Sau, Mulimuli Mai ia te A’u

“O Le A Ou Taitaia Outou i le Ala”

Saunia e Brother Milton Camargo

Fesoasoani Muamua i le Au Peresitene Aoao o le Aoga Sa

E ui atonu tatou te faapei o ni tamaiti i le faaleagaga, o le a taialaina i tatou e le Alii pe afai tatou te faatuatuaina o Ia.

mission president meeting with missionary — Na fai mai le faifeautalai sa musumusu atu le Agaga o le a ou fesoasoani ia te ia e sue se tali.

I le Mataupu Faavae ma Feagaiga 78:17–18, ua fetalai ai le Faaola:

“E moni, e moni, Ou te fai atu ia te outou, o outou o ni fanau iti, ma tou te lei malamalama lava i le tetele o faamanuiaga o i ai i le Tamā i ona lava aao ma ua saunia mo outou;

“Ma e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala. O le malo ua ia outou ma o ona faamanuiaga ua ia outou, ma o ʼoa o le faavavau ua ia outou ia.”

A o tatou tofu mafaufau i o tatou aafiaga i le olaga, o le a mautinoa lava lo tatou manatuaina o taimi na taitai ai i tatou e le Alii.

O Le Faatuatua o se Faifeautalai

Ou te manatua se tasi taimi na taialaina ai e le Alii nisi o tagata. Sa ou auauna atu o se peresitene o le misiona i le Misiona a Pasila Porto Alegre i Saute. O se tasi o a matou faifeautalai sa i ai se tulaga faaletonu na ta’ua o le laugutu tipi [cleft palate], lea e lei togafitia lava. A tautala o ia, e alu le ea i le pito i luga o lona gutu ma alu ai i fafo o lona isu. Sa faigata i isi ona malamalama ia te ia.

Sa fai mai lenei alii faifeautalai talavou ia te a’u sa tatalo e uiga i lona faafitauli. Sa ia fai mai sa musumusu atu le Agaga o le a ou fesoasoani ia te ia e sue se tali. O lona faatuatua faatauvaa, ma le naunautai na musuia ai a’u. Sa ou liliu atu i le Atua mo se fesoasoani i le mauaina o se vaifofo.

O se taotoga faigofie e mafai ona faasa’o ai le faafitauli, ae o le faia o le taotoga sa le o se faagasologa faigofie. A faapea matou te faia i se fomai totogi, o le a taugata tele mo le aiga o lenei faifeautalai. I le isi itu, o le faaaogaina o le polokalama o le soifua maloloina lautele e manaomia ai ni nai asiasiga faatulagaina [i le falemai] ma e ono alu uma ai masina na totoe o lana misiona.

O Le Faatuatua o Lo’u Toalua

O taimi uma lava e i ai sa’u misiona faigata e faataunuu, ou te faalagolago i le faatuatua ma le fesoasoani a lo’u toalua. Sa ou faamatalaina le faafitauli a lenei faifeautalai ia te ia ma fai atu i ai e talanoa ma i latou i le falema’i lautele i le lotoifale. Pe sa i ai se auala e mafai ai ona fai le taotoga, e aunoa ma se tau ma i totonu o le taimi o loo avanoa?

Ina ua uma ona tatalo mo se fesoasoani, na alu lo’u toalua i le falemai. Na ui i se laina umi o tagata o loo faatalitali e talanoa i se tagata faigaluega. A o faasolo le laina, sa mafai ona faalogo atu lou toalua i ala na taulimaina ai mataupu a i latou sa i ona luma atu. E masani lava, na faatonuina tagata e toe foi atu i se aso faatulagaina i le ono masina, o nisi taimi e sili atu.

Na iloa e lou toalua o le a umi tele lea taimi mo le matou faifeautalai. Sa uunaia o ia e tuua le laina ae alu atu i se isi faitotoa. O iina sa ia maua ai se isi tagata faigaluega o le falemai. Sa faailoa atu e lo’u toalua o ia ma faamatala atu le tulaga o loo manaomia e la matou faifeautalai.

Sa faatonuina o ia e le tagata faigaluega e talanoa sa’o lava i le fomai tipitipi, o le sa i ai i le falemai i lena aso e faatino se taotoga i se isi fogafale. Sa ia faamalamalama atu i le fomai tipitipi mea e faia e faifeautalai ma le ala o le a faamanuiaina ai lenei faifeautalai pe afai e mafai ona faia sona taotoga e toe faaleleia ai lona laugutu tipi.

Sa fai atu e le fomai tipitipi ni fesili. Ona ia fai mai lea, “E mafai ona tatou faatulagaina le taotoga i totonu o le lua vaiaso?” Sa ia faatumuina se fomu o le falemai lea na faamatalaina ai o lenei taotoga e manuia ai le afioaga ma sa ia fiafia patino i ai . Sa ia tuuina atu le fomu i lona fesoasoani ma fai i ai e atofa le aso.

O le sefulu o aso mulimuli ane, sa faia ai e le fomai tipitipi le taotoga a lo matou faifeautalai. Sa lei umi ae toe foi atu lenei alii faifeautalai i le talaiga, ma ataata ma tautala atu i se leo manino. Faatasi ai ma se naunautaiga faafouina, sa ia iloaina sa taitaiina o ia e le Alii i le ala.

O le aafiaga o lenei faifeautalai o se molimau lea e faafofoga lo tatou Tama ia tatou tatalo ma taitai i tatou i le lima.

A Aunoa ma le Atua, o i Tatou o Meanoa

O le talanoa ai faaleagaga, e tai pei i tatou o tamaiti laiti. Tatou te le malamalama i faamanuiaga sili ua saunia e le Tama Faalelagi mo i tatou. A o tatou tuputupu ae faaletino, ua amata ona tatou malamalama atili e uiga i tulafono faalelalolagi lea e pulea ai o tatou olaga. Ae e le tatau ona tatou faatagaina le malamalama faalelalolagi ia sili atu le taua nai lo le malamalama i faamanuiaga sili o loo faapolopolo mai e le Tama i le Lagi mo i tatou.

Sa i ai ia Mose, o se perofeta maoae o le Feagaiga Tuai, se aafiaga na faaali atu ai ia te ia le matua itiiti o lona silafia. Ina ua uma ona ia “vaaia le lalolagi ma ona tuluiga, ma le fanauga uma a tagata, ma e na foafoaina; o lea lava mea sa ofo tele ai o ia ma tuufesili ai.” Ona afio ese lea o le Atua. Sa tuua na o Mose, ma sa paʼū o ia i le eleele.

“Ma sa oo ina mavae itula e tele faatoa toe maua e Mose lona malosi faaletagata; ma sa ia faapea ifo ia te ia lava: O lenei ua ou iloa i lenei mea o le tagata o se mea noa, o se mea ou te lei mafaufauina lava” (Mose 1:8-10).

Afai na faaali mai e le Alii ia i tatou mea uma e mafai ona tatou faia i Lona mana, atonu o le a tatou lagonaina le lofituina. E pei lava o Mose, o le a tatou iloa ai a aunoa ma le Atua, o i tatou o mea noa.

Laasaga i lea Laasaga

Ae nai lo le lofituina o i tatou, o loo taitaia i tatou e le Alii i lea laasaga ma lea laasaga. O lenei mea e mafai ai ona tatou ausia ni mea se tele nai lo le mea tatou te mafaia na o i tatou lava.

“Aua o o’u manatu e le o outou manatu, o o’u ala e le o outou ala, ua fetalai mai ai Ieova.

“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” (Isaia 55:8–9).

E pei ona fetalai mai le Alii i le Mataupu Faavae ma Feagaiga 78:18, e “le mafai ona [tatou] gafatia mea uma i le taimi nei.” E lei mafai ona tatou malamalama i mea uma ua malamalama i ai o Ia. O le a la se mea e tatau ona tatou faia? Ua fetalai mai le Alii, “Ia outou loto tetele!”

O le savalia o le ala o le feagaiga ma le loto tele e aofia ai le lotomaualalo, e pei o se tamaitiiti. E tatau ona tatou naunau ia aoaoina ma taitaia e le Tama (tagai i le Mataupu Faavae ma Feagaiga 112:10). E matua faigata le olaga o lea e le mafai ai ona tatou puleaina ia faamatalaga uma o la tatou faigamalaga. Ma e le mafai ona tatou malamalama i mea uma tatou e oo i ai, po o e e pele ia i tatou, iinei i le lalolagi.

Ae a tatou faalagolago i le Alii ma tuu atu ia te Ia e taitai i tatou i le lima, e mafai ona tatou faataunuuina mea e tele i Lona malo nai lo mea e mafai ona tatou mafaufauina. O le a sili atu ona mafai ona tatou faamanuiaina olaga o fanau a lo tatou Tama Faalelagi. O le a sili atu ona mafai ona tatou iloa le aao o le Faaola i o tatou olaga. O le a sili atu ona mafai ona tatou lagonaina le agaga faafetai mo Lona alofa mutimutivale ma le alofa e le iu.

O Faamanuiaga e a Outou Ia

Ma le mea mulimuli, e taitaia i tatou e le Alii i le faamanatu mai ia i tatou, “o le malo ua ia outou ma o ona faamanuiaga ua ia outou, ma o oa o le faavavau ua ia outou ia” (Mataupu Faavae ma Feagaiga 78:18).

Ou te toe foi i le faataitaiga a la’u faifeautalai. Sa taialaina o ia e fesili atu mo se fesoasoani ma sa faamanuiaina i se taotoga lea ua mafai ai nei ona manino lana tautala. Ona taitaiina lea o ia ia i latou o e ua saunia e talia le talalelei ma ona faamanuiaga, e aofia ai le papatisoga. Ou te vaai foi i le faataitaiga a lo’u toalua. Na tuputupu ae malosi lana molimau a o taialaina o ia e le Alii. Ona Ia tatalaina lea o pupuni o le lagi ma sasaa mai se faamanuiaga.

Ou te faafetai ona sa ou galue faatasi ma lenei faifeautalai talavou, o le sa faatumulia i se faatuatua faatauvaa ma le mamana. Ma ou te faafetai ona e mafai ona ou ola e faavavau ma lo’u toalua, o le e faia se faataitaiga o le faatagaina o le Alii e taitaiina o ia.

E moni lava o le malo ma faamanuiaga e a tatou ia.