E na o le Faatekinolosi: Ata o le Faatuatua
Taimi mo le Lotu!
O faifeautalai “agelu” o e sa tumau pea i le aoaoina o i maua i le talalelei a Iesu Keriso, na fesoasoani ia i maua ia maua le alofa mai le Tama Faalelagi ma se olaga e tumu i faamanuiaga.
Ata na pueina e Leslie Nilsson
Ina ua amata ona aoaoina i maua e faifeautalai faamisiona, sa ou le talitonu ma sa fefinauai lou toalua. O le mea moni ma te lei mananao lava e faalogo i le talalelei, ae sa matuai naunau lava i laua e aoao i maua ma sa ma iloa o le a la le fiu lava.
I se tasi po o le Aso Toonai, sa ma o ai ma lou toalua o Javier, i se pati na oo i le tuneva o le po. Talu ai ona sa tuai ona ma momoe, sa ma momoe umi ai ma galo le valaaulia a faifeautalai e auai i le lotu faatasi ma i laua i le aso e sosoo ai.
Ina ua ma faalogo atu o la tuitui i le ma faitotoa i le taeao o le Aso Sa, sa ma faapea ma Javier i le tasi ma le isi, “Sei ta faataga momoe pea ma le amanaiaina i laua.”
Ae sa tuitui pea faifeautalai. Sa iu ina valaau mai faifeautalai, “Uso ma Tuafafine Vasquez, ma te iloa o loo oulua i ai iina. Afai e le tatalaina le faitotoa, ma te ono feosofi i luga o le lua pa ma fesoasoani e sauni oulua mo le lotu!”
Sa ma iloa ua nao ni tala pepelo, ae sa tonu ia i maua e tutu i luga, tatala le faitotoa, ma faafoliga ma te lei faalogo ia i laua. Sa ma o mai i fafo ma mili o ma mata e pei faatoa ma feala i luga. Sa la iloa sa ma pepelo, ae sa leai se la tala.
“O le taimi lava e te lua saunia ai,” sa la fai mai ai, “o le a tatou o i le falesa.”
Sa ma saunia i maua lava ma la ma fanau e toalua, ma matou o loa. I le lotu i lena aso, sa ootia ai i maua e le Agaga Paia. Mai lena taimi, sa ma lei toe misia lava se sauniga. O le aso na matou papatiso ai, 17 o Oketopa, 1976, o le aso sili lea ona fiafia o lo matou olaga. O le avea ai ma tagata o le Ekalesia na matuai suia ai lava i matou.
Mo i matou, o na faifeautalai—o Elders Reed Harisi ma Marty Kemsley — sa pei o ni agelu se toalua. Ina ua la aoaoina i matou i le ala e fai ai se afiafi faaleaiga, sa la aumaia le latou sone atoa. I se isi itu, sa mafai ona matou faaofi na faifeautalai uma i lo matou tamai fale. O le viiga muamua sa matou usuina o le “A i ai i le Aiga le Alofa.” E manatua lava lagona na oo mai ona o lena mea.
Mulimuli ane, sa fesili mai Elder Harris ia i ma’ua, “E te lua iloa le mafuaaga sa ma matuai naunau ai e aoao oulua ma aumai oulua i le lotu?” Ona ia tali mai lea, “Ona ma te iloa o le a avea oulua ma taitai i le Ekalesia.”
E le mafai ona ma faagaloina lena mea. Talu mai lo ma papatisoga, ua matou maua le tele o avanoa matagofie e taumafai ai e faataitai i le Faaola a o matou auauna atu i fanau a le Tama Faalelagi. Sa ou auauna atu i le tele o tofiga faaleautaitai, e aofia ai le avea ma Peresitene o le Aualofa ma le Peresitene o Tamaitai Talavou. O Javier na auauna atu o se peresitene o le korama a toeaina, e faalua ona avea ma epikopo, ma se peresitene o le siteki.
Talu ai nei sa ma auauna atu ai faamisiona o le auaunaga alofa i Polivia. O lena valaauga na tuuina mai ai ia i maua le faamanuiaga o le feiloai i le toatele o uso ma tuagane lelei, faasoa atu lo ma faatuatua ia Iesu Keriso, ma le tuuina atu o le alofa, fesoasoani, ma le fesoasoani agaalofa i nisi o tagata e sili ona vaivai o lo matou atunuu ma eria.
E lei leva talu ai, ina ua atoa le 42 tausaga o avea matou o ni tagata o le Ekalesia, na iu ai ina matou tuliloaina se tasi o na faifeautalai filiga o e na aumaia ia i matou le talalelei. O lena taimi sa auauna atu Reed Harisi o se peresitene o le misiona i Chile. Sa ootia lava la ma talanoaga i le telefoni. Sa matou fetagisi a o matou talanoa e uiga i o matou aiga ma o matou olaga i le talalelei. Sa ma faafetai atu ia te ia mo le mea ua tuuina mai e le talalelei ia i matou — o se olaga soifua maloloina, o le alofa mai lo tatou Tama Faalelagi, ma se olaga e tumu i faamanuiaga.