O Le Ala Ua Faamalosia Ai Lo’u Faatuatua i le Iloa o le Perofeta o Iosefa
O soifuaga o Iosefa Samita ma isi uluai tagata o le Au Paia e le ese mai i o tatou lava olaga. O o latou aafiaga e mafai ona faamalosia ai o tatou faatuatua.
O Iosefa ma Ema ma Pepe Alevini, saunia e Liz Lemon Swindle, e le mafai ona kopiina.
O le taimi muamua na amata ai ona ou galue i Pepa a Iosefa Samita i le 11 tausaga ua mavae, sa i ai sau molimau malosi o Iosefa Samita o le Perofeta o le Toefuataiga. Ae peitai, na foliga mai na toetoe lava pei Iosefa o se tagata faafaagogo ia te a’u—o se tagata sa maualuga lava le faaleagaga ma sa faigata ona ou fesootai ia te ia. Sa ia mauaina ni asiasiga ofoofogia mai tagata faalelagi, e aofia ai lo tatou Tama Faalelagi ma lo tatou Faaola, o Iesu Keriso. O a’u, i le isi itu, sa faigata i nisi taimi ona ou lagona le alofa o le Atua.
Ona sa ou faaaluina le 11 tausaga ua tuanai e tofu ai i le soifuaga o Iosefa Samita—faitauina o ana api talaaga, o ana tusi, o ana lauga—ua ou iloa ai o ia i se tulaga e sili atu ona patino. Ma ou iloa ai o ia o se tagata e pei lava o a’u. Ioe, o ia o se perofeta a le Atua ma na mauaina faaaliga ofoofogia, faaaliga vaaia, ma asiasiga. Ae sa tatau lava pea ona ia faatoilaloina luitau e pei lava o i tatou uma.
O i tatou o loo soifua i le taimi nei i se lalolagi ua matua le pei o le lalolagi sa i ai Iosefa Samita ma le Au Paia anamua. Ae e matuai leai lava se eseesega o o tatou faafitauli. E tofu uma i tatou ma faigata ona o aafiaga faaletagata: ma’i, oti, faalataina, lotovaivai, ma ni aso faigata. Sa i ai foi ni nai taimi o Iosefa na foliga ai ua matua mamao lava le Atua ma sa ia mafaufau ai pe na silafia e le Alii ona tulaga ma tulaga o le Au Paia. Sa feagai o ia ma le maliliu o e pele ma puapuagatia i ma’i ma tofotofoga, ae sa ia faafetaiaia i latou ma se faatuatua mausali sa faatasi le Atua ma ia ma na i ai “mea lelei e oo mai.”1
O faataitaiga nei e lua mai le soifuaga o Iosefa Samita ua faailogaina ai le ala na ia faatonutonu ai le tulaga faaletagata ma le auala na fesoasoani ai ia te au le suesue i lona olaga ma aafiaga o le Au Paia anamua, e feagai ai ma o’u lava tofotofoga.
“Ou te manatu e mafai ona tatou mutimutialofa ma ia i nisi tulaga”
O le a feagai i tatou uma i nisi taimi ma lototiga ona o le oti ma faama’i. Sa le ese foi Iosefa ma Ema Samita. Na maliu le la tama muamua ina ua faatoa fanau mai, ma o le maitaga na sosoo ai a Ema (o le masaga) na iu foi i le maliliu o pepe. Ona vaetamaina lea e Iosefa ma Ema se masaga faatoa fananau mai, o lo la tina, o Julia Clapp Murdock, na maliu i le fanauina o i laua. O le sefulutasi masina mulimuli ane, ia Mati 1832, na maliu ai le pepe o Iosefa—o se tasi o le masaga—ina ua mavae se osofaiga a tagata faatupu faalavelave i le Perofeta o Iosefa, na aafia ai le pepe, o le sa maua i le misela, i le malulu o le sau o le po.2
O le maliliu o lana fanau na tuuina atu ai ia Iosefa le mutimutialofa mo isi o e na aafia i le maliliu o e pele. I ni nai aso talu ona maliu lona atalii, sa malaga atu ai le Perofeta i Misuri e faataunuu se poloaiga na tuuina atu e le Alii ia te ia e fefautuaai faatasi ma le Au Paia iina. I lona toe foi mai mai le faigamalaga, sa tuai mai Iosefa ina ua pagatia Newel K. Whitney, o lana soa femalagaai, i le gau o lona vae i se faalavelave. Na nonofo le toalua lea i se tamai aai o Greenville, Initiana, mo ni nai vaiaso seia lava le malosi o Newel e malaga ai.3
A o nofo ai Iosefa i Greenville, sa ia faalogo ai faatoa maliu lona tei o Maria—o le afafine e lua tausaga a Ailama Samita—. O le maliu [o le la tama] na lofituina ai Ailama ma lona faletua o Ierusa.4
Ina ua faalogo Iosefa i le tala, sa ia tusi atu se tusi ia Ema—o le sa faanoanoa pea i le maliu o le pepe o Iosefa. “Sa ou faanoanoa i le faalogo atu ua maliu le afafine laitiiti o Ailama,” na tusia ai e Iosefa. “Ou te manatu e mafai ona ta mutimutialofa ma ia.” Ioe, sa mafai ona mutimutialofa Iosefa ma Ema, i le maliliu ai o le toafa o le la fanau. Ona faaauau lea o Iosefa, “Ae e tatau ia i tatou uma ona taliaina mea e tutupu i o tatou olaga ma faapea atu ia faia le finagalo o le Alii.”5 Ina ia malamalama i le mafuaaga o le maliu, sa tuu e Iosefa lona faatuatuaga i le Alii.
Sa ou mafaufau i lenei aafiaga e pei ona ou taulimaina le maliliu o tagata o lou aiga, tagata o le uarota, ma uo. E oo lava i le Perofeta o Iosefa, o le na mauaina le faaaliga mamalu o malo selesitila, terasitila, ma le telesitila pe tusa o le ono vaiaso a o lei maliu Iosefa laitiiti (tagai i le Mataupu Faavae ma Feagaiga 76), sa tiga i le maliu o lona atalii. Sa ia iloa o le a ia toe vaai ia pepe Iosefa ma le isi toatolu o lana fanau, ae peitai sa tiga lava lo latou maliliu. O le avea ai ma se perofeta sa lei aveesea ai le tiga pe taofia ai Iosefa mai le oo i faigata o le olaga nei. Ae o le faatuatuaina o le Atua ma Lana fuafuaga na faaitiitia ai nisi o tiga.
“Ia filemu, ma iloa o A’u o le Atua”
I le 1833, sa feagai ai Iosefa Samita ma le Ekalesia atoa ma se faafitauli faataumaoi ina ua tutuliese e tagata faatupu faalavelave le Au Paia mai le aai o Siona i le Itumalo o Siakisone, Misuri. Faatasi ai ma le toatele o le Au Paia na maalilili , fiaaai, ma leai ni mea e nonofo ai, sa matuai manaomia ai e taitai o le Ekalesia le fesoasoani faalelagi nai lo se isi lava taimi. Ae peitai, a o mafaufau loloto Iosefa i lea tulaga, sa oo ina le mafai ona ia maua se taitaiga. Ina ua mavae le vevesiga muamua ia Iulai 1833, sa tusi atu Iosefa i le Au Paia i Misuri: “Ua ou iloa moni lava o le a vave ona laveaiina e ia [o le Alii] Siona, ona ua ia te au lana feagaiga le masuia o le tulaga lenei o le a i ai. Ae e finagalo le Atua e natia mai o’u mata le auala tonu o le a faia ai lenei mea.”6
O Le Tutuliese mai o le Au Paia mai le Itumalo o Siakisone, Misuri, na saunia e C. C. A. Christensen, mai faaaloaloga a le Falemataaga o Faatufugaga a le Iunivesite o Polika Iaga
Ina ua uma ona tutuliese ese le Au Paia mai le itumalo ia Novema, sa toe talosaga atu Iosefa i le Alii mo ni tali i ni fesili faapitoa se lua: “aisea ua tuu ai e le Atua le tele o malaia e oo mai i luga o Siona” ma “o le a le auala o le a ia toe faafoi atu ai o ia i lona tofi.” Peitai sa le mafai lava e Iosefa ona maua se taitaiga. “Sa tuu pea e le Alii [ia tali] e natia mai o’u mata,” na ia fai atu ai ia Eteuati Paterika, le epikopo i Misuri. “E le o faaalia manino mai ia te a’u.” Nai lo lena, na tuuina atu e le Atua ia Iosefa se uunaiga faamautinoa: “Ia filemu ma iloa o Aʼu o le Atua.”7
I le aso 16 o Tesema, 1833, na iu ai ina maua e Iosefa ana tali e ala i se faaaliga (tagai i le Mataupu Faavae ma Feagaiga 101). O le vaega muamua o lena faaaliga na faamalamalama mai ai le mafuaaga na faatagaina ai e le Alii le Au Paia ia tutuliese mai le Itumalo o Siakisone—o le fesili muamua lea na fesili atu ai Iosefa i le Atua. O le vaega lona lua o se faataoto e uiga i se tagata na aveesea atu lona fanua i ona fili ma talosagaina le malosi o lona aiga e toe faafoi le fanua. O le tali lena i le fesili lona lua a Iosefa. Na toe tuuina mai foi e le Alii Ana upu faamafanafana na muamua atu: “Ia filemu ma iloa o A’u o le Atua” (Mataupu Faavae ma Feagaiga 101:16).
O le a tofu i tatou ma ni taimi i o tatou olaga tatou te lagonaina ai le pei e le o tali mai le Atua i a tatou tatalo. Atonu o le a pei e mamao o Ia, ma e mafai ona tatou fesiligia pe o Ia silafia le mea o tupu. Sa ou oo i ni taimi faapena ma mafaufau ai po o afea e oo mai ai se tali. O se lagona mafanafana ia te a’u le faitau e faapea, e oo lava ia Iosefa Samita, le Perofeta maoae o le Toefuataiga, sa i ai ni taimi sa ia tauivi ai foi ma ni tali—lea sa lei faaali atu ai e le Atua ia te ia mea uma i le taimi e tasi. O lena mea e aumaia ia te a’u le lototele e agai pea i luma i le faatuatua, ma le iloaina a talafeagai le taimi, o le a ou maua la’u tali.
O le Perofeta o Iosefa Samita o se tagata ofoofogia. E tumau o ia o se tasi o a’u toa manumanu. Na tatau ona tigaina o ia i tofotofoga o le olaga, e pei foi o a’u. Na tatau ona ia fetaiai ma le oti, faama’i, ma le lotovaivai. Ae sa tutumau o ia ma le faatuatua i le Atua ma Iesu Keriso lea na mafai ai ona faatoilalo ona faigata.
O le lototele ou te lagonaina pe a ou faitau i lona malosi, i le malosi o Ema, ma le malosi o uluai tagata o le Ekalesia ua aumaia ia te a’u le faamoemoe e mafai foi ona ou faatoilaloina o’u luitau. Ia te a’u lava ia, o se tasi lena o mafuaaga silisili e suesue ai le talafaasolopito o le Ekalesia: ina ia mafai ai ona faamalosia lo’u faatuatua e ala i le vaai atu i faataitaiga a i latou na mua i malae.