O le Faaaliga o le Kekemasina
“Ou te le tuua outou o matuaoti: ou te sau ia te outou” (Ioane 14:18).
“Aua e te soona tamoe i luma!” O le valaau lea a Tama. “Ua amata ona pogisa, ma ou te le manao e te pa’ū.”
Sa tu Vincent ma toe faasaga i tua. “Ae ua lemū tele lau savali. Ou te fia oo i le faaaliga a o lei uma kekemasina!”
“O le a le mafai ona uma a latou kekemasina,” o le tala lea a Tamā a o la savavalI atu ma Tinā. “Ia o le mea sili, [e le uma] seiiloga e te oo atu i o!”
Sa mafai ona lagona e Vincent le sasaina o talipalau a o latou latalata atu i le paka. O manoa molimatagi felanulanuai na tautau mai laau, ua faamalamalamaina ai le po pogisa. Sa aai aiga i luga o palanikeke, ma sauni e matamata faatasi i le masina ua atoa.
Sa maua e tina se nofoaga avanoa i luga o le mutia ma fofola i lalo lo latou palanikeke. Sa ia tuu ia Vincent ni tupe siliva e faatau ai ni meaai.
“Faafetai!” Sa le mafai ona faatali Vincent i le fia alu e matamata. Sa ia faitauina ana tupe siliva ao ia savali. Luasefulu tupe siliva! Na lava lena mo se kekemasina. Ae o le a le ituaiga na ia manao i ai? Fasipuaa? Lega fuamoa? Tuliani [Durian]? Mulimuli ane na ia pikiina se tasi na tumu i kulimi sesamī [sesame] uliuli. Sa ia fealualuai solo mai lea faleaiga i lea faleaiga ao ‘ai o ia, ma sioa atu i meaai eseese. Fatufatugā moa i luga o tui. Ulo tetele o suavai supo feū ma saimini. Atonu e mafai ona ia faataua se nutigā aisa ma aisa kulimi mai ana tupe siliva mulimuli!
E lei umi ae ia savalivali atu i se eria lea sa lei tele ni molimatagi na i ai. Na tuu atu ia te ia e le pogisa se manatu.
Faamata o le a le mamao e mafai ona ou savali ai ma o’u mata e moeiini? Sa moeiini ona mata ma laa tasi loa. Sosoo ai ma le isi. Ona taia lea o lona vae i se mea. Sa pa’ū o ia!
Auoia! Sa tau lona auvae i se mea maai. O se tapuni o se alavai uamea telē! Sa aapa atu o ia ma pai atu i lona auvae. Sa lavatoto o ia.
“Tamā? Tinā?” sa valaau atu ai o ia. Sa ia toe faanatinati atu i molimatagi, ma sa fesoasoani se tasi ia te ia e saili ona matua.
“Sa amata ona ma popole!” Na fai atu ai Tinā. Ona ia tilotilo atu lea i ona foliga. “E tatau ona tatou o i le falema’i.”
E lei umi ae saofafai Vincent ma Tinā ma Tamā i le potu faatalitali o le falemai. Sa matuai fefe lava o ia. Pe o le a manuia o ia?
Sa ia piilima ma mafaufau ia Iesu. Sa papatisoina o ia ma lona aiga i nai masina ua mavae. Sa fai mai faifeautalai e mafai e Iesu ona fesoasoani ia te ia e lagona ai le mafanafana.
O le a fesoasoani Iesu Keriso ia te au. O le a fesoasoani mai Iesu Keriso ia te au, sa ia mafaufau ai pea lava pea. Ma e lei umi ae ia lagonaina le toafilemu. Sa peisea’ī na i ai le Agaga Paia i ona tafatafa.
Sa oomi e Tamā lona lima.
“O le a lelei mea uma,” o le tala lea a Tinā.
Na luelue le ulu o Vincent. Sa ia iloa na sa’o o ia.
Ina ua sau le fomai, sa ia su’iina lona auvae. E tiga, ae e lei tiga tele. Sa ia tau atu ia Vincent atonu o le a i ai sona maila. Ae sa le afaina lena mea ia te ia. Soo se taimi lava na te vaai ai i ai, o le a ia manatua ai kekemasina, le faaaliga, ma se taimi sa ia lagonaina ai le faamafanafanaina e Iesu ma le Agaga Paia. ●