Tatalo a Keli
Sa savavali atu Keli ma lona tina i le falelotu ma tilotilo solo. Sa matagofie, faatasi ai ma niu o loo falala solo i fafo. Fai mai le faailo sa i luga o le fale, “O Le Ekalesia a Iesu Keriso o le Au Paia o Aso e Gata Ai.” I gagana eseese e tolu–faaMeleisia, Saina, ma le Igilisi!
Ma sa le tele se mea na iloa e Keli e uiga ia Iesu Keriso. Ma e lei oo lava o ia i se lotu muamua. Sa lotu iinei le uo a lona tina o, Li Lini. Sa ia valaaulia Keli ma lona tina latou te o faatasi.
A o latou o atu i totonu, sa ataata mai tagata ma faatalofa mai. O tagata uma e ese le lelei. Sa mulimuli atu Keli ma Mama ia Li Lini i le fogafale i luga i se potu tele. Fai mai Li Lini sa ta’ua o se falesa.
Sa saofai i lalo Keli i talaane o Mama ma Li Lini i se laina o nofoa, ma e lei umi ae amata le lotu. Sa faalogologo o ia i le musika. Sa fiafia o ia i le lagona sa ia lagonaina ai, e ui lava na te le iloaina ia upu.
I le faaiuga o le sauniga, sa tu ai i luga se tamaitai e faia se tatalo. Sa tilotilo solo Keli ao piilima e tagata uma o latou lima ma moeiini o latou mata. Sa ia lagonaina pea se mea e sili ona manaia i lona loto. O se a ea lena mea? Sa ese lava nai lo se isi lava mea na ia lagonaina muamua.
Ina ua latou tuua le falesa mulimuli ane, sa ta’u atu e Keli ia Mama e uiga i le lagona sa ia maua i le taimi o le tatalo.
“Ia,” sa fai atu ai Mama, “ou te le i lagonaina se mea faapitoa.”
Ae sa mafaufau pea Keli e uiga i ona lagona i le lotu. Sa fiafia o ia i le tatalo. Ma sa fiafia o ia e faalogo e uiga ia Iesu.
“E mafai ona aoao a’u e faifeautalai?” Sa fesili atu Keli ia Mama. “Ou te fia aoao atili.”
“Afai o le mea lena e te manao e fai, e lelei lena,” sa fai mai ai Mama.
Sa aoaoina e faifeautalai ia Keli i le ala e tatalo ai ma le auala e faitau ai ia tusitusiga paia. Sa la aoaoina o ia e uiga ia Iesu ma Lona alofa ia i tatou. Sa fiafia Keli i le mea sa ia aoaoina.
I se tasi aso na tuuina atu ai e faifeautalai ia te ia se lu’i faapitoa.
“E mafai ona e taumafai e tatalo i lenei vaiaso” o le fesili lea a Elder Parker.
E oo mai lava i le taimi nei, sa na o le tatalo lava o Keli faatasi ma faifeautalai. Ae sa manao o ia e faataitai na o ia. Sa ia iloa sa faafofoga mai e le aunoa le Tamā Faalelagi, ma sa finagalo o Ia e faafofoga mai ia te ia.
“O le a ou faia,” sa ia folafola atu ai.
O le aso na sosoo ai i le aoga o se aso faapitoa. Sa sauni Keli e pese i se tauvaga! Sa ia aoaoina se pese fou matagofie lava faa-Saina. O le aoaoina o nota uma ma leo sa o se galuega faigata tele! Sa ia faataitaia ma faataitaia ma faataitaia.
O lea la ua oo i le taimi e faatino ai, sa popole lava Keli. Sa ia to mai i fafo le ata o Iesu sa ia tuuina i le taga o lana toniga o le aoga i lena taeao. Sa filifili o ia e fai se tatalo, e pei ona faaali atu e faifeautalai ia te ia. “Tamā Faalelagi, faamolemole fesoasoani mai ia te au e aveese lo’u popole,” sa ia tatalo ai. “I le suafa o Iesu Keriso, amene.”
Ona alu atu lea o Keli i luga o le tulaga. Sa sioa atu o ia i le au maimoa ma faamasino. Sa mafaufau o ia i le ata o Iesu i lana taga ma sa lelei teisi atu lona lagona. Sa to sana mānava lapoa lava ma amata loa ona pese.
Sa ia usuina upu uma e pei lava ona sa ia aoaoina. A o pese o ia i le nota mulimuli ma ifo atu, sa iloa e Keli sa faafofogaina e le Tamā Faalelagi lana tatalo ma fesoasoani ia te ia.
Faatasi ma foliga ataata, sa savali ese atu Keli mai le tulaga. Sa le mafai ona ia faatali e ta’u atu i faifeautalai e uiga i le mea na tupu! Sa iloa e ia e fia tatalo pea o ia i aso uma. ●
Ata na tusia e Tammie Lyon