Digital Lamang: Mga Young Adult
3 ka Panabot sa Pagpalambo og Lig-on nga Pundasyon sa Kaminyoon
Ang tagsulat nagpuyo sa Utah, USA.
Ang hagit nga atong giatubang sa kaminyoon makahashas sa atong mga relasyon.
Ang kaminyoon dili kanunay nga sayon.
Apan daghan kanato—sa kinahiladman sa atong pagbati—nagtuo nga angay unta nga kini sayon ra.
Dili lisod nga masabtan kon ngano. Ang tanang matang sa inila nga mga libro ug mga salida nagtudlo kanato nga ang tinuod nga hagit sa kinabuhi mao ang pagpangita ug pagtinguha sa atong tinuod nga gugma—apan human kita maminyo, ang tanan malipayon hangtod sa kahangtoran. Ug ang maayong pagkahan-ay nga mantala sa social media sa atong minyo na nga mga higala ingon og makapalig-on niining dili tukma nga pagtuo!
Nan unsa may atong buhaton kon mobati kita nga ang atong kaminyoon ingon og lahi kay sa unsay atong gilaoman?
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, napanalanginan kita nga nakasabot nga ang mortalidad giplano nga adunay kauban nga mga hagit. Makakab-ot kita og dakong kalipay sa kaminyoon samtang ato kining hangupon isip usa ka oportunidad sa pagtubo, pagsalig ni Jesukristo, ug pagtugot Kaniya sa paghashas kanato.
Kon ikaw naglisod sa pagtan-aw sa mga hagit sa kaminyoon isip usa ka panalangin, ikonsiderar ang mosunod nga mga panabot.
1. Ang wala matuman nga mga gilaoman mahimong oportunidad alang sa dugang nga panaghiusa.
Daghan kanato daghan kaayo og gilaoman gikan sa kaminyoon—kaugalingong katumanan o ubang sama sa damgo nga kalipay nga wala nato makaplagi samtang kita single pa. Apan kon dili kita mag-amping, makapalambo kita og mga gilaoman sa unsay atong gihunahuna nga mao gayod ang kaminyoon imbis nga magtinguha sa pagsabot sa giplano sa Ginoo kon unsa ang kaminyoon.
Si Elder David A. Bednar sa Korum sa Napulog Duha ka Apostoles mipahayag: “Ang kaminyoon isip usa ka balaan nga sugo nga gibase sa mahangturong pakigsaad, mga katungdanan, ug sakripisyo sa tibuok kinabuhi mao ang klarong sukwahi sa modernong sekular nga mga konsepto sa kaminyoon. Ang kalibutanon nga mga ideya halos walay kalabotan sa bug-os nga paglahad sa inyong kinabuhi diha sa pag-alagad sa pamilya o sa pagsakripisyo sa kaugalingon alang sa kapikas ug mga anak.”1
Maayo gani, ang kaminyoon mahimong usa ka buhat nga in nagpadayon pa sa pag-uswag! Unsa kaha kon, imbis nga maglaom sa kaminyoon nga awtomatik nga modala og dugang nga kalipay, ato kining tan-awon isip usa ka oportunidad sa pagsakripisyo ug pagserbisyo sa usag usa—alang sa duha ka masalaypon nga mga tawo nga mahimong mas mapainubsanon, aron molambo ug mas mahimong sama kang Kristo?
Tingali makahadlok pamation nga likayan ang gilaoman nga ang kaminyoon kinahanglang usa gayod ka makanunayong kalipay. Apan samtang ato kining pulihan sa usa ka pasalig sa pagsakripisyo alang sa usag usa—sama sa gihulagway ni Elder Bednar—mas mapahiuyon nato ang atong mga kinabuhi kang Kristo. Ang katahom niini nga paagi mao nga ang Ginoo molig-on sa atong mga kaminyoon ug motabang nato sa pagkab-ot sa kalipay nga kanunay natong gitinguha!
2. Ang mga panagsupak mahimong mosangpot ngadto sa usa ka napalambo nga relasyon.
Kon ang duha ka mga tawo mohiusa sa ilang kinabuhi, dili sila kanunay nga magkauyon:
Asa man kita mopuyo? Unsaon man nato paggamit ang atong kwarta? Pila ka oras ang atong igahin uban sa mga ugangan? Kapila kinahanglang limpyohan ang balay?
Apan ang panagsupak mahitungod nianang mga butanga dili ingon nga dili maayo. Gani sa pagkatinuod, ang pagkat-on sa pagsupak nga dala ang kamabination ug konsiderasyon usa ka maayo kaayong paagi sa pag-ugmad og kamapaubsanon ug kaluoy. Ug samtang kamo maningkamot sa pagsabot sa panglantaw sa inyong kapikas, ang inyong gugma mapalambo samtang kamo mas makaila pa gayod kaniya.
Si Presidente Jean B. Bingham, Kinatibuk-ang Presidente sa Relief Society, mitudlo kon sa unsang paagi kita makahimo niana. Siya miingon: “Ang panaghiusa importante sa balaan nga buhat nga kita dunay pribilehiyo ug gitawag sa pagbuhat, apan dili lang kini mahitabo. Kini nagkinahanglan og paningkamot ug panahon nga magtinambagay—sa pagpaminaw sa usag usa, pagsab[o]t sa panglantaw sa uban, ug mag-ambitay og mga kasinatian—apan ang proseso moresulta sa mas madasigong mga desisyon.”2
Kon mahitabo ang panagsupak, ang panaglalis sa kasagaran mahimong malikayan pinaagi sa paghunahuna sa mas dako nga tumong imbis nga mopukos sa butang nga gikasumpakian. Epektibo kini sa dagko ug gagmay nga mga aspeto sa kaminyoon.
Sama pananglit, tingali ang imong kapikas nagkarga og mga hugasan sa diswasher sa paagi nga makalagot kaayo nimo: Mga tasa ang dapat ang ibutang diha, dili ang mga panaksan!
Unsa ang mas dako nga tumong? Aron dunay limpyo nga mga gamit sa kosina. Ang inyong indibidwal nga mga paagi makakarga ba og mga hugasan sa dishwasher? Maayo! Busa walay problema o rason aron maglalis.
Tan-awon nato ang mas seryoso nga mga isyu sa kaminyoon—pagpadako sa mga anak. Tingali ang usa ninyo nagtuo sa usa ka estrikto nga pamaagi sa pagdisiplina samtang ang laing usa nagtuo nga kinahanglan adunay pagpauyon-uyon ug pagsabot sa mga sayop. Sa unsa man kahang paagi nga magkadungan kanang duha ka opinyon? Pinaagi sa pagtutok sa mas dako nga tumong.
Ang mas dakong tumong nga inyong gisaw-an mao ang pagpadako og mga anak nga malipayon, responsable, ug nakagamot diha sa ebanghelyo ni Jesukristo. Nagkauyon na kamo sa labing mahinungdanon nga mga butang!
Paglipay sa panaw sa pagkat-on kon sa unsang paagi kamo magtambayayong sa pagkab-ot niana nga tumong. Kon kamo modawat sa inyong kaugalingong mga kalainan ug mga pamaagi sa pag-atubang sa kinabuhi, ang inyong mga anak—ang matag usa nila dunay ilang kaugalingong talagsaong personalidad—makahimo og lain-laing paagi sa pagpakigsabot nga adunay talagsaong epekto ninyong duha.
Duha ka ulo, duha ka panglantaw sa kalibotan, duha ka nagkalain-laing mga hugpong sa mga opinyon kanunay nga mas maayo kay sa usa!
Si Presidente Henry B. Eyring, Ikaduhang Magtatambag sa Unang Kapangulohan, mitudlo kanato sa maanindot kaayong paagi kon sa unsang paagi ang mga kalainan motugot kanato nga mahimong komplemento sa usag usa diha sa kaminyoon:
“Ako nahimong mas maayo nga tawo samtang ako naghigugma ug nagpuyo uban [sa akong asawa]. Kaming duha kanunayng nahimong komplemento sa usag-usa labaw pa sa bisan unsag butang nga akong mahanduraw. Ang iyang kapasidad sa pag-amuma sa uban mitubo diri nako samtang kami nagkahiusa. Ang akong kapasidad sa pagplano, pagdirekta, ug paggiya sa among pamilya mitubo diha kaniya samtang kami nahiusa sa kaminyoon. Nakaamgo ko nga kami karon sa hinay-hinay milambo ngadto sa pagkahiusa—hinay-hinay nga nagbayaw ug nagporma sa usag usa, kada tuig. Samtang kami mipatuhop og kalig-on gikan sa usag usa, wala kini mopaminos sa among personal nga mga gasa.
“Ang among mga kalainan naghiusa ingon og gituyo nga mohimo og usa ka mas maayo nga kinatibuk-an. Imbis nga mobahin kanamo, ang among mga kalainan mibugkos kanamo.”3
3. Kita ang responsable sa atong indibidwal nga kalipay.
Sagad kaayo nga kita maglaom sa atong kapikas nga maoy mopabati kanato nga masaligon, gihigugma, ug may kasigurohan nga gani kita mismo dili kahibalong mobuhat niining mga butanga alang sa atong kaugalingon! Ang pagpaabot sa inyong kapikas nga mohatag og katumanan niining tanan nga mga gusto ug mga panginahanglan mahimong moresulta sa pagkasagmuyo ug pagkahiubos diha sa kaminyoon.
Kamo maoy responsable sa inyong indibidwal nga kalipay. Si Elder Dieter F. Uchtdorf sa Korum sa Napulog Duha ka Apostoles sa usa ka higayon mipakigbahin niini nga panglantaw:
“Kon magkatigulang na ta, mas mahinumdom ta ug makaamgo nga ang kahimtang sa gawas dili diay importante o modeterminar sa atong kalipay.
“… Kita ang nagtino sa atong kalipay.”4
Pagkat-on unsa ang inyong gikinahanglan aron sa pagdumala sa inyong emosyonal nga kahimsog. Ang inyong kapikas dili makadumala sa inyong mga emosyon alang kaninyo—anaa sila aron sa pagdumala sa ilang kaugalingon nga mga emosyon uban kaninyo.
Usa sa labing makapalingkawas nga mga kamatuoran mahitungod sa kaminyoon mao ang pagkasayod nga ang atong mga emosyon dili pagadiktahan sa mga pulong ug mga lihok sa atong kapikas. Sa laing pagkasulti, kita mahimong molihok ug dili pagaaghaton (tan-awa sa 2 Nephi 2:26; Doktrina ug mga Pakigsaad 58: 27–28). Kita adunay gahom sa unsay atong hunahunaon ug, ingon man, sa unsay atong bation sa atong kaminyoon.
Kon ang akong bana mapakyas sa paglabay sa basura, mahimong pilion nako ang paghunahuna nga tungod kay siya wala malipay nako. Human sa tanan, nasayod siya nga dili gyod ko ganahan kon puno kaayo sa mga basura sa kusina.
Apan unsa ang resulta niana nga hunahuna? Dili maayo ang akong pagbati. Ug tingali makahimo pa gani kini kanako nga malayo ang pagbati gikan kaniya. Unsa kaha hinoon kon, ang akong hunahuna mao nga nakalimot lang siya? O mas maayo pa gani, unsa kaha kon akong pilion nga motuo nga ang iyang kapakyas sa pagpagawas sa basura walay bisan unsang kalabotan sa iyang kalipay para nako? Mas malagmit nga ang basura wala makadisturbo niya, ug mao na ang rason nganong nakalimot siya sa paglabay niini. Kon nakadisturbo na nako, ako ang pinakamaayong molihok sa buluhaton!
Ang pag-usab sa inyong mga hunahuna aron mausab ang inyong kasinatian sa kaminyoon tingali dili sayon nga trabaho, apan mapuslanon kini. Ug seguradong mas sayon kini kay sa mosulay sa pag-usab sa kinaiya sa inyong kapikas!
Ang kaminyoon usa ka panaw sa paglambo.
Ang kaminyoon sa kanunay adunay mga kalamposan ug mga kapakyasan, apan ang panaw latas nianang mga kalamposan ug kapakyasan mahimong usa ka hingpit nga kalipay ug makapahinam nga kasinatian kon kita mahinumdom nga ang kaminyoon usa ka oportunidad sa paglambo ug kausaban sa positibo nga paagi. Kini nga kinabuhi usa ka panahon sa pag-andam nga mahimong mas mahisama sa atong langitnong mga ginikanan, ug ang kaminyoon makatabang kanato sa pagbuhat niana!
Gitudlo ni Presidente Russell M. Nelson: “Dili kita kinahanglang madismaya kon ang atong pinakamaayong paningkamot sa pagkahimong hingpit karon ingon og hilabihan kalisod ug walay kahumanan. Ang pagkahingpit umaabot pa. Moabot lamang kini sa kahingpitan human sa Pagkabanhaw ug pinaagi lamang sa Ginoo.”5
Mapasalamaton kaayo ko sa gahom sa Pag-ula ni Jesukristo, nga naghimong posible alang sa akong kaminyoon nga molambo ug mahimo nga mas malipayon pa gayod sa pagdagan sa panahon. Mapasalamaton kaayo ko sa usa ka Manluluwas kinsa, bisan pa sa mga kahuyang nga ang akong bana ug ako nagpadayon sa pagtinabangay, makatabang kanamo nga mas mahisama Kaniya, ug kinsa makahimo sa among kaminyoon sa usa ka butang nga tinuoray nga mahimong tawagon og “celestial.”