Mauaina o se Molimau faataamilo i le Lalolagi
E nofo le tusitala i Iuta, ISA
O le tala lenei i le auala na ou auai ai i le Ekalesia ma amata ai ona malolosi lo’u aiga i le talalelei.
Ata na tusia e Pauline Grayson
Sa ou fanau i Sepania ma nofo ai iina mo le valu tausaga. Matou te lei o soo i le lotu, o lea sa ou le papatiso ai ina ua atoa lo’u valu tausaga, ae sa ou manao lava i ai. I se tasi aso sa ou fesili atu ai i o’u matua pe aisea na matou le toe o ai i le lotu ma pe aisea ua ou le papatiso ai.
A o ou faamalamalama atu ia i laua lo’u manao ina ia papatiso, sa ootia o la loto, ma na amata ona matou toe o i le lotu. Ese le lelei o faalogona. O lo’u tina o se faataitaiga lelei tele ma se musumusuga ia te a’u. Sa i ai sana molimau malosi ma sa masani ona faitau i tusitusiga paia.
Mulimuli ane, sa matou siitia atu i Venesuela, le atunuu e sau ai lo’u tamā. Sa matou nonofo ai iina mo le lua tausaga, ma ona o faigata i le tamaoaiga, sa matou feagai ai ma le tele o luitau. Ae sa i ai foi ni mea lelei. Sa ou fiafia tele i meaai, ma sa i ai o’u aiga iina sa naunau e feiloai ia te a’u. O i latou o ni tagata lotomaualalo, ma sa matou o uma faatasi i le lotu ma lagonaina le Agaga.
Ae e ui lava ina matou o i le lotu ma ou lagonaina le Agaga, ae sa ou iloaina sa i ai se mea na misia e lo’u aiga. Sa matuai ou lagonaina e tatau ona faamauina i matou o se aiga e faavavau. I le taeao o se tasi Aso Sa, sa valaaulia ai e le epikopo ia tagata uma i le faapotopotoga e faitau le Tusi a Mamona a o lei oo i le faaiuga o le tausaga. Sa ou iloaina o lenei mea o le a fesoasoani ai i ou matua ma a’u ina ia ola atoatoa i le talalelei a le Alii. O lea mea itiiti i lea mea itiiti, a o matou faitauina le Tusi a Mamona, sa amata ona tuuina mai e le Faaola ia i matou le malamalama ma faamanuiaga sili atu, ma sa faaauau pea ona matou faitauina e le aunoa tusitusiga paia.
E lei umi ae ou papatiso. Sa mafai moni lava ona ou lagonaina le Agaga i lo’u olaga, ma sa faapena foi ma o’u matua. Sa amata ona tuputupu ae la’u molimau. Sa matou siitia atu i Florida, ISA, ma sa tatau ona matou toe faia foi ni suiga ma ni osigataulaga se tele, e pei lava o le taimi na matou tuua ai Sepania. Ae na tuputupu ae le malosi o a matou molimau. Sa matou o i le lotu i vaiaso uma ma sa faaauau ai le faitauina o tusitusiga paia.
Ina ua mavae le tele o taumafaiga ma le tele o le faitauina o tusitusiga paia, tatalo, ma le filifilia o le mea sao, sa matou mananao e faamau o se aiga e faavavau. Sa matou talanoa i lo matou epikopo, ma e ui sa tele se taimi na alu ai, ae na iu lava ina taunuu mai le aso. Sa matou matua fiafia lava e o i totonu o le malumalu.
Sa mafai ona ou faia papatisoga a o ou faatalitali mo o’u matua e faamaea galuega o le malumalu mo i laua lava. Sa ou lagona le pei o loo ou toe papatiso. Sa matuai ou fiafia lava sa mafai ona ou fesoasoani i tagata o i tua atu o le veli. O lenei la ua matou o ma lo’u aiga i le malumalu i vaiaso uma. Ou te faia e le aunoa papatisoga aua ou te fiafia e fesoasoani ai iina. Ua ou matua fiafia lava sa mafai ona faamauina a’u i le malumalu i o’u matua mo le faavavau ma maua le avanoa e ola ai e faavavau faatasi ma i laua.