O Leo o le Au Paia o Aso e Gata Ai
Faafetai ua E Toe Foi Mai, Christine
O le valu tausaga talu ona maliu lo’u tama, na faamanatu mai ai le alofa o le Atua ia te au.
Ata o le Malumalu o Lonetona Egelani na pueina e Chris Wills
Sa na o le 19 o ou tausaga ae maliu lou tama i le aso 20 o Iuni, 2010. O le Aso o Tama i le Iunaite Setete. O le maliu o lo’u tama na galulu ai lo’u faamoemoe, ma faifaimalie ai ona ou le toe alu i la’u lotu. E faapefea ona ou alu i le lotu ma ole atu i le Atua mo le taitaiga ae sa lei faafofoga mai o Ia ia te au i le taimi na sili ona ou manaomia ai o Ia? Sa ou lagonaina na Ia lafoaia au.
I ni nai tausaga mulimuli ane, sa ou siitia atu i Lonetona, Egelani, mo aoaoga i se iunivesite. I lau savali atu agai i le lotoa i se tasi aso malulu ma na pau ai le kiona, sa ou faalogologo i se tala faamusika i au meafaalogo ae oo mai loa ni faifeautalai se toalua ma faailoa mai i laua.
Sa fesili mai Elder Hathaway ma Porter po o le a le mea sa ou faalogologo i ai. Ina ua ou tau atu ia i laua sa ou faalogologo i le tala faamusika O Le Tusi a Mamona , sa matuai tetei i laua. Ona faasoa mai lea e faifeautalai e toalua a la molimau e uiga i le tusi, ma aumai ia te au se kopi. Ina ua amata ona ou faitauina le Tusi a Mamona, sa ou iloa ai atonu na aumai e le Atua ia te au se faailoga, ma tau mai ia te au ua oo i le taimi e toe foi atu ai ia te Ia—ae i se auala fou.
O le aso na sosoo ai na aoaoina ai au e faifeautalai i le fuafuaga o le faaolataga. I le taimi o lena lesona, na fai mai ai Elder Porter, “I le iuga, o le a tatou maua le avanoa e toe faatasi ai ma o tatou aiga.” O le aoaoga faavae aupito sili lena ona mamana na ou faalogo i ai. O le a ou maua le avanoa e toe faatasi ai ma lo’u tama. Sa ou iloaina i lena lava taimi ou te fia aoao atili . Sa amata ona toe foi malie mai lo’u alofa ma lo’u faatuatua i le Atua.
I le aso 15 o Aperila, 2018, na papatisoina ai au. O le a ou manatuaina pea le mafanafana o le vai. Na pei lava na aumai e le Atua se opo lapoa ia te au ma faapea mai, “Na Ou misia oe, Christine. Faafetai ua e toe foi mai.” Sa mamalu lava le faamanatu mai o le alofa o le Atua. Sa faafeiloai foi au e le Uarota Muamua o Hyde Park ma fesoasoani ia te au i lau malaga.
Afai sa e fesili mai ia te au i le sefulu tausaga ua mavae pe mafai ona ou toe alofa i le Atua, atonu o le a ou fai atu, “Leai!” Ae o le aoaoina [o au] i le fuafuaga o le faaolataga a le Atua na suia ai lena mea.
E lei leva, ae ou alu i le Malumalu o Lonetona Egelani, ma ave le igoa o lou tama. Ina ua papatisoina se tasi ma faamauina e fai ma sui mo lo’u tama, sa ou iloaina ua tasi le laasaga ua ou latalata atili atu ai e toe faatasi ma ia.
Ua ou iloa o le a toe faatasia i ma’ua ma lo’u tama. O le taimi nei, ua lauusiusi lo’u alofa i le Atua i aso uma.