Sau, Mulimuli Mai ia te A’u
Foiaina o le Tetee
Mataupu Faavae ma Feagaiga 71–75
28 Iuni–4 Iulai
Ata na tusia e Dan Burr
O le faaaliga i le Mataupu Faavae ma Feagaiga 71 o loo tau mai ai ia Iosefa Samita ma Sini Rikitone e o ma talai atu i se taumafaiga ia tuuitiitia ai lagona le lelei ia sa tulai mai faasaga i le Ekalesia ona o ni faitioga mai tagata o le ekalesia o e na leiloloa o latou faatuatua. I le silia ma le 100 tausaga mulimuli ane, na maua ai e Elder Spencer W. Kimball o le Korama a Aposetolo e Toasefululua se aafiaga faapena ao lauga atu e puipui ai le Ekalesia.
Asiasiga a Elder Kimball i Ekuatoa
I le taimi o se asiasiga i Otavalo, Ekuatoa, i le 1965, sa saunoa atu ai e Elder Kimball i faifeautalai e tuuina atu le Tusi a Mamona i tagatanuu o Otavalo. Ae ui i lea, na fetaiai faifeautalai ma le tetee ina ua amata ona faasalalauina e tagata Otavalo ia tala pepelo e uiga ia i latou i nuu lata ane, ma sa tauivi faifeautalai e faatoilalo nei faamatalaga sese.
E lua tausaga mulimuli ane, na auai Elder Kimball ma ni nai tagata o le Ekalesia ma faifeautalai i se fonotaga sa faia i talaane o se fale faatali pasi i le lotoifale. Ao tulioso i lalo tagata o le lotoifale mai pasi, sa valaaulia i latou e faifeautalai e faalogo i se Aposetolo soifua a Iesu Keriso. E lei umi, ae potopoto tagata pe tusa ma le 20. A o amataina e faifeautalai le latou fonotaga, sa faateleina le potopotoga i le silia ma le 100 o tagata.
Ona saunoa lea o Elder Kimball. Sa ia faamatalaina le afio mai o Iesu Keriso i le atu Amerika. Sa ia tusi atu i le lagi ma talanoa e uiga i le leo malu ma le itiiti mai le lagi lea na fofogaina maia le afio ifo o le Alo o le Atua, e pei ona maua i le Tusi a Mamona. Na ta’ua e Elder Kimball, “O mata uma lava na mulimuli i la’u taga i le lagi na pei lava sa afio moni mai le Faaola i ao manifinifi.”1
Ina ua mavae lea fonotaga, sa taumafai pea faifeautalai e aoao tagata Otavalo. Sa aoao e tamaitai faifeautalai se alii e igoa ia Rafael Tabango, o lē sa papatisoina i le aso 14 o Iulai, 1968—o le tagatanuu muamua lea o Otavalo o le Au Paia o Aso e Gata Ai. Sa auai foi lona faletua o Teresa, i le Ekalesia. E itiiti ifo ma le 15 tausaga mulimuli ane, na faatulagaina ai se siteki i Otavalo, ma sa valaauina Uso Tabango e avea ma ona uluai peteriaka.