Digital Lamang: Mga Young Adult
Ang mga Panalangin sa Pagkonektar ngadto sa mga Katigulangan
Ang akong namatay na nga lola nakatabang nako sa pagdawat sa ebanghelyo ni Jesukristo ug sa pag-angkon og pagpamatuod sa buhat sa family history.
Sa tibuok nakong kinabuhi, nagtuo ko nga kinahanglan gayod nga adunay usa ka espirituwal nga panagsumpay tali kanako ug sa akong mga katigulangan.
Ang akong mga apohan kanunay nga miasoy og mga istorya ug mipakita og mga litrato sa akong mga katigulangan, ug ako mibati nga mas suod ngadto kanila matag higayon nga kami naghisgot kanila. Ang akong pamilya ug ako dili mga miyembro sa Simbahan, apan ang akong lola sa gihapon mitudlo kanako sa pag-ampo kada adlaw. Ug pinaagi niana nga mga pag-ampo, ako nagsugod nga mituo sa Dios ug sa mga ideya nga ang akong namatay na nga mga katigulangan sa bisan unsang paagi nagpadayon sa pagpakabuhi.
Adlaw sa Tanang mga Santos
Sa Hungary magsaulog mi og usa ka kapistahan human sa Halloween nga gitawag og Adlaw sa Tanang Santos. Niining higayona, ang tanan mobisita sa mga sementeryo diin gilubong ang ilang mga minahal ug mga katigulangan, ug magbutang kami og mga bulak diha sa ilang mga lubnganan ug mopasiga og kandila aron sa paghinumdom ug pagpasidungog nila.
Sa gamay pa ko, akong gibati ang pribilehiyo nga makabaton og mas lawom nga koneksyon ngadto sa akong mga katigulangan, kay sa tinuoray ako natawo sa Adlaw sa Tanang Santos. Kanunay kadto nga usa ka hilabihang espesyal nga adlaw alang kanako.
Apan ako usab kasagaran moreklamo mahitungod sa pagbisita sa akong mga katigulangan, tungod kay dili ko gustong mogahin sa akong birthday sa sementeryo. Wala nako makita kon unsa gayod ka talagsaon ang kabahin sa pagbisita sa samang mga lubnganan sa matag tuig, ilabi na kon sakop sila sa mga katigulangan kinsa wala pa gayod nako mahimamat.
Hinuon, samtang nagtubo ko ug nakabaton og pagpamatuod sa ebanghelyo, mas nadugangan ang akong kahibalo mahitungod sa plano sa kalipay ug sa kasagrado sa buhat sa family history. Nasayod ko nga ang tanan mahimo ug kinahanglang mahalon ang ilang mga katigulangan ug maningkamot sa pagbaton og napalambo nga koneksyon ngadto niining importante nga mga miyembro sa atong mga pamilya.
Usa ka Tinguha sa Pagtabang sa Akong Lola
Gipaila ako ngadto sa Simbahan sa sinugdanan sa 2018. Ganahan ko sa pagkat-on gikan sa mga misyonaryo, ug sa dihang gisultihan ko nila mahitungod sa kaimportante sa buhat sa family history ug sa templo, ako wala matingala. Nasayod na ako nga adunay usa ka butang nga importante mahitungod sa pagkat-on ug sa pagserbisyo sa mga sakop sa pamilya kinsa mitaliwan na.
Si Elder Dale G. Renlund sa Korum sa Napulog Duha ka Apostoles mipasabot:
“Ang buhat sa family history ug sa templo dili lang para sa mga patay apan mopanalangin usab sa mga buhi. …
“… Mas labaw kini kay sa giawhag nga kalingawan, tungod kay ang mga ordinansa sa kaluwasan gikinahanglan sa tanang anak sa Dios.”1
Sa pagkadungog niini, madasigon ko nga magpadayon sa pagkat-on kabahin sa ebanghelyo ug sa kataposan mohimo sa buhat sa templo alang sa akong mga katigulangan ug mokonektar pa og dugang ngadto kanila.
Niadtong Nobyembre 1, 2018, ang akong pamilya ug ako mibisita sa lubnganan sa akong lola. Nakaila kaayo ko niya sa tibuok nakong kinabuhi, ug gimingaw ko niya sukad nga namatay siya. Nagkat-on pa ako mahitungod sa Simbahan niadtong panahona, ug segurado gyod ko nga ang akong lola dili mouyon ug mopugong sa akong interes sa Simbahan kon buhi pa siya. Siya masulondon kaayo sa tradisyon sa iyang relihiyon.
Mao nga nakalitan ko dihang, samtang nagbarog sa atubangan sa iyang lubnganan ug nag-ampo para niya, nakadawat ko og talagsaon nga impresyon nga siya nakahibalo na sa mga kamatuoran sa ebanghelyo ni Jesukristo. Gibati nako nga siya mapasigarbuhon kanako tungod kay ako adunay oportunidad sa pagpakabuhi sumala sa ehemplo sa Manluluwas.
Nakuratan ako.
Ang mga misyonaryo bag-ohay lang mitudlo kanako nga kadtong kinsa anaa sa pikas nga bahin sa tabil adunay mga oportunidad sa pagkat-on sa ebanghelyo kon wala silay kahigayonan sa pagkat-on mahitungod niini dinhi sa yuta (tan-awa sa Doktrina ug mga Pakigsaad 138: 22–24). Sa ubang paagi nasayod ko nga ang akong lola natudloan na niini nga mga kamatuoran ug andam na nga modawat sa ebanghelyo. Ako nasayod nga siya nanginahanglan sa akong tabang aron mahimo ang iyang buluhaton sa templo.
Ug aron mahimo kana nga buhat, kinahanglan nga ako mismo magpabunyag.
Taud-taod na kong naghunahuna kon tinud-anay ba gyod kong gusto nga mahimong miyembro sa Simbahan ni Jesukristo. Ug kini nga kasinatian didto sa lubnganan sa akong lola mao ang migiya kanako nga sa kataposan motakda na og petsa sa pagpabunyag uban sa mga misyonaryo.
Usa ka Milagroso nga Biyahe ngadto sa Templo
Mga bulan ang milabay, ang mga young single adult sa akong dapit nagplano og usa ka biyahe sa pagbisita sa Freiberg Germany Temple sa sunod nga tuig. Gihagit mi nga mag-andam daan og mga ngalan sa among kaugalingong pamilya aron among dad-on.
Mibisita ko sa daghang mga sakop sa pamilya ug sa usa ka pari sa usa ka balangay diin nagpuyo ang akong mga katigulangan aron sa pagtigom og impormasyon ug mga rekord. Nag-ampo usab ko alang sa giya nga makatabang nako sa pagpangita sa ubang mga sakop sa akong pamilya kinsa nanginahanglan nga malihok ang ilang buluhaton.
Sa kataposan, nakapundok ko ug nakaandam og 40 ka ngalan sa pamilya nga pabunyagan sa akong unang biyahe ngadto sa templo. Apan dihay usa gyod ka katigulangan nga sa tinuoray mahinamon kaayo ko.
Sa adlaw nga kami mibisita sa templo, usa sa akong pinakasuod nga mga higala (kinsa sa kataposan nahimo nakong bana) migunit sa akong kamot ug migiya nako ngadto sa bunyaganan aron sa pagkompleto sa bunyag ni lola. Ug sa dihang iya kong giunlod ngadto sa tubig ug gihaw-as og balik, gibati nako ang labing mainiton nga pagbati sa Espiritu Santo.
Diha-diha dayon nasayod ko nga ang akong lola nag-uban nako ug nga siya mapasalamaton nga sa kataposan nahimong miyembro sa Simbahan. Mapasalamaton ko niya sa pagtabang nako nga sa tinud-anay nga makaamgo kon unsa ka mahinungdanon ang buluhaton nga atong gihimo diha sa mga templo ngadto sa atong mga katigulangan.
Nagkinahanglan Kita sa Usag Usa
Mapasalamaton kaayo ko niini nga kasinatian uban sa akong lola, tungod kay kini mipamatuod kanako sa unsay akong gituohan sa tibuok nakong kinabuhi—nga ang atong mga katigulangan ug mga minahal kinsa namatay na tinuod nga nagpadayon sa pagpakabuhi ug nga kita makapalambo sa atong koneksyon ngadto kanila.
Kita makakuha og kalig-on, gugma, ug uban pang daghan nga mga panalangin gikan sa atong mga katigulangan samtang kita magkat-on mahitungod kanila, magmapasalamaton ngadto kanila, ug mopahigayon sa sagradong mga ordinansa alang kanila diha sa templo.
Kon magdapit sa mga miyembro sa Simbahan sa pagdugang sa ilang panahon sa paghimo sa buhat sa family history, si Elder David A. Bednar sa Korum sa Napulog Duha ka Apostoles misaad: “Kon motuman mo niini nga pagdapit uban sa pagtuo, ang inyong mga kasingkasing mobati sa inyong mga amahan. … Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensya sa yawa.”2
Ako mapasalamaton sa akong mapinanggaon nga lola. Dili ko makahulat sa adlaw nga kami magkahiusa pag-usab ug nga ako makasulti niya sa unsa nga paagi siya nakatabang nako nga hingpit nga mohangop sa ebanghelyo ni Jesukristo. Nasayod ko nga samtang kita naningkamot sa pagkonektar ngadto sa atong mga katigulangan ug mopalig-on sa atong relasyon ngadto kanila, kita makapalambo sa atong hugot nga pagtuo ug mas maduol ngadto kang Kristo.
Nagkinahanglan sila kanato— sila nagpaabot kanato. Ug nagkinahanglan usab kita kanila (tan-awa sa Doktrina ug mga Pakigsaad 128: 18).