Auauna Atu Faatasi ma le Mana o le Perisitua

Saunia e Peresitene M. Russell Ballard

Sui Peresitene o le Korama a Aposetolo e Toasefululua

Mai se saunoaga o le konafesi aoao ia Aperila 2013.

I ni nai tausaga ua mavae, sa ma tilotilo atu ai ma lou toalua o Barbara ma le maofa i le lagi i le po. Sa foliga mai na tulaga ese le susulu ma le matagofie o le faitau miliona o fetu. Ona ou liliu atu lea i le Penina Tautele ma faitau le fetalaiga a le Alii le Atua ia Mose: “Ma e le mafaitaulia lalolagi ua Ou foafoaina; ma sa Ou foafoaina foi i latou mo lo’u lava faamoemoe; ma o lo’u Atalii, o lē o la’u Toatasi na Fanaua, na Ou foafoaina ai i latou” (Mose 1:33).

O le mana na foafoaina ai le lagi ma le lalolagi, o le perisitua lea. O le puna o lenei mana o le perisitua o le Atua Silisiliese ma Lona Alo, o Iesu Keriso. O le mana lea na faaaoga e le Faaola e faatino ai vavega, e saunia ai se Togiola e le iu, ma faatoilalo ai le oti faaletino e ala i le Toetu.

I le fuafuaga a lo tatou Tamā Faalelagi, e maua ai e alii le tiutetauave tupito e taitai ai le perisitua, ae e le o i latou o le perisitua. E taua tele mo i tatou le malamalama ua uma ona saunia e le Tamā Faalelagi se auala mo Ona atalii ma Ona afafine uma e maua ai faamanuiaga ma faamalosia ai e le mana o le perisitua.

O le mana lava lea e tasi o le perisitua na foafoa ai lalolagi, vanimonimo, ma le atulaulau e mafai ma e tatau lava ona avea o se vaega o o tatou olaga e fesoasoani atu ai, faamalosia, ma faamanuia ai o tatou aiga, a tatou uo, ma o tatou tuaoi—i se isi faaupuga, o le faia lea o mea o le a faia e le Faaola pe ana faapea o loo Ia auauna ia i tatou i le taimi nei (tagai i le Mataupu Faavae ma Feagaiga 81:5).

O le faamoemoega autu lava o lenei mana o le perisitua o le faamanuia, faapaia, ma faamamaina o i tatou ina ia mafai ona tatou nonofo faatasi ma o tatou aiga i le afioaga o o tatou matua faalelagi e faavavau. I lenei auala, o alii, tamaitai, ma tamaiti—e tusa lava po o a o tatou tulaga—e mafai ona auai i le galuega ofoofogia a le Atua ma Iesu Keriso (tagai i le Mose 1:39) ma olioli i faamanuiaga o le perisitua.

Tau ina ia tatou atamamai ma saili atu i le faamalolosia o o tatou lava olaga, o olaga o o tatou aiga, ma Le Ekalesia a Iesu Keriso o le Au Paia o Aso e Gata Ai e ala i le mana o le perisitua a le Atua.