E Na’o Tusiga Faatekinolosi: Talavou Matutua
Ae Faapefea Pe Afai e Le Mafai ona Ou Fai Atu “Ua Ou Iloa”?
Po o le a lava le malosi o lau molimau, o loo i ai se nofoaga mo oe i le Ekalesia.
O lau molimau e aofia ai ni vaega se lua: o mea ou te iloa e moni ma mea ou te talitonu e moni.
Iloa ma talitonu: ou te faaaogaina upu uma e lua pe a ou faasoa atu lau molimau.
O nei upu e taua ia te au—e le faapea ona o lenei gagana eseese o se vaaiga sao lea i lou faatuatua, ae ona e faamanatu mai ai ia te au ou te le manaomia se malamalama atoatoa o aoaoga faavae uma po o se tali atoatoa i fesili uma i le talafaasolopito o le Ekalesia ina ia mafai ai ona tautino atu lou talitonuga i le talalelei toefuataiina a Iesu Keriso.
O loo i ai se nofoaga i le Ekalesia mo tagata uma, e tusa lava po o le a le malosi o a latou molimau. Ae o nisi o i tatou i le Ekalesia e i ai se masani e faatusatusa a tatou molimau i molimau a isi—aemaise lava pe afai tatou te tauivi ma ni fesili po o ni masalosaloga i tulaga ia e foliga mai e molimau ai isi ma le mautinoa. O nisi taimi pe a ou faalogo i tagata o le Ekalesia o folafola mai i le pulelaa mea ua latou iloa e moni, ou te toe mafaufau ai i lau lava molimau—ma molimau i le lautele.
“Ae faapefea pe afai e le mafai ona ou fai atu ‘ua ou iloa’?”
“Ae faapefea pe afai e i ai ni au fesili—ma e oo lava i ni masalosaloga—e uiga i nisi o vaega o le talalelei?”
“Pe o i ai se nofoaga mo au i le Ekalesia?”
O se tasi o tala i le Feagaiga Fou ua aumaia ai ia te au se faamautinoaga maoae o faamanuiaga o le talalelei o loo avanoa mo i latou uma o e tuu atu lo latou faatuatua ia Iesu Keriso. Sa aumai e se tagata lona atalii ma’i ia Iesu, ma fesili, “Afai e te mafaia soo se mea, ia e alofa mai ia te i matou, ma fesoasoani mai ia te i matou.”
Sa tali Iesu, “Afai ua e mafaia ona talitonu, e mafaia mea uma lava i le talitonu.”
Ona tuuina mai lea e le tamaloa se tali tau le mautinoa, o se tali lea na tau mai ai sa i ai lona faatuatua faatasi ma se vaega o le le talitonu: “Ona alaga atu ai lea o le tama ma loimata, ua faapea atu, le Alii e, ua ou faatuatua; ia e fesoasoani i lou le faatuatua.”
Ona faamalolo lea e Iesu o le tamaitiiti. (Tagai Mareko 9:14–27.)
E lei manaomia e Iesu i le tagata le malamalama atoatoa a o lei faia e Ia se vavega. E Iei finau foi o Ia e uiga i le faatuatua e le maluelue. O le tagata na talosagaina le faamalologa a le Faaola, i luga o lona atalii na faaalia lona faatuatua ma, i le mea na leai, o se manao e talitonu.
Ae na lava lea mo Iesu.
O lenei lesona e fetaui foi ia i tatou o loo sailia le mana faamalolo o Keriso i o tatou olaga i aso nei. E pei ona faamanatu mai e perofeta ma aposetolo o aso nei ia i tatou, o le manao ia talitonu ua lava lea o se vaega e amata ai.1 Ioe, e tatou te saili e faamalosia a tatou molimau; tatou te faamoemoe mo se talitonuga malosi e tupu ae i se malamalama atoatoa (tagai i le Alema 32:21–22, 26–34). A o faatali mo lena, o se faamoemoe o loo i ai folafolaga o le talalelei a Iesu Keriso e moni ma o se manao e talitonu ua toefuatai mai le talalelei i le lalolagi e ala i perofeta o aso nei ua lava mo i tatou e agai atu ai i luma i le faatuatua.
O le a la se mea e mafai ona e faia pe afai e te le lagonaina e mafai ona e fai atu “ua ou iloa”? E mafai ona e mautinoa o loo i ai se nofoaga mo oe i le Ekalesia a Iesu Keriso. E mafai ona e faailoa atu ma le mautinoa lau molimau e tusa ai ma mea e te talitonu i ai e moni—ma e oo lava i tulaga o mea e te faamoemoe e moni—o le mea lea, a o tatou aai ma feinu i faamanuiaga o le talalelei. Ma e mafai ona tatou valaau atu e le aunoa i le Atua i le tatalo, ma faapea atu, “Fesoasoani mai lau afio i lou le faatuatua,” ma matau Lona alofa e oo mai i o tatou olaga ma tatala mai Ana vavega.