O le a le tulaga o le Ekalesia i le faailoga lanu?
Tatou te talitonu o le Atua o le Tamā o tagata ola uma ma “e le faafitia e ia se tasi e sau ia te ia, [o] lanu uliuli atoa ma le paepae … ; ma ua tutusa tagata uma i le Atua” (2 Nifae 26:33). Ona e tutusa tagata uma i luma o le Atua, tatou te talitonu e leai lava se tagata e mafai ona sa’o ona faapea mai e sili atu o ia i se isi ona o o latou lanu po o atunuu e o mai ai. E le gata i lea, tatou te talitonu o le agasala le vaai maualalo, ta’ufaatauvaaina, po o le faaeseina o isi ona o o latou lanu.
Ua ta’usalaina e perofeta ma aposetolo o aso nei le faailoga lanu i faaupuga sili ona malolosi. Mo se faataitaiga:
-
Peresitene Gordon B. Hinckley (1910–2008): “E leai se tagata na te faia ni faaupuga soona lafo ia i latou o se isi lanu, e mafai ona manatu o ia o se soo moni o Keriso. E le mafai foi ona faapea ua ogatasi o ia ma aoaoga a le Ekalesia a Keriso.”1
-
Peresitene M. Russell Ballard, Sui Peresitene o le Korama a Aposetolo e Toasefululua: “E tatau ona tatou taliaina fanau a le Atua ma faaitiitia soo se faaituau, e aofia ai le faailogalanu, faailoga tagata i itupa, ma le manatu faapito.”2
-
Peresitene Dallin H. Oaks, Fesoasoani Muamua i le Au Peresitene Sili: “O le faailoga lanu atonu o le punavai aupito taatele lea o le faailoga tagata o aso nei, ma ua valaauina i tatou uma ia salamo i lena mea.”3