E Finagalo le Tama Faalelagi Tatou te Toe Foi Atu

Saunia e Elder Ulisses Soares

O Le Korama a Aposetolo e Toasefululua

Atonu ua e tau lalata atu i le ala e toe foi atu ai i lou Tama Faalelagi nai lo le mea o loo e manatu i ai.

O o’u matua, o Aparecido ma Mercedes Soares, sa moemiti i taimi uma e auauna atu i se misiona. Sa la mananao e toe totogi le Alii mo faamanuiaga e tele na oo mai i lo la aiga talu ona latou auai i le Ekalesia. Sa oo mai lo la avanoa i le 1989 ina ua la taliaina se valaauga e auauna atu i le Malumalu o Sao Paulo Pasila.

Ae peitai, na o ni nai masina talu ona i ai i le la misiona, ae oso loa le ma’i fatu o lo’u tama ma maliu ai. I le taimi o lona falelauasiga, sa ou opoina lo’u tina a o matou tutu i luma o le pusa maliu o lo’u tama.

“Tina, o le a le isi mea o le a sosoo mo oe?” Sa ou fesili atu ai.

“Sa ma moemiti ma lou tama i lenei misiona,” sa ia tali mai ai. “O loo ou auauna atu i le taimi nei, ma o le a ou auauna pea—mo ia ma mo a’u.”

Na tofi e le peresitene agalelei o le malumalu se isi tina ua maliu lana tane e avea ma soa a lo’u tina, ma sa faaauau pea e lo’u tina lana misiona mo le silia ma le 20 masina. O lana auaunaga faafaifeautalai na faamanuiaina ai o ia, ma o lona faatuatua ma faataitaiga na faamanuiaina ai lo’u aiga ma a’u.

I le taimi o lana misiona, sa maliliu ai foi o’u uso e toalua, ma e toalua foi le ma fanau ma si o’u toalua na maliliu ai. Sa vave ona fanau mai le ma tama muamua ma sa le’i ola, ae sa fafano le ma tama lona lua. I lena taimi o tofotofoga mo lo matou aiga, sa i ai iina lo’u tina i le malumalu i aso uma e toe faamalosia atili ai lona faatuatua—ma faamalosia ai ma o matou [faatuatua]—i le fuafuaga o le faaolataga.

O lona faatuatua i se toefaatasia mamalu ma lo’u tama ma le folafolaga o le ola e faavavau i le afioaga o lo tatou Tama Faalelagi sa lagolagoina ai o ia mo le 29 tausaga o se fafine ua oti lana tane seia oo i le faaiuga o ona aso, i le 94 o ona tausaga.

O Le Fuafuaga o le Fiafia

E maeu le faamanuiaina o i tatou o ni Au Paia o Aso e Gata Ai i le iloa ua toefuataiina mai le talalelei. O le fuafuaga o le faaolataga e moni lava o le “fuafuaga sili o le fiafia” (Alema 42:8). I e amiosao ma faamaoni, o loo folafola mai ai se taui e faavavau i le afioaga o le Atua.

E pei ona faaalia i le Mataupu Faavae ma Feagaiga, e toetoe lava o fanau uma a le Tama Faalelagi o le a ulufale atu i se malo o le mamalu. E ala i le Togiola a le Faaola, o i latou o e o le a o mai “i le toetutu o e amiotonu” (Mataupu Faavae ma Feagaiga 76:17) o le a faaatoatoaina ma mautofi i le mamalu selesitila.

O le toatele o tagata o Le Ekalesia a Iesu Keriso o le Au Paia o Aso e Gata Ai e taliaina lenei aoaoga faavae. O le mea e faanoanoa ai, atonu o nisi e le talitonu faapea e faatatau patino ia i latou. Latou te faia ni mea sese. O lo latou alualu i luma faaleagaga, e ui ina mausali, ae faifailemu lava. Latou te mafaufau pe mata o le a lava lo latou lelei mo le malo selesitila.

Afai o e i ai i lena vaega, ia manatua le fetalaiga a le Alii i se isi vaega o tagata talitonu: “Inā ea ia o outou ulu ma ia faamafanafanaina outou; ona ua Ou iloa le feagaiga na outou faia mai ia te a’u” (Mosaea 24:13).

E alofa le Atua ia i tatou ma finagalo ia tatou toe foi uma atu i Lona afioaga. Atonu ua leva ona e i luga lava o le ala e toe foi atu ai ia te Ia nai lo le mea o loo e manatu i ai.

“Amiotonu ma Faamaoni”

I le Mataupu Faavae ma Feagaiga vaega e 76, ua faaali mai ai e le Alii le auala e mafai ai e Lana fanau ona mautofi i le malo selesitila. Afai o oe o se tagata o le Ekalesia ma ua i ai sau molimau, o lena ua amata lau malaga, e pei ona faamatalaina i le Mataupu Faavae ma Feagaiga:

E tatau ona tatou maua “le molimau ia Iesu” ma talitonu “i lona suafa” (fuaiupu e 51).
E ao ina papatisoina i tatou e ala i le faatofuina (tagai i le fuaiupu e 51).
E tatau ona tatou “maua le Agaga Paia e ala i le faaee atu o lima” e se tasi ua i ai le pule o le perisitua (fuaiupu e 52).

Ae peitai, o isi laasaga, e alu ai se taumafaiga i le olaga atoa, ma o nisi tagata o le Ekalesia e lagona le lotovaivai pe a latou le ausia. O loo tatou galulue uma lava i nei tulaga manaomia. E faafetai i le Togiola a Iesu Keriso, ua mafai ai ona tatou ausiaina uma lava:

Tausi poloaiga ma ia “fufuluina ma faamamaina mai ia [tatou] agasala uma” (fuaiupu e 52).
“Manumalo e ala i le faatuatua” (fuaiupu e 53).
Ia “faamauina e le Agaga Paia o le folafolaga” (fuaiupu e 53), o le Agaga Paia lea, e molimau “i le Tama sauniga e faaolaina ai ua sa’o ona faia ma feagaiga e o faatasi ma ia sauniga ua tausia.”¹ Ua folafola mai e le Tama lenei faamauga ia i “latou uma o e ua amiotonu ma faamaoni” (fuaiupu e 53).

Na tautino mai Peresitene Ezra Taft Benson (1899–1994), o le “amiotonu ma le faamaoni,” “o se faaupuga talafeagai mo i latou o e totoa i le molimau ia Iesu. Latou te lotototoa i le puipuiga o le upumoni ma le amiotonu. O tagata ia o le Ekalesia o e ua faalauteleina o latou valaauga i le Ekalesia (tagai i le MF&F 84:33), e totogi a latou sefuluai ma taulaga, e ola i ni olaga mama, e lagolagoina o latou taitai o le Ekalesia i upu ma faatinoga, e tausia le aso Sapati ia paia, ma usiusitai i poloaiga uma a le Atua.”²

O le mauaina o le tikeri aupito maualuga o le malo selesitila, lea e masani ona ta’ua o le faaeaga, e i ai le tulaga manaomia faaiu e tasi. E tatau ona tatou ulu atu i le “feagaiga fou ma tumau-faavavau o le faaipoipoga” (Mataupu Faavae ma Feagaiga 131:2), e faatino i le malumalu e ala i le pule tatau o le perisitua. E tusa ai ma le fuafuaga alofa mutimutivale a lo tatou Tama, ua tatou iloa ai o faamanuiaga faaselesitila o le a maua i le olaga a sau, ia i latou e lei maua se avanoa mo le sauniga o le faamauga i le malumalu i lenei olaga ae tumau faamaoni e oo i le iuga.

Ua tatou aoao mai le Tusi a Mamona o fanau uma a le Atua o e tausia Ana poloaiga ma o loo faamaoni, e tusa lava po o a tulaga o le olaga, o le a faamanuiaina ma “taliaina i le lagi, ina ia mafai ona latou mau faatasi ma le Atua i se tulaga o le fiafia e le gata” (Mosaea 2:41). E i ai pea lava le faamoemoe mo i tatou i le fuafuaga alofa mutimutivale ma le alofa o le faaolataga a lo tatou Tama Faalelagi.

O le Faamanuiaga o le Salamo

Na aoao mai lo tatou perofeta pele, o Peresitene Russell M. Nelson: “E le o faamoemoeina e le Alii se atoatoa mai ia i tatou i lenei taimi i lo tatou alualu i luma e faavavau. Ae ua Ia faamoemoeina i tatou ia faateleina lo tatou mamā. O le salamo i aso taitasi o le ala lea i le mamā, ma o le mamā na te aumaia le mana.”³

Na saunoa mai foi Peresitene Nelson o le “faia ma le faaleleia teisi i aso taitasi” e aumai ai ia i tatou le “mana faamalosi.”⁴ A tatou faaaogaina lena mana faamalosi e faasagatau atu ai i le alii po o le tamaitai natura (tagai i le Mosaea 3:19), tatou te agai atili atu i le ala e toe foi ai i lo tatou Tama.

Ona e leai se mea le mama e mafai ona nofo i le afioaga o le Atua (tagai i le Mose 6:57), tatou te galulue i aso uma i suiga faamaoni faaleagaga—i o tatou manatu, o tatou manao, ma a tatou amioga. I upu a le Aposetolo o Paulo, tatou te saili ia avea ma tagata fou ia Keriso, i le suia malie o lo tatou tagata tuai i se tagata fou (tagai i le 2 Korinito 5:17). O lenei suiga e oo mai i lea fuaitau i luga o lea fuaitau a o tatou taumafai ia lelei teisi atu i aso uma.

O le mulimuli i le Faaola e ala i le taumafai e avea faapei o Ia o se faagasologa o le faafitia o oe lava, lea ua Ia faauigaina o le aveina o o tatou satauro (tagai i le Mataio 16:24–26). Tatou te tauaveina o tatou satauro a o tatou:

Pulea o tatou manaoga, naunauga, ma tuinanauga.
Ma le onosai ia “loto ina usitai uma ua silafia e le Alii e tatau ona faaoo mai i” [o tatou] luga (Mosaea 3:19).
Faafiti outou lava mai mea uma e le faaleatua (tagai i le Moronae 10:32).
Uai atu o tatou loto i le finagalo o le Tama, e pei ona faia e le Faaola.

Ma o le a le mea tatou te faia pe a tatou tautevateva? Tatou te liliu atu i lo tatou Tama ma ole atu ia te Ia e “faaaoga le toto togiola o Keriso ina ia mafai ai ona matou maua le faamagaloga o a matou agasala” (Mosaea 4:2). Tatou te toe taumafai e faatoilalo vaivaiga ma lafoai agasala. Tatou te tatalo mo le alofa tunoa, le “mana gafatia ma le faamalologa faaleagaga” o Iesu Keriso.⁵ Tatou te sii ae a tatou satauro ma toe faaauau la tatou malaga, e tusa lava po o le a le umi ma le faigata, i le nuu o le folafolaga o lo Laua afioaga.

Faatuatua i Ana Folafolaga

O lo tatou tino ola pea ma le ola e faavavau o le galuega ma le mamalu lea o le Atua (tagai i le Mose 1:39). O la tatou galuega ina ia ausia lena mamalu e aofia ai le lototoa i a tatou molimau ao i ai i le lalolagi.

I se faaaliga, na vaaia ai e le perofeta o Iosefa Samita o e faamaoni “o le a manumalo i mea uma” (Mataupu Faavae ma Feagaiga 76:60). Mulimuli ane, sa ia folafola mai, “O nofoalii ma malo, itumalo ma mana uma, o le a faaali ma tuu mai i luga o i latou uma o e na tumau ma le lototoa mo le talalelei a Iesu Keriso” (Mataupu Faavae ma Feagaiga 121:29).

A tatou faatuatua i nei folafolaga, o le a tatou le fiu ia i tatou lava, i e pele ia i tatou, po o isi fanau a le Atua. O le a tatou taumafai e fai le mea sili tatou te mafaia ma fesoasoani i isi e faia lea lava mea e tasi. O le faia ai nao i tatou lava, e leai se tasi o i tatou o le a lava lona lelei e faaolaina ai i le malo selesitila, ae “e ala i galuega, ma le alofa mutimutivale, ma le alofa tunoa o le Mesia Paia” (2 Nifae 2:8), o lena faamanuiaga e mafai lava ona tatou mauaina.

A tatou faaauau pea i le faamaoni, ou te molimau atu o le a tatou maua le “fiafia e le gata” i le afioaga o le Tama ma le Alo. “E, ia manatua, ia manatua lava ua moni nei mea; ona ua fetalai mai ai le Alii le Atua” (Mosaea 2:41).