O Leo o le Au Paia o Aso e Gata Ai
Faamanuiaina o O’u Tuaa
Ina ua maua lo’u faamanuiaga faapeteriaka, sa faatumulia lou loto i le alofa mo ou tuaa.
Ata na pueina e Richard M. Romney
Sa ou fanau i Cameroon, o le atunuu o o’u tuaa. Ona ou malaga atu lea i Farani, lea sa ou nofo ai, aoga ai, ma faigaluega ai o se tausimai i falemai eseese i Pale. O lenei ua ou nofo i Montreal, lea o loo ou faigaluega ai lava o se tausimai.
Sa ou sailia le Ekalesia moni a Iesu Keriso mo le tele o tausaga. Ina ua ou feiloai i faifeautalai i Pale, sa molimau mai le Agaga Paia ia te au, ua iu lava ina ou maua le mea sa ou sailia—O Le Ekalesia a Iesu Keriso o le Au Paia o Aso e Gata Ai. Sa faatumulia au i le olioli tele o lea sa ou manatu ai ua ou i ai moi lava i le lagi! Sa ou naunau e ola i le talalelei i le atoatoa.
Sa aoaoina au e saili mo o’u tuaa ma faia sauniga mo i latou e fai ma o latou sui i le malumalu. Ina ua maua lo’u faamanuiaga faapeteriaka, sa tau mai ia te au o le a avea au ma se faaola i le Mauga o Siona ma aumaia le faaolataga i lo’u aiga. Sa faatumulia lo’u loto i le alofa mo i latou; sa le mafai ona ou faia se mea e tuu ai i latou i lalo. Talu mai lena taimi, ua ou galue ai ma le le faavaivai i talafaasolopito o aiga ma gafa.
Sa ou iloaina lava sa ou fanau mai i se aiga tautupu o Cameroon, le aiga o Bamoun. Fai mai upu tuutaliga ma talatuu o nei tagata na omai mai Asuria ma fefaaipoipoai ma isi tagata i taimi o latou faigamalaga. Ua latou tausia o latou gafa ma tusia o latou talafaasolopito talu mai le TA 1300. O pepa o faamatalaga o loo i totonu o le potutusi o le maota tautupu. Faatasi ai ma le tele o isi talafaasolopito, o loo faamatala ai le tala o le tama o le tamamatua o lo’u tina o Fon-gouhouo, lea na nofotupu mai le 1818 i le 1863.
Sa mafai ona ou toe foi atu i lou atunuu moni, ma i le avea ai o se tasi o le aiga o Bamoun, sa tuuina mai ia te au le avanoa e faaaoga ai nei pepa o faamatalaga. Sa ou asiasi atu foi i le tupu, feiloai ma isi taitai o le malo, ma talanoa i taitai e uiga i le Ekalesia ma lona fiafia i talafaasolopito o aiga. Ou te faafetai lava, faafetai i le talalelei toefuataiina, ua mafai ai ona fai la’u vaega ina ia faamanuiaina ai lo’u atunuu ma o’u tuaa.