Digital Lamang: Mga Hulagway sa Hugot nga Pagtuo
Ang Ginoo Miayo Kanako
Sukad sa among pagkakaplag sa Ang Simbahan ni Jesukristo sa mga Santos sa Ulahing mga Adlaw, wala na kami magkulang sa mga panalangin.
Litrato pinaagi ni Leslie Nilsson
Sulod sa daghang katuigan, nasakit ko. Miinom ko og tambal, apan ang akong kondisyon wala gayod mouswag. Naglisod ko sa paglakaw og usa ka eskina nga dili mohunong aron mopahulay og tulo o upat ka higayon. Naghunahuna ko nga tingali gisulayan ko tungod kay wala ko magsimba.
Ang akong asawa, si Silvia, ug ako mapasalamaton kaayo sa mga igsoong lalaki ug mga babaye kinsa mitabang sa pagdala kanamo ngadto sa Ang Simbahan ni Jesukristo sa mga Santos sa Ulahing mga Adlaw. Usa ka igsoong lalaki miingon, “dili ko mosulti kaninyo nga kamo kinahanglan nga moadto sa simbahan. Ang Ginoo mao ang naghangyo ninyo sa pag-adto.”
Miabot mi niana nga pagbati.
Naghinulsol mi sa among mga sala dihang gipaila mi ngadto sa Simbahan. Hilabihan ka mahinungdanon ang paghinulsol. Among gibiyaan ang among mga bisyo ug mihangyo sa Ginoo nga pasayloon mi sa among mga sala ug sa paghupot kanamo hangtod kami mamatay.
Human kami nakakaplag sa ebanghelyo ug misugod sa pagtambong og mga miting, nagsugod og kaarang-arang ang akong gibati. Human mi nagsugod sa pagtambong sa templo, ang akong panglawas mas milambo pa gayod. Gani nakahimo ko sa pagdula og fútbol pag-usab. Ang Ginoo miayo sa akong sakit. Karon ang akong asawa ug ako aduna gihapoy pisikal nga mga hagit, apan tungod sa among hugot nga pagtuo, ang Ginoo nanalangin ug naglig-on kanamo.
Sukad nga nakaplagan namo ang Simbahan, wala na kami magkulang sa mga panalangin. Nagbayad mi sa among ikapulo, ug ang Ginoo naghatag kanamo labaw pa kay sa gihatag namo Kaniya. Kami mapasalamaton sa panimalay nga Iyang gihatag kanamo. Kami mapasalamaton nga adunay igo nga kami makahatag ngadto sa mga kabos. Kami mapasalamaton sa himsog nga kinabuhi nga among napahimuslan. Malipayon kaayo kami. Gihigugma namo ug mapasalamaton sa Simbahan. Kami nasayod nga kini tinuod!
Kami nasayod nga ang among kinabuhi anaa sa mga kamot sa Langitnong Amahan ug ni Jesukristo, mao nga kami mag-ampo sa Langitnong Amahan sa makadaghan sa usa ka adlaw. Wala kami masayod kon kanus-a ang panahon nga kami mamatay, kon kanus-a ang Ginoo moabot para kanamo, apan kami mapasalamaton nga gipakita Niya kanamo ang dalan balik ngadto Kaniya.