O Leo o le Au Paia o Aso e Gata Ai
Faamolemole Toe Foi Mai
E oo ane i le taimi ua toatolu ai le ma fanau, sa fai mai Vanesa, “Tatou te manaomia le lotu i totonu o le fale lenei.”
Ina ua 12 ou tausaga, sa aumai e lo’u uso matua i le fale ni faifeautalai faamisiona, o e na faailoa mai ia i matou Le Ekalesia a Iesu Keriso o le Au Paia o Aso e Gata Ai. E lei pine, ae amata ona ave e lo’u tina ou uso e toalua, lo’u tuafafine, ma au i le lotu. E lei umi ae papatisoina uma i matou.
Ae peitai, na alualu, ona matou le toe o lea [i le lotu]. Sa ou fiafia i taimi uma i le Ekalesia, ae ina ua 17 ou tausaga, sa ese le ala na agai atu i ai lo’u olaga. Sa ou taumafai e avea ma se tagata lelei, ma sa lei leaga ni ou faamoemoega. Ae na ou leiloa ma amata ona ou ola i ala o le lalolagi. E aunoa ma lou iloaina, na mau le lalolagi ia te au.
Ona ou feiloai lea ia Vanesa. I se tasi aso ina ua mavae sina taimi o ma faatasi, sa ia faapea mai, “Tatou te manaomia le lotu i totonu o le fale lenei.” O le taimi lena ua toatolu le ma fanau.
I le lalolagi e pei ona i ai, sa ma popole po o le a le taitaiga faaleagaga o le a ma tuuina atu i le ma fanau. Sa ou manatu afai ou te toe foi atu i se lotu, o le a ou toe foi i la’u lotu. Sa ou manatua o se nofoaga e i ai tagata lelei.
Sa ou talanoa i se tagata o le Ekalesia ma tau atu ia te ia sa ou mafaufau e uiga i le toe foi mai i le lotu.
“Faamolemole toe foi mai!” o lana tala lea.
O lo’u popolega sili lava ina nei manatu la’u fanau e le manaia le lotu ma o le a le fiafia i ai, ae sa latou fiafia i ai. A o faaauau pea ona matou o i le lotu, sa filifili Vanesa sa leai se mea e tutusa ai ma le Ekalesia e fesoasoani i aiga ia tutupu a’e faatasi. O le mea tonu lava lea sa ia sailia. Sa ma faaipoipo ma Vanesa, ma na papatisoina o ia ma le ma fanau.
Ua matou savavali nei i le ala o le talalelei o se aiga. O le matou sini ia faamauina faatasi i le malumalu.
I le taimi o le fausiaina o le Malumalu o Rio de Janeiro Pasila, na toetoe o aso uma sa ou savali latalata i ai. Ou te tau atu i au uo, “E i ai se aso, o le a ou faaipoipo ai i totonu o lenei fale.”
“Sole, o lau tala lava lena i aso uma!” sa latou fai mai ai.
Sa ou faia i aso uma ona sa ou iloa na latalata ina maea le malumalu, ma sa ou manao e faamanatu ia te au lava, ia faaauau pea ona faia mea tonu ina ia mafai ai ona faamauina faatasi lo matou aiga. O le manao lena o lo’u loto.
Ou te iloa o le a amata ona aoao atili lau fanau e uiga i le lalolagi ma oo atu ai i nisi o mea ia sa ou oo i ai. Ae a o faasoa atu ou aafiaga ia i latou, ou te faapea atu, “Faamolemole aua lava nei tou latalata i mea sa ou faia ona e le aoga.”
Ou te uunaia la’u fanau e suesue i le talalelei a Iesu Keriso ma taulai atu i le avea ai ma ni faifeautalai i le taimi nei ina ia mafai ona latou faamanuiaina isi. Latou te le malamalama i mea uma, ae o loo latou aoao pea. O le mea lenei ou te moomoo i ai mo i latou.