PŌPOAKI MEI HE KAU TAKI FAKAʻĒLIÁ
Ko e Māfana ʻo e Ongoongoleleí
Kuo hoko mai ʻa Sune, pea ʻi Nuʻusila ní, kuo ʻi ai ha ngaahi pongipongi momoko mo e tatapa ʻo e tō ʻa e sinoufeleikí ʻi he tonga mamaʻó ke fakamanatu mai kuo aʻu mai ʻa e mokomoko ʻo e faʻahitaʻu momokó. ʻI heʻeku kei tamasiʻí ʻi hoku ʻapi ʻi Te Aroha, ʻa ia naʻe tuʻu ʻi ha veʻe moʻunga māʻuiʻui, ne fakamoʻui e afi ʻi peitó he pongipongi kotoa pē ke fakamāfanaʻi e peitó mo haka ha kulo polisi ki he maʻu meʻatokoni pongipongí.
Naʻá ku fakakaukauloto ki ha toe meʻa te ne lava ʻo fakamāfanaʻi kimautolu—ʻo ʻikai ngata pē ʻi he ngaahi māhina ʻo e faʻahitaʻu momokó—pea naʻá ku fakakaukau ki he ʻMāfana ʻo e Ongoongoleleí.’
ʻOku tokoni ʻa e ngaahi akonaki ʻo e ongoongoleleí ke mahino kiate kitautolu pe ko hai kitautolu pea ʻokú ne ʻomi ha ongoʻi māfana ʻo e kau fakatahá. ʻOku ou hangē pē ko kimoutolú, ʻo hoko ko ha fānau ʻofeina ʻo ha Ongomātuʻa Fakalangi ʻokú Na tokangaʻi kitautolu pea ʻokú Na finangalo ke tau lavameʻa ʻi heʻetau fononga ʻi he moʻui fakamatelié. Naʻá Na ʻafioʻi, mei he kamataʻanga ʻo e palani ʻa e Tamaí, ʻe faingataʻa e fonongá, pea naʻá na ʻafioʻi foki ko e founga pē ia ʻe lava ke tau tupulaki mo hoko ai ʻo hangē ko hotau Fakamoʻuí. ʻOku lava ke tau ongoʻi he taimi kotoa pē ʻa e māfana ʻo e ʻofa ʻa ha Ongomātuʻa Fakalangi, kae tautautefito ki he ngaahi taimi fie maʻu vivilí.
ʻOku maʻu ʻa e māfana lahi ange ʻi heʻetau fakahoko mo tauhi ʻa e ngaahi fuakava toputapú, ʻa ia ʻoku malava ke fakahoko ʻi he Lakanga Fakataulaʻeiki ʻa e ʻOtuá kuo fakafoki maí. Neongo pe ko e hā e ngaahi faingataʻa ʻoku tau feʻao mo iá, pea ʻoku lahi fau ia, ka ʻoku tau maʻu ha fakapapau te tau lava ʻo toe moʻui ʻi he māfana ʻo e ʻofa ʻa e ʻEikí, ʻi he taimi ʻoku fakahoko mo tauhi ai ʻa e ngaahi fuakavá.
Neongo e momoko ʻa e pongipongi Sāpaté, ka ʻoku mau ongoʻi māfana ʻi heʻemau hū atu ki falelotú, pe ʻoku langa ʻaki ia ha piliki pe lauʻi paame, ka ʻoku mau ongoʻi e talitali loto-māfana ʻo homau kāingalotú. ʻOku ʻikai hamau taha ʻe haohaoa ka ʻoku mau fakaʻamu kotoa ke mau toe lelei ange pea mau sio ki he holi ko iá ʻoku hāsino ia ʻiate kimautolu. ʻOku omi mateuteu e kāingalotú ki he ngaahi fakatahaʻanga ʻa e Siasí ke vahevahe ʻenau fakakaukaú, fai ha malimali fakalotolahi pea mo fakamoʻoni ʻaki ʻenau kau maí, ʻoku mau kaungā kau fakataha ʻi he Ongoongolelei ʻo Sīsū Kalaisí. Tau fakapapauʻi maʻu pē ʻi hotau ngaahi koló mo e uōtí ʻoku ‘ʻikai ai ko e kau muli mo e kau ʻaunofo ʻa kimoutolu, ka ko e kaungā kolo mo e kāinga māʻoniʻoni, pea mo e fale ʻo e ʻOtuá’ (ʻEfesō 2:19).
ʻOku toe māfana ange homau lotó ʻi heʻemau tangutu ʻi heʻemau houalotu sākalamēniti fakauiké ʻo maʻu ʻa e ongo fakaʻilonga ʻo e sākalamēnití ko ha fakamanatu ʻo e feilaulau ʻaki ʻe he ʻEikí ʻa Hono sinó mo e taʻataʻa naʻá Ne foaki maʻatautolu kotoá. ʻOku māfana moʻoni homau lotó ʻi hono ʻofeina lahi kitautolu ʻe Sīsū Kalaisi ʻo Ne fakahoko ai ha feilaulau Fakalelei maʻatautolu.
ʻOku toe fakamaama foki ʻe he folofolá ʻa e halá mo fakamāfanaʻi ʻa e laumālie ʻo kinautolu kotoa pē te nau fakatapui ha kiʻi taimi he ʻaho takitaha ke ʻako ʻiate Ia.’ ʻOku hanga ʻe heʻetau ako ‘a e ngaahi akonaki ʻa Kalaisí ʻo tekeʻi atu ʻa e fakapoʻulí kae huluʻi mai e maama fakamāfana ʻo Kalaisí ki hotau laumālié.
ʻOku tau fiefia ʻi he tupulaki ʻa e melino naʻe talaʻofa mai ʻe he Fakamoʻuí pea ʻoku fakamāmaʻi kitautolu ʻe he ngaahi lea ʻa e kau palōfitá ʻi heʻetau ʻfanongo’ ki he fakahinohino ʻa e ʻEikí.
ʻI he foki hotau temipalé ke ngāue kakató, ʻoku tau mamata ki heʻenau maama he poʻulí ko ha fakaafe loto-māfana ia ke tau feʻunga ke hū ki he Fale ʻo e ʻEikí, ʻa ia ʻoku tau ongoʻi ai ʻa e māfana mo e fakafiemālie ʻa e ʻEikí ʻi heʻetau ako lahi ange kau kiate Ia mo fakahoko e ngaahi fuakava toputapú.
ʻOku ou houngaʻia ʻaupito koeʻuhí ko ha kiʻi fale papa ʻi ha veʻe moʻunga ʻokú ne fakamanatu mai ʻoku aʻu pē ki he ngaahi pongipongi momoko ʻo e faʻahitaʻu momokó, te ta kei lava pē ʻo maʻu ʻa e ‘Māfana ʻo e Ongoongoleleí’ ʻi heʻetau moʻuí.