Mo Matua

O Le Fuafuaga o le Faaolataga ma le Faalagolago i le Alii

Matua Pele,

E mafai ona e faaaogaina tusiga nei ma o latou ata e tatala ai talanoaga ma lou aiga ma fesoasoani ai ia latou malamalama i autu taua e pei o le ata o le faaolataga, talafaasolopito o le Ekalesia, ma le faalagolago i le Alii.

Talanoaga o le Talalelei

Fuafuaga o le Faaolataga

Faaaoga “Faavae o le Talalelei” i le itulau e 6 e aoao ai lau fanau e uiga i le fuafuaga o le faaolataga. Talanoaina pe faapefea e le malamalama i le fuafuaga o le faaolataga ona faamanuiaina oe ma lou aiga. Mafaufau e tusi e lau fanau ni ata o le fuafuaga o le faaolataga ma tuu atu ia i latou ia tofu ma vaega eseese o le ata e faamatala.

Faamanuiaga o le Suesueina o le Talafaasolopito o le Ekalesia

A o e faitauina le tusiga o loo i le itulau e 30, ia talanoa ma lau fanau auala e mafai ai foi ona latou maua se molimau malosi atu e ala i le aoao atili e uiga i le talafaasolopito o le Ekalesia. O a ni tala po o ni aafiaga mai le talafaasolopito o le Ekalesia e mafai ona e faasoa atu i lou aiga e fesoasoani ai ia i latou e faafetaiaia o latou tofotofoga i le faatuatua?

Faalagolago i le Alii

Faitau le aafiaga a Brother Milton Camargo i le itulau 39. A o outou talanoaina faatasi ma lau fanau, mafaufau e fesili atu: Na faapefea ona faaalia e le faifeautalai lona faalagolago i le Atua? E faapefea ona e faaalia lou faalagolago i le Alii? O a nisi o auala ua faamanuiaina ai oe, ona sa e faatuatuaina le Atua?

Tautalagia le Sauaina

Faaaoga manatu o loo i le tusiga o loo i le itulau e 20 e aoao ai i auala e iloa ai sauaga, taofia ai, ma aoao ai fanau i le ala e puipuia ai i latou lava.

Taimi Fiafia i Suesuega Faaleaiga

O Le A Ou Taitaia Outou i le Ala

Mataupu Faavae ma Feagaiga 78:17–18

O le a taitai e le Alii i tatou i le ala a o tatou faalogo atu ia te Ia e ala i Ana perofeta. Ae o savali a le lalolagi e mafai ona feteenai ma fenumiai. Taaalo faatasi o se aiga i le taaloga “Fai le Mea Ou te Faia ae Le o le Mea Ou te Fai Atu Ai,” e pei ona faamatalaina atu i lalo.

1. Filifili se tagata e toatasi e avea ma taitai.

2. E tau atu e le taitai se taga a o ia faia se taga e ese. Mo se faataitaiga, fai mai le taitai, “Patipati ou lima,” ae nai lo o lena, e tago i lona lima.

3. E tatau ona faia e tagata o le aiga mea e fai e le taitai, ae le o le mea e fai mai ai le taitai.

4. Toe fai le taaloga, ia auauai e avea ma taitai.

Talanoaga: Pe na faigata ona e mulimuli i le taitai? O nisi taimi e mafai ona fenumiai ai faatonuga a le lalolagi, ae e manino lava poloaiga a le Alii. O le a se mea e mafai ona tatou faia e faalogo ai i le Alii a o Ia taitaia i tatou i le ala?

Auina atu e Lisa Thomas

I Totonu o le Mekasini Mo le Malosi o le Autalavou i le Masina Lenei

Pe sa Ou Agavaa?

Faaaoga le tala a le tamaitai talavou lenei e aoao ai lau tupulaga talavou e uiga i le lototele, mama, ma le mana o le Togiola a Iesu Keriso i se tulaga e uiga i sauaga.

O le Mafuaaga e Tatau Ai Ona Outou Lototetele

Pe a faigata taimi, e tuu mai e Iesu Keriso ia i tatou mafuaaga ina ia tatou lototetele ai. Aoao lou aiga i le ala e lagolagoina ai e Iesu Keriso i latou o e talitonu ia te Ia.

Fesili ma Tali

Pe o tauivi lou alo talavou ma tulaga tau faatauaina o le tagata lava ia? Faitau ni fautuaga aoga mai talavou i le lalolagi atoa i le auala latou te manatua ai lo latou taua.

I le Mekasini o le Uo i le Masina Lenei

Fesoasoani i le Sau, Mulimuli Mai Ia Te A’u

Tuu atu i lau tama e taitai i le afiafi faaleaiga po o le suesueina o tusitusiga paia e faaaoga ai se gaoioiga mai le “Taimi Fiafia i Tusitusiga Paia.” E mafai foi ona e maua ni manatu faalevaiaso mo le aoaoina o fanau laiti i “Taimi Fiafia i Tusitusiga Paia mo Tamaiti Laiti.”

O Paionia i Atunuu Uma

Faitau e uiga i se tamaitiiti i Toga, sa na o ia lava le tagata o le Ekalesia i lana aoga. Sa tuputupu ae o ia e avea ma peresitene o le malumalu o le Malumalu o Nukualofa Toga.

Aoao e uiga i le Fuafuaga a le Atua

Faitau i le tala faatusi paia o lenei masina e uiga i le faaaliga na maua e Iosefa Samita i le Mataupu Faavae ma Feagaiga 76. E mafai foi ona outou taaalo o se aiga i le taaloga laupapa o le fuafuaga o le faaolataga.

Punaoa e uiga i Sauaga

Faaaoga le tala “Ufiufiina o le Pepe Meataalo Pepa” e talanoa ai i lau fanau e uiga i le eseesega i le va o mealilo ma mea e faateia ai. O loo aofia ai se itulau e uiga i le auala e taofia ai ma le faamaloloina mai sauaga.