E Mafai Ona Tatou Fesootai Atu i Au Paia o Aso e Gata Ai o Aso ua Mavae

I le avea ai ma se tusitalafaasolopito o loo i ai Galuega Faatino o Pepa a Iosefa Samita, ou te fiafia e tuuina atu ni tautalaga i faigalotu ma fegalegaleai ma tagata o le Ekalesia e uiga i le talafaasolopito o le Ekalesia. A o ou faia lenei mea, sa ou matauina o nisi tagata e faigata ona fesootai ma le Au Paia o aso ua mavae. O le faaalia o nei tagata taitoatasi e masani ona taula’i atu i o latou uiga totoa, e foliga mai ai e pei latou te le’i tauivi ma le masalosalo, ma’i, po o le atuatuvale.

Ae o tagata o le Ekalesia sa ola i le vaitaimi o le 1800 sa le itiiti ifo lo latou le atoatoa i lo oe ma au o aso nei. Sa latou maua le olioli ma le fiafia, tiga ma mafatiaga—ma sa tele lava na o ni aso masani lava e leai ni mea se tele na tutupu ai. E tele ni mea ua ou aoaoina mai i o latou aafiaga e uiga i le auala e taulima ai le tulaga o le olaga faaletagata.

Ou te faamoemoe o loo fesoasoani au suesuega o le Mataupu Faavae ma Feagaiga i lenei tausaga e te aoao ai e uiga i auala na taulimaina ai e le Au Paia i aso ua mavae ia luitau o le olaga. Ou te faamoemoe foi i la’u tusiga i le auala na taulimaina ai e Iosefa Samita ia tofotofoga o le a fausia ai o outou faatuatua ma fesoasoani e te iloa ai e mafai ona tatou fesootai atu i luitau na oo i ai o ia (tagai i le itulau e 30). O se tasi o luitau o le, sa faigata ia te ia ona maua se taitaiga mai le Alii e iloa ai le auala e fesoasoani ai i le Au Paia na sauaina i Misuri. Ina ua tali mai le Alii, na Ia tuuina atu i le perofeta se uunaiga faamafanafana: “Ia filemu ma ia iloa o A’u o le Atua” (Mataupu Faavae ma Feagaiga 101:16).

E tele mea e mafai ona tatou aoao mai ia i latou ua maliliu—e le mai na o o latou aafiaga faavavega ae faapea foi ma lo latou tuuto leleoa.

Matthew C. Godfrey

Matagaluega o Talafaasolopito a le Ekalesia