Awtoridad, mga Ordinansa, & Pagpangandam
Ni Presidente Dallin H. Oaks
Unang Magtatambag sa Unang Kapangulohan
Ang mga ordinansa sa kaluwasan ug kahimayaan mao ang sukaranan sa dakong plano sa Dios alang, ug pag-andam, sa Iyang mga anak.
Litrato sa Tegucigalpa Honduras Temple ni Cody Bell
Ang mga kasulatan puno sa mga pakisayran kabahin sa Ikaduhang Pag-anhi, ang panghitabo nga matinguhaong gipaabot sa mga matarong ug gikahadlokan o gilimod sa mga daotan. “Himoa nga ang pahayag mopaingon ngadto sa tanan nga mga katawhan,” ang Ginoo mipasidaan sa sinugdanan pa gayod sa Pagpahiuli. “Tan-awa, ug sud-onga, ang Pamanhonon moabut. … Pag-andam sa inyong mga kaugalingon alang sa mahingungdanon nga adlaw sa atong Ginoo” (Doktrina ug mga Pakigsaad 133:10; tan-awa usab sa 34: 6).
Pagpangandam sa Pagsugat sa Dios
Nagpuyo kita sa mga gipanagna nga panahon “nga ang kalinaw pagakuhaon gikan sa yuta” (Doktrina ug mga Pakigsaad 1:35), kon ang “tanan nga mga butang magkaguliyang; ug … mga kasingkasing sa tawo mopakyas kanila” (Doktrina ug mga Pakigsaad 88:91). Gilibotan kita sa mga hagit sa tanang habig, apan uban sa hugot nga pagtuo sa Dios, kita mosalig sa mga panalangin nga Iyang gisaad niadtong kinsa motuman sa Iyang mga sugo ug nangandam.
Isip kabahin sa atong pagpangandam sa pagsugat Kaniya, ang Ginoo misugo, “Barug kamo sa balaan nga mga dapit, ug ayaw pagbalhin, hangtud ang adlaw sa Ginoo moabut; kay tan-awa, kini moabut sa labing dali”(Doktrina ug mga Pakigsaad 87:8). Unsa man kadtong “balaan nga mga dapit”? Siguradong kini naglakip sa templo, nga gitambongan niadtong kinsa matinud-anong nagtuman sa ilang mga pakigsaad. Siguradong naglakip kini sa mga dapit diin nagserbisyo ang matinud-anong mga misyonaryo ug sa uban nga gitawag pinaagi sa awtoridad sa pagkapari. Samtang kita mobarog sa balaang mga dapit, kita mopakita ug mopaubos sa awtoridad sa pagkapari ug magtinguha kita sa mga ordinansa nga gikinahanglan alang sa kahimayaan ug kinabuhing dayon.
Awtoridad sa pagkapari diha sa Gipahiuli nga Simbahan
Traynta ka tuig ang milabay, nakabaton ko og kasinatian kabahin kon sa unsang paagi ang awtoridad sa pagkapari diha sa Ang Simbahan ni Jesukristo sa mga Santos sa Ulahing mga Adlaw nalahi gikan sa ubang matang sa awtoridad. Ang asawa sa usa ka inila nga mga ministro sa Protestante miadto sa akong opisina. Sulod sa mga katuigan siya ug ang iyang bana miserbisyo sa Ginoo uban sa talagsaong kakugi diha sa Kristohanong pagpangalagad. Karon siya gusto nga mopasakop sa Simbahan, apan aduna siyay usa ka pagpanagana.
Mianhi siya aron mangutana kanako ngano nga siya kinahanglan pang bunyagan nga siya nabunyagan naman nga usa ka Kristiyano pinaagi sa iyang ministro nga bana, kinsa mibunyag og daghang mga tawo diha sa iyang kongregasyon. Nangutana siya, “Ang imong pasabot nako nga ang akong bana walay bisan unsang awtoridad sa pagbunyag sa tanan niadtong mga tawo nga iyang gibunyagan?”
Ang Espiritu miabot aron sa pagtabang kanako, samtang nag-ampo kami alang niini nga mga sitwasyon.
“Dili, sigurado ko nga ang imong bana adunay awtoridad alang niadtong mga bunyag,” mitubag ko. “Siya adunay awtoridad sa iyang simbahan, sa iyang kongregasyon, ug ang balaod sa yuta makahatag kaniya. Siya migamit niana nga awtoridad sa pagbunyag, pagpahigayon og mga kaminyoon, paghatag og trabaho sa mga tawo alang sa pisikal nga mga panginahanglan sa iyang gambalay sa simbahan, ug pagtudlo og mga tawo nga moapil sa pagsimba niini. Wala kami mosaway niana nga awtoridad, apan gusto namo nga masayod ka sa usa ka lahi nga matang sa awtoridad: ang gahom sa Dios nga gisangon ngadto sa mga mortal.”
Ako mipasabot kon unsa ang hinungdan nga atong gikinahanglan ang bunyag alang sa mga tawo nga makabig ngadto sa gipahiuli nga Simbahan ni Jesukristo mao ang panginahanglan sa bunyag pinaagi sa balaang awtoridad nga gihatag ni Jesus ngadto ni Pedro ug sa ubang mga Apostoles. Gamit niana nga awtoridad, Siya misulti kanila nga bisan unsa ang ilang bugkuson diha sa yuta pagabugkuson sa langit (tan-awa sa Mateo 16:19; 18:18). Sa laing pagkasulti, kini mahimong balido ug epektibo lapas sa tabil sa kamatayon aron sa pagtagbaw sa mga gikinahanglan sa langit. Mipamatuod ako kaniya nga kini nga awtoridad gipahiuli na ug karon anaa lamang sa Ang Simbahan ni Jesukristo sa mga Santos sa Ulahing mga Adlaw. Wala madugay human niana, kini nga babaye ug ang iyang bana nabunyagan. Ako silang nailhan nga matinud-anong mga miyembro sulod sa mga katuigan.
Ang kaimportante sa awtoridad klaro diha sa daghang mga asoy sa kasulatan kabahin sa yutan-ong pagpangalagad sa atong Manluluwas. Atong mabasa nga ang mga tawo nga Iyang gitudloan “natingala sa iyang pagtulon-an. Lahi siya sa ilang mga magtutudlo sa Balaod kay ang iyang pagtudlo inubanan man sa awtoridad” (Mateo 7:28–29; tan-awa usab sa Marcos 1:22; Lucas 4:32). Diha sa sinagoga nga sila “hilabihang kahibulong” nga “kining tawhana adunay gahom sa pagsugo sa mga yawa ug sila motuman kaniya” (Marcos 1:27; tan-awa usab sa Lucas 4:36). Si Jesus misulti sa nangusyoso nga mga escriba “nga ang Anak sa Tawo adunay gahom dinhi sa yuta sa pagpasaylog mga sala” (Marcos 2:10; tan-awa usab sa Lucas 5:24).
Sa wala madugay, ang punoang sacerdote ug mga elder nangutana Kaniya kon sa unsa nga katungod nga Siya nakabuhat niining butanga (tan-awa sa Mateo 21:23–27; Marcos 11:27–33). Wala kini Niya isipa nga nanginahanglan og tubag. Apan unsay Iyang gisulti ug gibuhat sa kadugayan nagpadayag sa Iyang tubag. Sa dihang mitawag Siya sa Iyang mga Apostoles, Siya “mipili” kanila (Juan 15:16), “nga unta siya mopadala kanila sa pagsangyaw, ug sa gahom sa pagpang-ayo sa sakit, ug sa pagpapahawa sa yawa” (Marcos 3:14–15; tan-awa usab sa Mateo 10:1; Lucas 9:1; Mga Buhat 8:18–19). Sa dihang Siya mitawag og Seventy, Siya mihatag kanila og “gahum” (Lucas 10:19).
Ang Manluluwas adunay balaan nga gahom ug awtoridad, ug Siya mipaambit niini. Sama sa gisulti ni Juan Bautista, “gitugyan sa Amahan ang tanan ngadto kaniya” (Juan 3:35).
Ang Kamahinungdanon sa mga Ordinansa
Ang labing pamilyar nga mga ehemplo sa paggamit sa awtoridad sa pagkapari naglakip sa mga ordinansa. Ang mga ordinansa ug ang pagkapari dili mabulag. Ang ordinansa usa ka sagradong buhat nga may mahangtorong importansya, nga gihimo gamit ang awtoridad sa pagkapari. Kini kauban sa paghimo og mga pakigsaad ug ang pagsaad sa mga panalangin. Ang mga ordinansa sa gipahiuli nga Simbahan ni Jesukristo naglakip sa bunyag, ang pag-ambit sa sakrament (ang labing kanunay nga ordinansa sa Simbahan), ug ang mga ordinansa sa templo, lakip na ang kaminyoon alang sa karon ug hangtod sa kahangtoran ug sa gasa sa atong gitawag og endowment, diin naglangkob sa kahibalo, mga pakigsaad, ug gisaad nga mga panalangin.
Ang kinahanglanon sa mga ordinansa hinatag sa Dios ug adunay mahangtorong epekto. Adunay usa ka balaod, nga dili mausab nga sugo didto sa langit sa wala pa ang mga katukuran niini nga kalibutan, nga diha ang tanan nga mga panalangin gipasikad” (Doktrina ug mga Pakigsaad 130:20). Ug “sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin, ug sa mga kinahanglanon niini, ingon nga gitukod sa wala pa ang katukuran sa kalibutan. (Doktrina ug mga Pakigsaad 132:5).
Ang mga ordinansa sa kaluwasan ug kahimayaan mga sukaranan sa dakong plano sa Dios alang sa Iyang mga anak. Si Jesus mitudlo nga ang kaluwasan diha sa gingharian sa Dios moabot kon kita “matawo pinaagi sa tubig ug sa Espiritu” (Juan 3:5). Ang kahimayaan (kinabuhing dayon, “ang matang ug kalidad sa kinabuhi nga gipuy-an sa Langitnong Amahan ug sa Iyang Hinigugmang Anak”1) nagagikan sa mas taas nga mga pakigsaad ug ordinansa sa templo (tan-awa sa Doktrina ug mga Pakigsaad 14:7; 84:38; 88: 107; 132: 16–17, 20–21). Ang atong propeta, si Presidente Russell M. Nelson mitudlo: “Kini nga kinabuhi mao ang panahon sa pagpangandam alang sa kaluwasan ug kahimayaan. Sa mahangturong plano sa Dios, ang kaluwasan usa ka butang nga may kalabutan sa indibidwal; ang kahimayaan usa ka butang nga may kalabutan sa pamilya.”2
Pagpangandam sa Pagsugat sa Ginoo
Siya Moanhi Pag-usab aron Maghari, ni Mary Sauer
Sa modernong pagpadayag, gisultihan kita nga siya nga mahadlok sa Ginoo “maglantaw alang nianang mahinungdanon nga adlaw sa Ginoo nga moabut, gani sa mga timailhan sa pag-anhi sa Anak sa Tawo” (Doktrina ug mga Pakigsaad 45:39). Sa katapusang panahon sa wala pa matapos ang Iyang mortal nga pagpangalagad, si Jesus namulong kabahin sa Iyang Ikaduhang Pag-anhi. Gihulagway niya ang mga kalisdanan nga mag-unang moabot ug ang importansya—bisan pa sa mga kalisdanan—sa pagkahimong “andam” (Mateo 24:44). Dayon Siya mideklarar nga, “Pagkabulahan niadtong sulugoon nga makaplagan sa iyang agalon nga nagtuman niini sa paghiuli niya” (Mateo 24:46; tan-awa usab sa Lucas 12:37, 43).
Si Presidente Nelson mitudlo, “Nagpadulong pa lang kita sa gikahinaman niining katapusang dispensasyon—sa diha nga ang Ikaduhang Pag-anhi sa Manluluwas mahimong reyalidad.”3 Ang mga timailhan nianang Ikaduhang Pag-anhi anaa na sa atong palibot ug ingon og nag-anam og kadug-ol ang panghitabo ug nagkakusog. Sa tibuok kalibotan, kita makasinati o nakadungog bahin sa mga linog, kagutom, bagyo, baha, kamatay ug armadong mga kasungian. Apan dili tanan niining mga timailhan makahulga. Ang usa ka positibo nga timailhan sa mga panahon mao ang gipanagna nga pagpundok sa Israel, diin si Presidente Nelson mipahayag nga “mao ang labing importanting butang nga nanghitabo na sa yuta karon.”4
Samtang kining pagpundok mapadayon, kita nag-establisar og mga stake “alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta” (Doktrina ug mga Pakigsaad 115:6). Kita nagpadali usab sa pagtukod og mga templo, diin ang mga matinud-anon magpundok diha sa ilang kaugalingong mga yutang natawhan aron sa paghimo sa mga pakigsaad nga nagtugot kanila nga mahimong takos sa kinabuhing dayon (tan-awa sa Doktrina ug mga Pakigsaad 84:19–22; 131:1–3).
Sama sa gitudlo diha sa Basahon ni Mormon, “Kini nga kinabuhi mao ang panahon alang sa mga tawo sa pagpangandam sa pagsugat sa Dios” (Alma 34:32). Nangandam ba kita?
“Unsa kaha kon moabot Siya ugma? Kon kita mahibalo nga kita mosugat na sa Ginoo ugma—pinaagi sa atong kamatayon nga wala sa oras o pinaagi sa Iyang kalit nga pag-abot—unsa may atong buhaton karon? Unsa nga mga pagkumpisal ang atong himoon? Unsa nga mga binuhatan ang atong undangon? Unsa nga pagpasaylo ang atong ihatag? Unsa nga mga ordinansa ang atong tinguhaon? Unsa ang dugang mga butang nga atong buhaton aron matuman ang atong mga pakigsaad? Kon kita nakabuhat man niining mga butanga kaniadto, nganong dili man karon? Kon ang atong mga lampara sa pagpangandam hapit na mahurot, sugdan dayon nato ang pagtimbol niini.