoa a le Tama Faalelagi mo i tatou, o le a tatou maua le olioli e faavavau ua Ia folafola mai ia i tatou (tagai i le 2 Nifae 2:25). O le a tatou maua a tatou misiona patino. O le a avea i tatou ma tagata e finagalo o Ia e avea ai i tatou. Ma i le taimi lava e tasi, o le a tatou saunia i tatou lava mo o tatou faamanuiaga uma e faavavau — e aofia ai le faaipoipoga.
Ona o lenei suiga e ala i le vaai, ua ou maua ai le olioli moni i lou olaga. Ou te le iloa tali uma, ae sa faaauau pea ona Ia faasusuluina le malamalama i lou olaga i le tuputupu pea.