Ngaahi Peesi Fakalotofonuá
Ke Fai pē Ho Finangaló
Naʻe akoʻi kitautolu ʻe Sīsū ke tau lotu ʻi he tui mo e falala kakato ki he ʻOtuá. Naʻá Ne fakahinohinoʻi ʻene ʻuluaki kau ākongá, “ʻO ka mou ka lotu, mou pehē, . . . Ke hoko mai hoʻo pulé. Ke fai ʻa māmani ki ho finangalo, ʻo hangē ʻi he langi” (Luke 11:2).
Ko e ngaahi foʻi lea mahuʻinga hení ko e, “Ke fai ho finangaló.”
ʻOku fakanatula pē ke tau hohaʻa ki heʻetau ngaahi fiemaʻu fakatāutahá, ko ia ʻoku ou tui ʻoku tau faʻa liʻaki e fakahinohino ko ʻení. Pe taimi ʻe niʻihi ʻoku tau pehē, “Ke fai ho finangaló,” ʻo hangē ko ha meʻanoa pē, ka ʻoku ʻikai totonu ke pehē ia.
ʻOku tokaimaʻananga mo māfimafi ʻa e ʻOtuá. ʻOku tau fakavaivai ki Hono finangaló he ʻokú Ne mahu ʻi he ʻofa taʻe-fakangatangata mo e ʻilo taʻengata ʻoku fie maʻu ke fakaleleiʻi ʻaki ʻetau ngaahi fiemaʻú ʻi he founga totonú. Ko e falala ko ia ki Hono finangalo maʻatautolú ko ha maka fakavaʻe ia ʻo ha ngaahi lotu ʻoku ola lelei.
Naʻe faʻifaʻitaki ʻe hotau Fakamoʻui ko Sīsū Kalaisí ʻa e akonakí ni ʻi he taimi naʻá Ne faingataʻaʻia ai ʻi Ketisemani ʻi he kavenga mamafa ʻo e ngaahi angahala ʻa e māmaní, naʻá Ne tautapa, “ʻA ʻeku Tamai, kapau ʻe faʻa fai, pea ʻave ʻa e ipú ni ʻiate au: kae ʻoua naʻa faʻiteliha pē au, ka ko koe pē” (Mātiu 26:39).
Mahalo he ʻikai ke tali mai maʻu pē ʻetau ngaahi lotú ʻi he founga ne tau ʻamanaki ki aí, ka ʻi he taimi ʻoku tau tuku ai ke ikuna Hono finangaló, kuo talaʻofa mai ʻe heʻetau Tamai ʻi Hēvaní ha nonga ʻi he ngaahi taimi faingataʻá.
ʻI ha efiafi ʻe taha naʻe puke lahi ai ʻeku tangataʻeikí, naʻá ku tūʻulutui ʻi hoku veʻe mohengá ʻo lotu ʻaki e ivi kotoa ʻo hoku lotó mo e laumālié ki he ʻEikí ke Ne tokoniʻi au ke u ʻiloʻi e meʻa ke u fai ke tokoni ai ki heʻeku tangataʻeikí. Naʻá ku lotu ʻaki ʻa e tui mo e falala kakato ki heʻeku Tamai Hēvaní. Ne u lotu peá u kiʻi mālōlō, peá u lotu, peá u toe kiʻi mālōlō, ʻo feinga moʻoni ke tukutaha ʻeku fakakaukaú. Naʻá ku feinga moʻoni ke u tokanga ki he Laumālie Māʻoniʻoní.
Hili iá ne u maʻu leva ha ongo, peá u pehē loto pē, “ʻOkú ke toutou kole pē ki he ʻEikí ke Ne ʻoatu ʻa e meʻa ʻokú ke loto ki aí. Kae fēfē e meʻa ʻokú Ne finangalo ki aí?”
Ko e ngaahi kupuʻi lea hoko leva ne u lea ʻakí ko e, “Tamai Hēvani, ʻoku ou fie maʻu moʻoni ke moʻui ʻeku tamaí. ʻOku ou loto-moʻoni ke ne nofo heni mo kimautolu. Ka ʻo kapau ʻoku ʻikai ko hoʻo palani ʻeni maʻaná, pea ʻoku ou loto-fiemālie pē ke tukuange ia. ʻOku ou fiemālie pē ke tali ho finangaló.”
Naʻe folofola mai e ʻEikí ki hoku lotó ʻo Ne pehē mai, “ʻE hoku ʻofefine faivelenga, koeʻuhí ʻokú ke loto-fiemālie ke tali Hoku finangaló kae ʻikai haʻaú, ʻe fakafiemālieʻi mo tāpuekina ʻaki koe ʻa e melinó.”
ʻI he pongipongi hono hokó, ne foki ai siʻeku tamai ʻofá ki heʻetau Tamai Hēvaní . . . pea ne u ongoʻi ha ongo fakaʻofoʻofa ʻo e nonga mo manavaʻofa ʻi hoku lotó. Ne u ongoʻi ʻa e ʻofa haohaoa ʻa e ʻOtuá maʻakú.
Neongo naʻá ku loto-mamahi, ka naʻe fakamolū ʻe he ʻEikí ʻa e faingataʻá peá Ne ʻai ke faingofua ange ʻeku kātekina ʻa e mamahí. Ne hokohoko atu ʻeku ongoʻi ʻEne fakafiemālié ʻi ha ngaahi founga kehekehe, pea naʻe fakafou ia ʻi hoku ngaahi kaungāmeʻa tokolahi mo e kau mēmipa ʻo e fāmilí. Ne u ongoʻi mohu tāpuekina, ʻo hangē pē ko e meʻa ne talaʻofa mai ʻe he ʻOtuá.
Ne u toe fai ha lotu ʻo fakamālō kiate Ia pea mo fakahā ʻeku ʻofa lahi kiate Iá.
ʻOku hounga moʻoni kiate au ʻa e meʻaʻofa mahuʻinga mo fakaofo ʻo e lotú. Ko ha tāpuaki moʻoni ʻa e fetuʻutaki mo ʻetau Tamai ʻi Hēvaní. Fakatauange te tau maʻu ʻa e tui ke tali Hono finangaló ʻi he meʻa kotoa pē, pea falala ʻe tokoniʻi kitautolu ʻe Heʻene ʻofa fakalangí ʻi he ngaahi faingataʻa kotoa pē ʻo e moʻuí.