O Lima Fesoasoani o Eli
E alala le tusitala i Iuta, ISA.
“E tele feau a ou lima mama” (Tusipese a Tamaiti, 126).
O le taeao o le Aso Toonai, ma sa faapupuu Eli i totonu o le pusa o le kouli, ma sauni e puna. Sa oso ma faapau, ma taumafai i le mea e sili e taofiofi le polo i fafo o le neti. Ae sa faigata! Na toetoe lava a uma le taaloga, ae se’e atu loa le polo pasi atu i ona lima. Sa sikoa le isi au! Sa faiaina le au a Eli. Sa matuai faanoanoa lava o ia.
O le aso na sosoo ai i le lotu, na savali lemu atu ai Eli i lana vasega Peraimeri, sa ia lagona pea le faanoanoa.
Sa vaai Eli i lana uo o Keiti i fafo atu o le potuaoga. Na tulei e le tina o Keiti le nofoa faataavalevale piniki o Keiti i totonu. Sa ia opoina Keiti a o lei alu i lana lava vasega.
“Talofa, Keiti,” o le tala lea a Eli.
Sa le mafai ona tali pe talotalo atu Keiti, ae sa tilotilo totoa o ia i mata o Eli ia iloa ai ua na lagona atu o ia
E masani lava ona ataata Keiti i le taimi e fai atu ai ia Eli, ae e le o nei. Pe ua faanoanoa Keiti? Sa mafaufau ai Eli. Ou te iloa lena lagona. Sa lagona pea e ia le faanoanoa ona sa lei taofia e ia le isi au mai le sikoa i le kouli manumalo.
Sa nofo Eli i talaane o Iuana ma Makeli a o amata e Tuafafine Iaga le vasega. Ona masūsū lea o Keiti. O nisi taimi sa faigata ia Keiti ona nofo filemu ona sa tiga lona tino.
“Keiti, o e tiga nei?” Sa fesili atu ai Tuafafine Iaga.
Na amata ona tagi Keiti.
“Atonu o le a fesoasoani se pese a le Peraimeri,” o le tala lea a Tuafafine Iaga.
Sa amata ona pepese le vasega. O Keiti e fiafia i musika. E masani lava ona ia usuina e ala i le faia o ni leo fiafia. Ae o nei, na o le tagi lava o Keiti.
E mafai faapefea ona tatou fesoasoani ia lelei lagona o Keiti? Sa mafaufau ai Eli.
Ona oo ifo lea o se manatu i lona mafaufau. “Ua ou iloa!” Sa ta’u atu e Eli ia Tuafafine Iaga. “O le a ou tuleia laitiiti le nofoafaataavale o Keiti.”
Sa vaai Eli i le ala na tulei lemu ai e le tina o Keiti lona nofoa pe a manaomia ona faaleleia ona lagona. Sa ia faanatinati atu ia Keiti ma amata ona faalue lemu i tua ma luma lona nofoa.
Sa le toe tagi Keiti.
“E mafai ona ou tuleia?” Na fesili ai Iuana.
“Ma a’u foi!” Na fai mai ai Makeli.
A o aoao atu e Tuafafine Iaga le lesona, sa feauauai Eli ma ana uo e tulei le nofoafaataavale o Keiti. Sa ataata Keiti. Sa foliga susulu mai le potu atoa.
E oo ane i le faaiuga o le vasega, ua ataata tagata uma.
“O le fesoasoani ia Keiti ou te maua ai le fiafia,” o le tala lea a Eli.
“Ua ou fiafia,” o le tala lea a Tuafafine Iaga. “E fiafia ai foi le Tamā Faalelagi. E alofa o Ia ia Keiti ma e manao ia ona maua lagona lelei. O nisi taimi e avea ai i tatou ma Ona fesoasoani.”
Sa tilotilo atu Eli ia Keiti. “E te fesoasoani foi ia te au,” na ia ta’u atu ia te ia. “I taimi uma lava e te ataata ai.”
Sa ataata Keiti.
A o alu atu Eli i le fale mai le lotu, sa ia lagonaina le mafanafana e pei o se malae taalo soka i le aoauli o se aso o le taumafanafana. Atonu e le mafai ona ou pueina uma polosoka, sa ia manatunatu ai. Ae e mafai pea ona ou faaaogaina o’u lima e fesoasoani ai i tagata. ●
Ata na tusia e Melissa Manwill