Tamaitai Talavou: Faamanatuina o le 150 Tausaga

Saunia e Amanda Walters

Mekasini a le Ekalesia

O le faalapotopotoga a Tamaitai Talavou ua atoa i le 150 i le tausaga lenei, ma ua oo i le taimi e faamanatu ai! Siaki ane mea moni nei e uiga i le auala ua tupu ae ai le faalapotopotoga mai le 1870 e oo mai i le asō, po o a mea o loo faia e talavou e pei o outou i Tamaitai Talavou i le taimi lenei, ma pe mafai faapefea ona musuia outou e tamaitai i totonu o le talafaasolopito o e na faaalia le lototetele ma le faatuatua.

1870–1920

Igoa: O le Matagaluega a Tamaitai Talavou o le Asosi Toefaalelei Felagolagomai a Tamaitai sa faatulagaina aloaia i le aso 27 o Me 1870, i lalo o le taitaiga a Polika Iaga.¹ Na suia le igoa i le Asosi o le Faaleleia Tutusa o Tamaitai Talavou i le 1877.²

Faalapotopotoga ma Vasega: O le polokalama a Teine o le Ofagapi sa faatulagaina o se polokalama o le taumafanafana mo teine e 14 ma matutua atu.

Faaleleia ma le Faailoa Aloaiaina: Ua lolomiina le Tusitaulima a le Ofagapi i le 1915, ua otooto mai ai “mataupu” e fitu mo le faaleleia faaletagata lava ia: Tapuaiga, Aiga, Soifua Maloloina, Faatufugaga i Totonu o le Aiga, Gaoioiga Faamalositino, Pisinisi, ma le Auaunaga Faalauaitele.³

Mekasini ma Apitalaaga: O le lomiga muamua o le Young Woman’s Journal ua lolomiina i le 1889.⁴ E toatele Asosi o le Faaleleia Tutusa (po o MIA) i le lotoifale sa atinaeina a latou lava nusipepa sa tusitusilima ma sa na o le tasi pe lua kopi sa pasi faasolo i teine e faitau.

1920–1970

Igoa: Ua suia le Asosi o le Faaleleia Tutusa o Tamaitai Talavou i le Asosi o le Faaleleia Tutusa o Tamaitai Talavou i le 1934.⁵

Faalapotopotoga ma Vasega: E lua vasega, Teine Ofagapi mo teine laiti ma le Kilina mo teine matutua atu. Ua suia le matua e ulufale ai i le polokalama mai le 14 i le 12. I le 1950, ua faalauiloa mai le vasega a le Maea Meite.

Faaleleia ma le Faailoa Aloaiaina: O le faailoga aloaia o le Kilina Auro e faailoga ai le tulaga sili ona maualuga e mafai e tamaitai talavou ona ausia i le polokalama.

Mekasini ma Apitalaaga: O le Young Woman’s Journal ua tuu faatasi ma le mekasini o le Improvement Era mo le autalavou uma i le 1929.⁶

1970–2019

Igoa: Ua suia le Asosi o le Faaleleia Tutusa o Tamaitai Talavou i le Faalapotopotoga o Tamaitai Talavou i le 1974.⁷

Faalapotopotoga ma Vasega: E oo ane i le 1972, o le Faalapotopotoga a Tamaitai Talavou ua tolu ona vasega: Ofagapi (12–13 tausaga), Maea Meite (14 –15 tausaga), ma le Lora (16–17 tausaga). Ua amata i le 2019, e ulufale atu tamaitai talavou i le Ofagapi ia Ianuari o le tausaga e atoa i ai lo latou 12.

Faaleleia ma le Faailoa Aloaiaina: O le polokalama o le Alualu i Luma Faaletagata Lava Ia ma le pine auro (medallion) ua faalauiloa mai i le 1977. O tulaga faatauaina a Tamaitai Talavou o le Faatuatua, Amio Atua, Taua o le Tagata Lava Ia, Poto, Filifiliga ma le Tali Atu Mo A’u Lava, Galuega Lelei, ma le Amio Sa’o ua faaopoopoina i le 1987.⁸ Ua faaopoopo le Mamā i tulaga faatauaina i le 2008.⁹

Mekasini ma Apitalaaga: O le mekasini o le New Era mo le autalavou ua amata ona lolomiina i le gagana Peretania i le 1971, ae o le Liahona ua tuuina atu ai tusiga mo le autalavou i le tele o gagana.¹⁰

2020

Igoa: Ua tumau le igoa o le faalapotopotoga a Tamaitai Talavou.

Faalapotopotoga ma Vasega: O vasega ua faatulaga i uarota po o paranesi taitasi e tusa ai ma ona manaoga ma iloa lava i le faailoga autasi “Tamaitai Talavou” (mo se faataitaiga, “Tamaitai Talavou 12,” “Tamaitai Talavou 12–15,” po o le na o le “Tamaitai Talavou” pe afai latou te faapotopoto faatasi uma).

Faaleleia ma le Faailoa Aloaiaina: Ua suitulaga le Tamaiti ma Talavou i le polokalama Alualu i Luma o le Tagata Lava Ia. Ua uunaia e le polokalama fou ni avanoa patino e tuputupu ae ai i vaega o Atinaega Faaletagata Lava Ia, Aoaoina o le Talalelei, ma le Auaunaga ma Gaoioiga.¹¹

Mekasini ma Apitalaaga: O le mekasini o le New Era mo le autalavou ua latalata i le faailogaina o lona 50 tausaga.

O Mea Malie Moni

I le 1915, o le Tusitaulima a le Ofagapi na faatagaina tamaitai talavou e filifili ni galuega faatino mai le silia ma le 300 ni filifiliga eseese. O nisi o na galuega faatino sa aofia ai le tausiga o ni ofaga o pi mo se vaitau atoa, o le tausisia ia leai ni lago i totonu o le fale mo le lua vaiaso, po o le faamamaina o se togavao mai le fasifanua ia le itiiti ifo ma le tasi le afa eka.¹²
O Uluai Teine o le Ofagapi sa ofuina ni toniga na mamanuina e asosi i le lotoifale, ma i le 1922, na avea ai le lanu auro ma le lanu meamata ma lanu aloaia o le Asosi o le Faaleleia Tutusa.¹³
O le igoa o le Ofagapi na aumai mai paionia, o e na vaai i le Ofagapi o se faailoga o le galue ma le lotogatasi. O le Maea Meite na aumai mai le faapuupuuga o le (Mutual Improvement Association, MIA) Asosi o le Faaleleia Tutusa. O le igoa o le Lora e faasino i le pale laulaau lora, o lona uiga o le mamalu ma le tulaga ausia.¹⁴
I le vaitau o le 1940 ma le vaitau o le 1960, sa mafai ona ausia e tamaitai talavou ni pine na latou suiina i luga o se fusi sa ta’ua o se panetelo [bandelo], lea sa latou asoaina i o latou fatafata. O se tasi o tulaga manaomia e maua ai se pine o le “taumafai ia maua atoa lelei le iva o itula o moe faaaulelei i po uma o le masina lenei.”¹⁵
O le faitauaofai o tagata o le Ekalesia Aoao na faateleina mai le tusa ma le 110,000 i le 1870¹⁶ i le silia ma le 16 miliona tagata e oo mai i le 2020¹⁷—mafaufau la i le toatele o tamaitai talavou o loo i ai i le lalolagi i le taimi nei!

Ata o se tamaitai talavou o loo asoaina se pine auro (medallion) o le Alualu i Luma Faaletagata Lava Ia na saunia e Alicia Cerva