Lima Fesoasoani o Haven

O Haven, o se tamaitai e 14 tausaga mai Iuta, ISA, na filifili e faamanatu le avea o ia o se tamaitai talavou i le Ekalesia e ala i le auauna atu i isi.

“Sa amata i se manatu itiiti,” o lana tala lea. “Sa alu le uso o lo’u tamā i Bangladesh i se malaga fesoasoani alofa ma aoao e uiga i mea faigata na oo i ai tagata iina. Sa ou manao e fesoasoani ia i latou—o lea sa ou vaavaai ai i le polokalama JustServe ma maua ai le manatu e fai ni pusa o mea e manaomia mo tagata sulufai sa i ai iina.”

Sa aoina e Haven se foai mai lana aoga, fatuina se itulau GoFundMe, ma na faapena foi ona ia aoina ma la’u kalone lapisi a tuaoi ina ia fesoasoani e saili ai se tupe mo pusa o mea e manaomia. “Ou te aoina e tusa o le 22 kalone lapisi ma le 11 kalone o mea e toe faaaoga i Aso Gafua ma Aso Lua uma,” o lana tala lea. “E masani lava ona ou faaaogaina la’u tupe maua mo la’u polokalama aufaipese ma sefe mo se misiona, ae sa ou filifili e faaaoga la’u tupe i le masina lena e fesoasoani e faatau ai sapalai nai lo lena.

Ona alu lea o Haven ma faatau mai uma lava mea sa ia manaomia mo pusa o mea e manaomia, e aofia ai totigi, totigilima, sikafu, ma pulou. Sa ia tuufaatasia ia pusa taitasi ma fesootai atu i le faatonu o le Lifting Hands International ina ia feutagai i le tilivaina o pusa i Bangladesh.

“O le tuufaatasia o pusa e sili atu le tele o le taimi na alu ai i la’u poloketi. Ae o taimi uma lava ou te tuuina ai se vaega i totonu o le pusa, na ou iloa o le a alu i se tasi o manaomia le fesoasoani ma o le a faamanuiaina ai mo se taimi umi.”

E oo atu i le faaiuga o lana poloketi, sa lagona e Haven le tuputupu ae o lona talitonu ia te ia lava i lona gafatia e auauna atu. “Sa ou aoaoina mai i lenei mea le tele o le fesoasoani e mafai ona ou tuuina atu pe afai ou te matua taumafai i lo’u malosi silisili. Sa ou lagonaina foi le agaalofa mo tagata sa ou fesoasoani i ai, lea na fesoasoani ou te lagona ai le latalata atili atu i le Faaola ma lagona ai sina vaega o le mea o loo Ia lagonaina mo i tatou.”

A o tatou faamanatuina tausaga o le faalapotopotoga a Tamaitai Talavou, e mafai e i tatou taitoatasi ona manatua o i tatou o faataitaiga o Keriso. E pei foi o Haven, e mafai ona avea i tatou ma fesoasoani tele i isi pe a tatou taumafai i lo tatou malosi silisili e auauna atu e pei ona Ia faia.