E Na’o Tusiga Faatekinolosi: Talavou Matutua

Faamalosia o La’u Molimau i le Perofeta

Saunia e Travis Howell

Sa ou filifili e talia valaaulia a Peresitene Nelson ma vaai pe moni ana folafolaga ia i tatou.

I ni nai tausaga ua mavae, sa asia ai e Elder Ronald A. Rasband o le Korama a Aposetolo e Toasefululua la’u eria e tuuina atu se aoaoga i taitai o uarota ma siteki i le lotoifale. I le faaiuga, sa ia faatautaia se avanoa mo fesili-ma-tali lea na ia faatagaina ai le faapotopotoga e fai atu ia te ia ni fesili. O ana tali sa malamalama manino ma musuia, ae o se tasi o fesili patino ma le tali na sili ona tulagaese mai ia te au:

O le a se lagona i le faauuina o Peresitene Russell M. Nelson e avea ma le perofeta fou?

Sa muai faafetai Elder Rasband i le tagata na faia le fesili ona faaauau lea ona faamatala mai lona aafiaga. Sa ia faamatala mai faapea ina ua ia faatoa faalogo ua maliu Peresitene Thomas S. Monson (1927–2018), sa faanoanoa o ia i le maliu ai o se perofeta pele. Ae ui i lea, sa tumu foi o ia i le faamoemoe, aua sa ia iloa sa saunia se tasi e tauave le tofi o le perofeta. Sa ia iloa e talafeagai lava le avea o Peresitene Nelson ma perofeta e sosoo ai. Ae sa ia manao foi ia iloa faaleagaga— mo ia lava — e moni lava o Peresitene Nelson o le perofeta a le Atua i le lalolagi.

Sa faaalu e Elder Rasband se taimi e tatalo ma aioi atu ai i le Atua, ma ole atu mo soo se ituaiga o molimau faaleagaga. Ina ua oo mai le taimi e faauu ai Peresitene Nelson, sa tuu atu e Elder Rasband ona lima i luga o lona ao faatasi ma isi Aposetolo, ma sa vave ona ia maua le faamautinoaga faaleagaga sa ia faamoemoe i ai. Sa ia fai mai, sa toetoe lava a lofituina, ma sa ia iloa ma le mautinoa a’ia’i o Peresitene Nelson o le perofeta moni lava.

Ina ua uma ona faamatalaina lona aafiaga, ona uunaia lea ma augani mai Elder Rasband ia i matou i le faapotopotoga e suesue, tatalo, ma faia le galuega e tatau ai ina ia iloa faaleagaga (ae le na o le sa’o e talafeagai) o Peresitene Nelson o le fofoga taumomoli a le Alii.

O lana valaaulia sa mau faatasi ma au, ma talu mai lava lena taimi, sa ou saili ia iloa mo au lava ia. Sa ou taumafai ia iloa — iloa moni lava — o Peresitene Nelson o le perofeta a le Atua iinei i le lalolagi.

Ma sei ou tau atu ia te outou, o se malaga uiga ese.

O le Sailia mo Au lava

E i ai se aafiaga tele o le suesue ma le tatalo i lenei faagasologa. Mo se faataitaiga, sa ou filifili e faitau saunoaga uma lava a Peresitene Nelson i konafesi aoao talu ona avea o ia ma se Pulega Aoao (e tele naua o loo i ai). Sa ou suesue foi i saunoaga uma o faigalotu na ia tuuina atu i le autalavou matutua, tamaiti aoga o le iunivesite, ma isi au maimoa. Sa fesoasoani lenei mea ia te au e iloa atili ia Peresitene Nelson ma mea e taua ia te ia.

Sa ou suesue foi i tusitusiga paia mo le taitaiga. O se tasi o fuaiupu na tulagaese o le Mataio 7:16, lea e tuuina mai ai e Keriso ia i tatou le ala sili e iloa tino ai pe o se tasi o Lana perofeta: “O le a outou iloa i latou i o latou fua.”

Ina ua ou faitau i lenei mea, sa ou iloaina o le auala sili ona lelei e iloa ai pe o Peresitene Nelson o se perofeta o le mulimuli i ana aoaoga ona vaavaai lea mo fua e fua mai ai. Sa tonu ia te au e suesue i lauga o konafesi aoao taitasi na tuuina mai e Peresitene Nelson talu mai le avea ai ma perofeta ma faailoa mai se mea se tasi pe sili atu i lauga taitasi ua ia poloaiina i tatou e fai. O nisi nei o nai faataitaiga:

Oketopa 2020: “A o e suesueina au tusitusiga paia i le isi ono masina e sosoo ai, ou te uunaia oe ia faia se lisi o mea uma ua folafola mai e le Alii o le a Ia faia mo Isaraelu o le feagaiga. … Mafaufau loloto i nei folafolaga. Talatalanoa e uiga i na [folafolaga] faatasi ma lou aiga ma uo. Ona soifua lea ma vaavaai i le faataunuuina o nei folafolaga i lou lava olaga.”¹
Aperila 2020: “Ia tatou anapopogi, tatalo, ma toe tuufaatasia ai lo tatou faatuatua. Ia tatou aioi atu ma le agaga tatalo mo se toomaga mai lenei faama’i pipisi i le lalolagi atoa.”²
Oketopa 2019: “Ou te aioi atu ia te outou ia suesue ma le agaga tatalo upumoni uma e te maua e uiga i le mana o le perisitua. … A o faateleina lou malamalama ma a o e faatinoina le faatuatua i le Alii ma Lona mana o le perisitua, o lou tomai e utuvai ai mai lenei ‘oa faaleagaga ua faaavanoa mai e le Alii o le a faateleina.”³
Aprila 2019: “Ia iloa po o a mea na e taofia oe mai le salamo. Ona sui lea! Salamo!”⁴
Oketopa 2018: “Ou te folafola atu afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava.”⁵
Aperila 2018: “Na saunoa Peresitene Nelson, “Ou te aioi atu ia te outou ia faateleina lo outou gafatia faaleagaga e maua ai faaaliga.”⁶

A o ou toe iloiloina nei valaaulia mai ia Peresitene Nelson, sa ou iloaina ai ou te lei manatu mamafa ia i latou i le taimi muamua na ou faalogo atu i ai. I nisi o tulaga, sa galo nimo lava ia te au le valaaulia. Sa ou filifili e faia ia sili atu ma faatutu ni sini faapitoa mo au lava ia mulimuli i le fautuaga a Peresitene Nelson.

O le taunuuga, ua ou maua aafiaga i le tele o fua. Ou te lagonaina se fuataga faaopoopo o le mana o le perisitua; ou te lagona le vavalalata atili i lou aiga; ma ou te lagona le latalata atili atu i lou Faaola, o Iesu Keriso. E mautinoa lava ou te le atoatoa ma o loo i ai pea nisi vaega se tele e faia e mulimuli ai i fautuaga uma a Peresitene Nelson, ae o au taumafaiga ua i ai ua na o le faia lava ia sili atu ona lelei o lou olaga.

O La’u Tali

Ina ia malamalama i tali sa ou mauaina, sa aoga mo au le suesue i aoaoga e uiga i faaaliga faaletagata lava ia mai ia Elder David A. Bednar o le Korama a Aposetolo e Toasefululua. Sa ia faatusaina le mamanu muamua o faaaliga i se ki o le malamalama, lea e mafai ai ona tafe vave mai ai le malamalama i totonu o le potu. E faapena foi, e mafai ona vave oo mai faaaliga, i se taimi e tasi. Ma o le mamanu lona lua o faaaliga na ia faatusaina i le oso ae o le la, lea e faasolosolo malie mai ai le malamalama ma le mausali.⁷

E foliga mai sa i ai ia Elder Rasband se aafiaga e pei o le “ki o le malamalama” ina ua ia tuu ona lima i luga o le ao o Peresitene Nelson ma lagonaina se molimau e le mafaafitia o Peresitene Nelson o le perofeta a le Atua.

Mo au, e pei ona ou suesue i le saunoaga a Peresitene Nelson ma ana aoaoga, ua ou matauina e pei o le oso malie o le la.

A o ou suesue, a o ou tatalo ai, ma a o ou faia le mea na fai mai Peresitene Nelson ia te au e fai, sa tuputupu ae lou faatuatua i “lea fuaitau i luga o lea fasifuaitau, ma lea mataupu i luga o lea mataupu” (tagai i le 2 Nifae 28:30). Atonu ou te lei mauaina se aafiaga faafaaaliga e pei o le ki o le malamalama, ae o se taunuuga o au tatalo ma le suesue, e mafai ona ou faapea atu moni lava, ou te faatuatuaina Peresitene Nelson o le perofeta a le Alii iinei i le lalolagi.

O le sailia o tali i a tatou fesili o le a manaomia ai se galuega i la tatou vaega, ae ou te iloa e mafai e i tatou uma ona maua se molimau patino i le valaauga paia o Peresitene Nelson ma tali i soo se isi lava fesili tatou te ono maua e uiga i le talalelei.

I lenei aafiaga atoa, sa ou aoao ai ma maua ai le faateleina o le faatuatua. Ma e faavavau lau faafetai ua faamanuiaina i tatou e le Alii i perofeta o aso nei i luga o lenei fogaeleele. Ou te iloa afai tatou te faalogo i a latou upu, o le a mauaina faamanuiaga maoae mo i tatou ma o tatou aiga.