Na’o Tusiga Faatekinolosi

Pe Na Tatau Moni Ea ona Totogi A’u Taulaga Anapogi?

Saunia e Chakell Wardleigh Herbert

Mekasini a le Ekalesia

Ou te lei totogia muamua lava ni taulaga anapogi. Pe mafai ona aoga le valaaulia a lou epikopo mo se taumafaiga?

Sa ma talanoa fiafia ma lou epikopo i lona ofisa, ae o le mea moni, sa ou le gauai tele atu i ai.

Sa i le ogatotonu o Tesema, ma sa ma feiloai mo le faatalanoaga o le sefuluai. Sa i ai i taimi uma sau molimau e uiga i le sefuluai ma sa totogi atoa le sefuluai, o lea sa ou le manatu tele ai i lea fonotaga puupuu. Ma sa ou naunau e toe foi e fai meaaoga mo lau suega faaiu i le kolisi, aemaise lava ona sa faatoa ou iloaina lava ou te lei pasi i lau suega faaiu o le numera—mo le taimi lona lua.

Sa ou lagonaina le lotovaivai, ma sa ese le nofoaga na i ai lou mafaufau.

Sa tilotilo mai lou epikopo ia te au ma le agalelei.

“Sa ou matauina e te lei totogia ni taulaga anapogi i lenei tausaga,” na ia fai mai ai, ma ataata.

O lena mea sa toe foi ai lo’u gaua’i atu.

Na sa’o o ia.

O taulaga anapogi sa ou le mafaufau ai lava mo le tele o masina. O se mea sa seasea talanoaina e lou aiga a o tuputupu ae, ma le isi, e matou te lei talanoa tele i ai i le lotu.

Sa sese lou mafaufau faapea e le tatau ona ou tuuina atu ni mea se tele, se vaega ona sa ou i ai nei i se uarota a le YSA, ma se isi vaega ona sa faatauasoina a’u i lou lava faamaualuga ma e lei i ai lava se molimau o le anapogi po o taulaga anapogi.

Na ou faapea o le totogiina o lau sefuluai ma tau lava o le alu e aunoa ma se meaai ua lava lea.

“Ou te lei faia,” sa ou fai atu ai. “Ae afai o lea oute totogiina lau sefuluai ma anapogi, o le mea lena e sili ona taulia, e sao?”

Sa ataata lou epikopo ma faamatala mai ia te au le taua o le totogiina o se taulaga anapogi faatasi ai ma le anapogi i masina taitasi, ma le tele o faamanuiaga faaletino na te tuuina atu mo i latou e manaomia le fesoasoani i le uarota.

Ae o le mea sili lava, sa ia faamamafa mai faamanuiaga o loo avanoa mo i latou o e naunau e ositaulaga ma tausia le tulafono o le anapogi.

Sa ia tilotilo mai ia te au ma fai mai, “O na faamanuiaga e mafai ona fesoasoani ia te oe i soo se luitau o loo feagai ma oe i le taimi nei, e oo lava i luitau i lau aoga.”

Sa matua ou ofo lava. Ou te lei fai foi ia te ia e le’i pasi la’u vasega matematika talu ai nei.

“O le mea lea o loo e fai mai ai,” sa ou fai atu ai, “afai ou te totogiina au taulaga anapogi, o le a mafai ona pasi la’u matematika i le afatausaga faaleaoaoga o loo sosoo mai?”

Sa ma talie, ae sa fai si ou tei ina ua lue lona ulu.

Sa ia tau mai ia te au afai o le a ou suesue ma maua se molimau i le taua o le tulafono o le anapogi ma totogi se taulaga anapogi i masina uma, o le a ou maofa i faamanuiaga o le a faatoulu mai ia te au e le Tama Faalelagi.

O le vaaia ua nao le vasega matematika lea o loo taofia au mai le alualu i luma i le aoga ma sa ou tauivi ai ma le matematika (ae maise lava o le matematika lea na aofia uma ai numera ma tusi) i lou olaga atoa, sa ou filifili ai e tuu atu i ai se taumafaiga.

Aoaoina o le Aisea i tua atu o le Anapogi

I le amataga o le afatausaga faaleaoaoga na sosoo ai, sa ou faia ai se folafolaga ia te au lava o le a ou suesueina le numera ia sili atu ona filiga nai lo se isi lava taimi, ma o le a ou aoao ai foi le tele o mea e uiga i le anapogi ma taulaga anapogi i le mea e gata ai lou mafaia.

Sa ou anapogi i taimi uma i le tuputupu ae, ae ou te lei faia lava ia aoga. O le tele lava o le taimi i le Aso Sa anapogi, sa ou mafaufau ai i loʻu fia ‘ai tele na toulu ifo ai tama’i lole a tamaiti i luga o le foloa i le sauniga faamanatuga na foliga manaia lava.

Ina ua oo i le amataga o le masina fou, sa faigata ia te au ona totogi lau sefuluai ma le taulaga anapogi. Sa na’o au o se tamaitiiti aoga i le kolisi e mativa, ma sa lei tele se mea ou te ofoina atu!

Ae ina ua mavae atu ni nai masina, sa ou lagonaina le mou malie o ou uiga musuā ma le faamaualuga. A o ou taulai atu i le mafuaaga o le anapogi, sa ou lagonaina le suia o lou loto ma lou faatuatua i Aso Sa anapogi uma i le tele o auala:

O au tatalo i le amataga ma le faaiuga o au anapogi na atili faamaoni ma anoa.
O le totogiina o taulaga anapogi na fesoasoani ia te au e anapogi ai ma se faamoemoega nai lo le taulai atu i le mole o lou manava, sa amata ona ou iloaina le leo malu ma le uunaiga a le Agaga.
O le malosiaga mama, ae loloto, ma le faaleagaga sa ou lagonaina i le faaiuga o anapogi taitasi sa faatumulia ai lou agaga ma faamafanafanaina ai lou loto.
Sa iu ina ou iloaina afai tatou te faia ma le loto i ai ni osigataulaga mo isi, o le a faamamaina atili i tatou o ni tagata e faapei o Keriso, aua o le taulaga o le mea tonu lava lea na Ia faia mo i tatou. O Lona soifua sa na o se tasi o faatinoga umi o le foai atu.
Sa ou lagonaina le alofa mama na faatamaoaigaina ai lou agaga i masina uma a o ou mafaufau i le toatele o tagata ua mafai ona tatou auauna atu i ai ona o lo tatou naunautai e tuuina atu. Ma sa ou lagonaina foi le agaga faafetai mo faamanuiaga uma i lou olaga lea sa ou le amanaiaina muamua i nisi o taimi.
O le anapogi mo le faamoemoega o le faasoaina atu o le malamalama ma faamanuiaga i isi na sili atu ona taua nai lo le mea sa mafai ona i ai mo au.
Sa ou lagona le faamalosia o le fesootaiga ma le Tama Faalelagi ma le Faaola.
E ui lava i luitau faifai pea, sa tele nai aafiaga o le alofa mutimutivale, ma sa ou lagonaina le olioli tele i lou olaga.

Sa faateia au i upu a Elder Joseph B. Wirthlin (1917–2008) o le Korama a Aposetolo e Toasefululua ina ua ia saunoa:

“O le anapogi i le agaga sao ma le ala a le Alii o le a faamalolosia ai i tatou faaleagaga, faamalolosia ai lo tatou loto pulea, faatumuina ai o tatou fale i le filemu, faamalamalamaina ai o tatou loto i le olioli, faamalosia ai i tatou e tetee atu i faaosoosoga, saunia ai i tatou mo taimi o faigata, ma talaia ai pupuni o le lagi”. …

“A o tatou ola i le tulafono o le anapogi, e le gata ina tatou latalata atili atu i le Atua e ala i le tatalo, ae tatou te fafaga i e fia aai ma tausia e matitiva.”¹

O le tele lena o faamanuiaga folafolaina o loo faatalitali mai mo i tatou.

Talu mai lenei aafiaga, ua avea ai le anapogi ma taulaga anapogi ma se vaega taua o lou avea ma soo. Ou te lagona le latalata atili atu i lou Tama Faalelagi ma le Faaola i taimi uma ou te foai atu ai. Ma o nisi taimi ou te anapogi ai e tusa lava pe le o se Aso Sa anapogi e saili ai tali ma le faamafanafanaga mo au lava ia pe mo isi.

Ua ou iloaina o le tulafono o le anapogi o se meaalofa moni lava.

Ma ina nei tau mate lava, ioe, sa ou pasi faavavega i lena vasega o le matematika i lena afatauasaga faaleaoaoga. Ma e le gata ina ou pasi i lena mataupu— sa ou mauaina se tasi o togi pito i maualuga i le vasega. Ioe, sa ou suesue i ai, ae o le taimi muamua lava lea i lou olaga, na foliga mau ai ua mau nei mataitusi ma fuainumera i lou mafaufau.

O Le Tama Faalelagi o se Atua moni lava o vavega.

A o tatou taumafai e mulimuli ia te Ia ma lona Alo, o Iesu Keriso, faatasi ai ma a Laua poloaiga, e mafai ona tatou agai i luma ma le faatuatua, faamoemoe, ma le alofa mama, ma o le a Laua faamanatu mai ia i tatou o loo Laua faatasi ma i tatou ma saunia e faamanuia i tatou mo a tatou taumafaiga.