Autalavou Matutua
Sailiga mo se Toalua—ma le Alofa Tunoa o le Faaola
Atapue mai le Getty Images
Ua folafola mai e le Alii “ua lava [Lona] alofa tunoa mo e e agamalu” (Eteru 12:26). O nei upu e tatau ona aumaia ia i tatou uma lava le autalavou matutua le faamoemoe ma le mafanafana, aemaise lava pe a oo mai i le sailia o se soa e faavavau. O soo faatuatua o Keriso e masani ona saili atu mo le alofa ma loto matala, ae ua na o le le fiafia i faamoemoega le faamalieina po o le le fiafia i amioga leaga mai ia i latou o loo latou tafafao faamasani i ai. O lenei sailiga e mafai ona aumaia ai le fefe, ita, le fiafia, ma le atuatuvale, aemaise pe afai e faaauau pea mo le tele o tausaga e siliga atu i aso na e faamoemoeina ia faaipoipo ai!
Peitai, e pei ona outou mafaufauina, o nei lagona e le o le mea lea ua faamoemoe le Atua ia tatou lagonaina pea a o tatou mulimuli i Lana poloaiga e faaipoipo ma tausia ni aiga amiotonu ma fiafia. O le mea moni, e finagalo le Atua ia tatou lagona le olioli i le taimi o lena sailiga!
Faatasi ma lea manatu, ua mamanuina ai tusiga o loo i le vaega lenei e fesoasoani ia te oe e aveese ai le atuatuvale i le sailiga o lau soa e faavavau. O le a e maua ai tala e uiga i le auala e alualu ai i luma i le olaga e tusa lava po o le a lou tulaga faalefaaipoipoga ma fautuaga e mafai ona fesoasoani e saunia ai oe mo se faaipoipoga alofaina, faafaileleina, ma mauaa mausali.
A o e saili mo le tagata o le a tuuina atu ia te oe lona loto atoa a o e tuuina atu foi i ai lou loto atoa, faaalu sina taimi e faitau ai nei tusiga. Ou te folafola atu o se tasi o i latou o le a faasusuluina lou loto ma fesoasoani ia te oe e te faatuatua ai ua lava lava le alofa tunoa o le Faaola mo oe.
Ma le faamaoni lava,
Landon Hawes